දෙබෑ හවුලේ සැබෑ අවුල කුමක්ද?

මෛත්‍රීපාල සිරිසේන මහතා ජනාධිපති වූ පසුවද චන්ද්‍රිකා බණ්ඩාරනායක මහත්මියට "මැඩම්" ලෙසටද රනිල් වික්‍රමසිංහ මහතාට "සර්" යනුවෙන්ද අමතන බව පැවසුවේ ජනාධිපතිවරණයටද පෙරය. එය එතුමා අකුරටම ක්‍රියාත්මක කරන බව එතුමාගේ දේශපාලන භාවිතාව තුළින් අද වන විට පෙන්වා දී ඇත. 

පැවති මහින්ද රාජපක්ෂ මහතාගේ රජයේ විදේශ ප්‍රතිපත්තිය දිගින් දිගටම විවේඡනය කළ විරුද්ධවාදීන් පැවසුවේ 2012දී ඇමරිකාව විසින් එක්සත් ජාතීන්ගේ මානව හිමිකම් කවුන්සිලය වෙත ඉදිරිපත් කළ ශ්‍රී ලංකාවට එරෙහි යෝජනාව සම්මත වූයේ එම දුර්වල විදේශ ප්‍රතිපත්තියේ ප්‍රතිඵලයක් ලෙසට බවය.

නමුත් අද වන විට ඒ විරුද්ධවාදීන්ට ආණ්ඩු බලය හිමි වී ඇත. ඔවුන් කෙතරම් යට ගැසීමට උත්සාහ දැරුවත් ඇමරිකාව විසින් ශ්‍රී ලංකාවට එරෙහිව පසු ගිය දා ගෙන ආ යෝජනාවද කිසිඳු විරෝධයකින් තොරව සම්මත විය. පසුගිය වර ශ්‍රී ලංකාවේ පරාජය මහින්ද රාජපක්ෂ මහතාගේ රජයේ දුර්වලකමක් නිසා සිදු වූයේ නම් මෙවර සිදුවූ දැවැන්ත පරාජයට හේතුව වත්මන් රජයේ වැරදි විදේශ ප්‍රතිපත්තිය නොවේද? ජනතාව ඔවුන්ව පත් කළේ මෙය සිදුකර ගැනීමටද?

ශ්‍රී ලංකාවේ අභ්‍යන්තර දෙමළ ජාතිවාදී ප්‍රශ්නය චන්ද්‍රිකා බණ්ඩාරනායක සහ රනිල් වික්‍රමසිංහ යන නායකයන් විසින් ජාත්‍යන්තරකරණය කිරීමේ ප්‍රතිඵලයක් ලෙස නෝවේ රජයේ මැදිහත්වීම් මත කොටි පාළන ප්‍රදේශ සහ රජයේ පාලන ප්‍රදේශ අතර දේශ සීමා සළකුණු කිරීම දක්වා ප්‍රශ්නය දුරදිග ගියේය. නමුත් 2005 ලැබූ ජනතා ජයග්‍රහනයෙන් පසු එම තත්ත්වය පහව ගොස් ත්‍රස්තවාදය මුළුමනින් නිමා කිරීමට අපි සමත් වීමු.

දැන් නැවතත් චන්ද්‍රිකා රනිල් දෙදෙනාගේ උපදේශකත්වය මත ක්‍රියාත්මක වන මෛත්‍රීපාල මහතාගේ රජය යටතේ ඒ නිමාවක් වෙත ගමන් කරමින් තිබුණු ප්‍රශ්නය ජාත්‍යන්තරකරණය වී අළුත් වටයකින් ආරම්භ වී ඇත.

ජේ ආර් ජයවර්ධන මහතාගේ දුර්වල විදේශ ප්‍රතිපත්තියේ ප්‍රතිඵලයක් ලෙස ඉන්දියාවේ බලහතාරය මත පිහිටවූ පළාත් සභා රට දිනෙන් දින අර්බුධයට යවන ප්‍රශ්නයක් බවට පත් වී ඇත. එසේ තිබියදී ඇමරිකාවේ සහ ඉන්දියාවේ බලපෑම් හමුවේ ඔවුන්ගේ කොන්දේසි වලට යටත්ව රටේ උත්තරීතර ව්‍යවස්ථාව වෙනස් කිරීම මේ රජයේ ඊලඟ ඉලක්කය බවට පත් වී ඇත.

මේ අතර දහම් සිරිසේන ජනාධිපති ආශිර්වාදයයටතේ ජිනීවා යෑමත් ජනාධිපතිවරයා වෙනුවෙන් රට පුරා පොස්ටර් ඇලවීමත් ජාතික ප්‍රශ්නයක් තරමට බරපතල ළෙස දකින්නට උත්සාහ කරන පිරිසක්ද වෙයි. රටේ ස්වෛරීත්වය විදෙස් රටවල් හමුවේ අනතුරට පත් කර ඇති අවස්ථාවක, ඇමරිකානු ඉන්දියානු බලහත්කාරයට රටම ගිල ගැනීමට ඉඩ දී ඇති අවස්ථාවක ඒ සැබෑ ප්‍රශ්නය යටපත් කිරීම එවන් නිශ්ඵල චෝදනාවල අරමුණයි.

මෙම රජය ජනතාවට එරෙහි වූයේ දහම් සිරිසේන ජිනීවා රැගෙන යාමෙන් හෝ රට පුරා ජනාධිපතිවරයාගේ පෝස්ටර් ඇලවීමෙන් නොවේ.

ජනාධිපති සිරිසේන මහතා දිවුරුම් දීමට වැය කලේ රු. 6000ක් පමනකැයි කියැවිනි. ජනතාව අමන්දානන්දයට පත් වූහ. නමුත් එතුමන් යටතේ දින සීයක් තුළ රටේ මහ බැංකුවට රුපියල් කෝටි 6000 කට අධික අලාභයක් සිදුකරමින් කුප්‍රකට බැඳුම්කර වංචාව සිදුවිය.

එතුමා ජනාධිපති වී සතියක් තුළ කහ ඉර අසළ තම රථය නතර කර මාර්ග නීති පිළිපැද්ද බව වාර්ථා විය. නමුත් එතුමා ජනාධිපති වී මිනිත්තු කිහිපයක් තුළ උත්තරීතර ව්‍යවස්ථාව උල්ලංගනය කරමින් පාර්ලිමේන්තුවේ බහුතර කැමැත්ත නැත්තෙකු අගමැති තනතුරට පත් කළේය.

අධිකරනය බේරා ගැනීමට යැයි කියා පැමිනි එතුමා චිට් එකකින් අගවිනිසුරුවරයා ගෙදර යවා අධිකරනයේ උත්තරීතර බවට උපරිම හානිය සිදු කළේය.

නීතිය යුක්තිය ස්ථාපිත කිරීමට පැමිනි ඔවුහු පොලීසිය අගමැතිවරයාගේ ඍජු අනසකට යටත් කර දේශපාලන පළිගැනීම් සඳහාම වෙනම පොලිස් ඒකකයක් පිහිටුවූහ.

අද වන විට ඔවුන් විසින්ම සම්මත කළ ඇමති තනතුරු තිහකට සීමා කිරීමේ නීතිය අමු අමුවේ උල්ලංගනය කරනු ලැබ ඇත.

මහ මැතිවරණයේදී ජනතාව වෙතින් ප්‍රතික්ෂේපවුනු අපේක්ෂකයන් ජනාධිපතිවරයා බුරුතු පිටින් ජාතික ලයිස්තුවෙන් පාර්ලිමේන්තුවට පත් කළේ ජනතාවගේ තීන්දුවට සත පහක හෝ වටිනාකමක් ලබා නොදෙමිනි.

පසුගිය මහ මැතිවරණයේදී ලක්ෂ 51කට ආසන්න ඡන්ද සංඛ්‍යාවක් හිමි කරගත් එක්සත් ජාතික පක්ෂය ජයගත් අතර ලක්ෂ 47 ක ජනතාවක් එම පක්ෂයට විරුද්ධව ඡන්දය භාවිතා කර ඇත. නමුත් ජනාධිපතිවරයා විසින් අත්තනෝමතික ලෙස විධායක බලතල භාවිතා කරමින් එම ලක්ෂ 47 ජනමතයට මුළුමනින් පිටුපාමින් සුළු පක්ෂයකට විපක්ෂ නායකකම හිමිකර දී ඇත.

මෙළෙසින් එළිපිටම රටේ ව්‍යවස්ථාව උල්ලංගනය කරමින්, ජන මතයට පිටු පාමින්, ප්‍රජාතන්ත්‍ර විරෝධීව යන අත්තනෝමතික ගමනේ අවසානය කුමක් විය හැකිද? ඉතිහාසයේ කවර කළෙක හෝ සිදු නොවුනු ලෙසින් ඒකාධිපති වියුරුවෙන් රට තුළ ප්‍රජාතන්ත්‍රවාදය වනසාදමන අතර රටේ ස්වෛරීත්වය ඇමරිකානු සහ ඉන්දියානු අධිපතිවාදය හමුවේ පාවා දෙනු ලැබ ඇත. රට තුල මානව හිමිකම් කඩවන බවටත්, අපේ වීරෝධාර හමුදාවෝ යුධ අපරාධ කර ඇති බවටත් ජාත්‍යන්තරය ඉදිරිපත් කරන පදනම් විරහිත චෝදනා කිසිඳු වග විභාගයකින් තොරව පිළිගෙන ඇත. ඒ කිසි සේත් ජනතාවගේ යහපතට, රටේ අධීන පැවැත්මට, ඒකීයත්වයට හිතකර නොවේ.

කහ ඉර මත වාහනය නතර කර සපත්තු ගැනීමට කඩේ ගිය පමනින් මේ බරපතල වියවුලට විසඳුම් නොලැබේ. එවැනි ටොපි චොකලට් මගින් ජනතාව ගොනාට ඇන්දවිය හැකි කාලය ඉතා කෙටි බව ආණ්ඩුව තේරුම් ගත යුතුය. අප මෙම මෛත්‍රී- රනිල් ආණ්ඩුවට විරුද්ධ වන්නේ දහම් සිරිසේන ජිනීවා ගෙනගිය බැවින් නොව ඔවුන් විසින් යටත්විජිතවාදය හමුවේ හීන ධීනව රටත් ජාතියත් වලපල්ලට ගෙනයමින් සිටින බැවිනි.  

-විමුක්ති වනිගසේකර
යුතුකම සංවාද කවය
www.yuthukama.com

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න.
(Like us on facebook)
https://www.facebook.com/yuthukama