කරූ ගේ කෙරුම් වලට ඉඩ නොදෙමු

-සමීර ගල්පාය -

කතානායක කරූ ජයසූරිය මහතා දිගින් දිගටම ප්‍රකාශ නිකුත් කරමින් රටේ නැති අස්ථාවරත්වයක් පිලිබඳ කතන්දරයක් ජාත්‍යන්තරය හමුවේ නිර්මාණය කිරීමට දැඩි උත්සහයක නිරතවී සිටින බව දැන් ඉතා පැහැදිලිය. නීතිය හා සම්ප්‍රදාය ගැන බොරු ප්‍රචාර පතුරමින් රනිල් ප්‍රමුඛ එ.ජා.පය සහ අනිකුත් බටහිරගැති පක්ෂ හා එක්ව නැතිවූ බලය නැවත කිනම් ලෙසකින් හෝ ලබාගැනීමේ බටහිර ව්‍යාපෘතියට කරූ අතගසා ඇත.මෙය ඉතාම පිළිකුල් සහගත හා භයානක තත්වයකි. රටේ උත්තරීතර නීතිය වන්නේ ආණ්ඩුක්‍රම ව්‍යවස්ථාවයි. ඒ අනුව කටයුතු කිරීමට රටේ සියලුම පුරවැසියන් බැඳී සිටී. කථානායක යනු මෙය නොදන්නා තොත්ත බබෙක් ලෙස අප සිතාගත යුතුද? මොහු කථානායක තනතුරේ වැඩ කටයුතු කල ආකාරය ගැන රටට අමතක නැති බව කිවයුතුය.ප්‍ රජාතන්ත්‍රවාදය ගැන විකාර කියවන කරූ පාර්ලිමේන්තුව තුල කතා කිරීමේ නිදහස ලබාදුන් අපූරුව අපට හොඳට මතකය. මොහු පාර්ලිමේන්තුව තුල හැසිරුනේ කථානායක ලෙස නොව සභා නායක ලෙසය. මෑත කාලය තුල ජාතික මැතිවරණයකදී හොර ඡන්ද දැමීමක් ගැන සඳහනක් නැති අතර අඩුම තරමේ සමූපකාර ඡන්ද වලදී ද එලෙස සඳහනක් නොවීය. එහෙත් රටේ නීතී සම්පාදන ආයතනය වන පාර්ලිමේන්තුව තුල හොර ඡන්ද පැවතුනේ මොන ප්‍රජාතන්ත්‍රවාදයට අනුව දැයි කරූ ගෙන් ප්‍රකාශයක් නිකුත් කල බවක් අප දන්නේ නැත. කරූ ගේ ඒ ලෝකයා දන්නා කෙරුම්ය. නොදන්නා ඒවා ගැන කුමක් සිතාගත යුතුද?

මොහුට මෙවැනි ප්‍රකාශ සිදු කිරීමට ඇති අයිතිය කුමක්ද? තානාපතිවරුන් වෙත රාජ්‍යයේ ස්ථාවරය දැනුම් දීමට ඇති අයිතිය කුමක්ද? පාර්ලිමේන්තුව කල්දැමූ පසු කථානායක රටේ ජනාධිපතිවරයා වනවාද? කථානායක මෙහෙයවන්නේ පාර්ලිමේන්තු සභාව පමණි.අවම වශයෙන් පාර්ලිමේන්තුව රැස්කිරීමට හෝ කල්දැමීමේ පුර්ණ බලය ලබාදී තිබුණා නම් කථානායක යනු පාර්ලිමේන්තුව මෙහෙයවන්නා ලෙස කීමට හැකියාවක් ඇත.නමුත් එලෙස බලයක් ලබාදීමට ව්‍යවස්ථාවේ ඉඩක් නැත.එවැනි බලයක් ලබා නොදී ඇත්තේද, කථානායකවරයා යනු නියෝජන ප්‍රජාතන්ත්‍රවාදයට අනුව පාර්ලිමේන්තුවට පත්වන මන්ත්‍රීවරුන්ගේ කැමැත්ත මත පමණක් තෝරාපත් කරගනු ලබන තැනැත්තෙක් වන නිසාය.පාර්ලිමේන්තුව කල්තබා ඇති මොහොතක කථානායක පදවිය යනු අක්‍රිය තත්වයේ පවතින ධුරයක් විය යුතුය.නැතිනම් පාර්ලිමේන්තුව කල්තැබීම යන්න තේරුමක් නැති ක්‍රියාවකි.අද කරූ ජයසූරිය නීතිය ගැනද කතා කරන්නේ රටේ මූලික නීතිය ද අමු අමුවේ උල්ලංඝණය කරමින්ය.එසේ නම් තව කුමන කතාද?

දින කිහිපයකට කළින් වත්මන් කථානායකවරයා දැනුම් දී තිබුණේ, මහින්ද රාජපක්ෂ මහතා අගමැති ලෙස පිළිගන්නා බවත් එම පත්වීම ව්‍යවස්ථානුකුල බවත් එම තනතුරේ පාර්ලිමේන්තු වරප්‍රසාද ඒ අයුරින් ලබා දීමට කටයුතු කරන බවත්ය. නොවැම්බර් 5 වැනිදා ප්‍රකාශයක් කරමින් කරූ ජයසූරිය කියා සිටින්නේ එම පත්වීම නීතිවිරෝධී බවත්,පාර්ලිමේන්තු සම්ප්‍රදායන්ට පටහැනි බවත්, පාර්ලිමේන්තුවේ බහුතරය පෙන්වන තුරු පෙර පැවති තත්වය, එනම් තවමත් රනිල් වික්‍රමසිංහ අගමැති ලෙසත් පිළිගැනීමට සිදුවන බවත්ය.වැඩි දුරටත් පවසා සිටින්නේ, වර්තමාන ආණ්ඩුව ලෙස පෙනීසිටින පිරිස් සැබෑ ආණ්ඩුවේ(රනිල් ගේ ආණ්ඩුවේ) ඇමති කාර්යාල වලට ඇතුළු වී බලහත්කාරකම් කිරීම් ගැන ලැබුණු තොරතුරු වලින් කම්පනයට පත්වී සිටින බවත් ය.වත්මන් කථානායක මෙතරම් බැරෑරුම් ප්‍රකාශ සිදු කරන්නේද, පාර්ලිමේන්තුව කල්තබා ඇති මොහොතකය.එය මොන සම්ප්‍රදායට අයත් දැයි අපට ප්‍රශ්නයක් ඇත.නව අගමැතිවරයා පත්කිරීමේ නීතිමය තත්වය පිලිබඳ නීතිපතිවරයාගෙන් විමසීම කරනු ලබන්නේද, පාර්ලිමේන්තුව කල්තබා ඇති අවස්ථාවකය.එය කුමන පාර්ලිමේන්තු සම්ප්‍රදායට අයත් වන්නේ ද? 2015 දී රනිල් සුළුතර බලයක් සහිතව අගමැති ලෙස කටයුතු කරද්දී එවකට කථානායක චමල් රාජපක්ෂ මෙවැනි නාඩගම් නටුවේ නැත.සම්ප්‍රදාය වෙනස් වන්නේ කරූ ගෙන් මිස වෙනත් කිසිදු කතානායකවරයෙක් ගෙන් නොවෙයි.නීතිපතිවරයා තම ධූරයේ වැදගත්කම එලෙසම තබාගෙන කථානායකට දුන් කනේ පහර සම්බන්ධයෙන් නම් ඉතාමත් ජනතාව ලෙස අප සතුටු වන බවද පැවසිය යුතුය.

මොහු නොකියා කියාසිටින්නේ පාර්ලිමේන්තුවේ බහුතරය මත පමණක් රටේ පාලනය ගෙන යා යුතු බවය.එය ආණ්ඩුක්‍රම ව්‍යවස්ථාවට පටහැනි වුවද පාර්ලිමේන්තුවේ බහුතරය මත තීන්දු තීරණ ගතයුතු බවය.අප රටේ විධායකවත් ඉතිහාසයේ මෙලෙස ආණ්ඩුක්‍රම ව්‍යවස්ථාවට අභියෝග කර ඇති අවස්ථාවක් නම් නැතිව ඇති.මුළු රටම එකම ඡන්ද කොට්ඨාශයක් ලෙස සලකා බහුතර කැමැත්ත මත ජනාධිපතිවරයෙක් තෝරාපත් කරගන්නේ රට පාලනය කිරීමටය.නිවැරදිම ලෙස නම් රට කරවීම සඳහාය.ඒ අනුව ආණ්ඩුවක් නිර්මාණය කිරීම ජනපතිගේ කාර්යක් සහ ආණ්ඩුව වෙනුවෙන් වගකීම දරන්නේද ජනපතිය.සරලවම කියනවානම් රටේ ජනතාවට අවශ්‍ය පරිදි ආණ්ඩුව කරවීම ජනපතිගේ කාර්යයි.එය ඉතාමත් හොඳින් ආණ්ඩුක්‍රම ව්‍යවස්ථාවේ පැහැදිලිව ඇත.අගමැතිවරයා පත්කිරීමේදී පාර්ලිමේන්තුවේ මතය විමසීමට හෝ අවශ්‍ය වන්නේ නැත. ජනපතිවරයාට තම මතය අනුව ආණ්ඩුවේ වෙනස්කම් සිදුකිරීමටද බලය ලබා දී තිබෙන්නේද රටේ ජනතාවට වගකියන පුද්ගලයා ලෙස පත්වී ඇත්තේ ජනපතිවරයා වන නිසාය.එය එසේ නොවන්නේ නම් පමණක් රටේ ජනතාවට ප්‍රජාතන්ත්‍රවාදය පිලිබඳ ප්‍රශ්නයක් ඇත. ව්‍යවස්ථාවේ නොතිබුනද සම්ප්‍රදායක් ලෙස පාර්ලිමේන්තුවේ මතය විමසා අගමැති පත්කිරීම සිදුකර ඇත්නම් අගමැති ධූරය ගැන ප්‍රශ්න කිරීමට සදාචාරාත්මක අයිතියක් ඇත.නමුත් පාර්ලිමේන්තුවේ බහුතරය පෙන්වන නිශ්චිත ආකාරයකවත් නොමැතිකොට කතා කිරීමට දෙයක් නැත.පාර්ලිමේන්තුව කල්තබා ඇති අවස්ථාවක කුමක් ඇසීමට සදාචාරාත්මක අයිතියක් කථානායකට ඇත්ද?

අවසාන මැතිවරණයට අනුව රටේ බහුතරය මහින්ද හා සිරිසේන නියෝජනය කරන දේශපාලන කණ්ඩායමට ඇත.නව ආණ්ඩුවක් පත්කිරීමට එය එකම හේතුව කරගැනීමට වුවද ජනපතිට සදාචාරාත්මක අයිතියක් ඇත.කරූ ට ඒ කිසිවක් වැඩක් නැත, අදාළ වන්නේ පාර්ලිමේන්තුවේ තත්වය පමණක් යැයි කෙනෙක්ට තර්ක කිරීමට හැක.එසේ නම් කල යුත්තේ පාර්ලිමේන්තුවට අදාළ දේ ව්‍යවස්ථාවෙන් ලබාදී ඇති බලය මත පිහිටා කටයුතු කිරීම මිස වෙන කිසිවක් නොවේ.එය එසේ නොවන්නේ නම් මහ ජනතාව ලෙස තමන්ගේ පරමාධිපත්‍ය බලය පාරට ගෙන ඒමයි.එවැනි අවස්ථාවක ව්‍යවස්ථාවේ කතන්දර වැඩකට නැත.මේ රට සම්ප්‍රදාය මත පදනම්ව රට කරවීම සිදුවුණු අතරම අවශ්‍ය වූ විට පාලනය වෙනස් කිරීමද සිදුකර ඇත.එයට අද මෙන් නිශ්චිත කාලයක් බලන් ඉඳීමට අවශ්‍යද නැත.එය අදටත් වඩා ඉතා ඉහල මට්ටමේ ප්‍රජාතන්ත්‍රවාදී ලක්ෂණ සහිත ක්‍රමයකි.එයට ප්‍රජාතන්ත්‍රවාදය යැයි කීමට අවශ්‍ය නැත,එය අදට වඩා ජනතාවාදී වේ. කථානායක තනතුර භාවිතා කරමින් දේශද්‍රෝහී, රාජ්‍ය විරෝධී ප්‍රකාශ හා කුමන්ත්‍රණ කිරීමට ඉඩ දී සිටීම මුළුමහත් රටේම ජනතාවගේම පරමාධිපත්‍ය බලයට, රටේ ස්වාධීනත්වයට කරන අභියෝගයක් ලෙස සලකා විධායකයට ලබා දී බලතල අනුව මෙවැන්නන්ට එරෙහිව කටයුතු කිරීමට ජනපති ක්‍රියාකළ යුතුය.එයට ඔහු බැඳී සිටී.අද ඇත්තේ ජාතිකත්වය සහ එයට එරෙහිව නැගී සිටින විජාතිකත්වය අතර සටනකි.ජාතිකත්වය වෙනුවෙන් සටන් වැදීමට අවශ්‍ය ශක්තිය ජනපතිට සහ නව අගමැතිවරයා සතුව ඇතැයි අපගේ විශ්වාසයයි.

යුතුකම සංවාද කවය
www.yuthukama.com
Like us on facebook : https://www.facebook.com/yuthukama

මහින්ද කළයුත්තේ කුමක්ද?

බි‍්‍රතාන්‍යයේ ශ‍්‍රීලනිප ශාඛාව නිවේදනයක් නිකුත් කරමින් සිරිසේන මහතාට පවසා ඇත්තේ,අගෝස්තු 17 වැනිදා පැවැත්වෙන පාර්ලිමේන්තු මැතිවරණයේදී ශ‍්‍රීලනිපය ජයග‍්‍රහණය කරවීමට නම් එය කල හැකි හැකි නායකයෙකු තෝරා පත්කර ගැනීමට පක්ෂ සභාපති ධූරයෙන් ඉවත් වන ලෙස.

ශ‍්‍රීලනිප බි‍්‍රතාන්‍ය ශාඛාවේ සභාපති මෙත්සිරි විජේරත්න මහතා නමින් නිකුත් කර ඇති එම නිවේදනයේ සදහන් වන්නේ ජනාධිපති මෛත‍්‍රිපාල සිරිසේන මහතා තමා නිර්පාක්ෂිකයෙකු බව මෑතකදී ගාල්ලේ පැවැති උත්සවයකදී ප‍්‍රකාශ කර ඇති බැවින් පක්ෂයට එඩිතර නව නායකයකු පත්කර ගැනීමට හොදම අවස්ථාව මෙය බවයි.

ශ‍්‍රීලනිපයට ආදරය කරන පුද්ගලයින් ලෙස ඉදිරි මහ මැතිවරණයේදී ඡුන්ද සටනට නායකත්වය දීමට නව නායකත්වයක් අවශ්‍ය බැවින්, මෛත‍්‍රිපාල සිරිසේන මහතා නිර්පාක්ෂිකව සිටිමින් සුදුස්සෙකුට සභාපතිධූරයට ඉඩ සලසා ඉවත්විය යුතු බවද එම නිවේදනයෙන් දක්වා ඇත.

කළයුත්තේද එයම පමණි.එනම් ශ්‍රීලනිප විධායක සභාව තුල ඇති බහුතරයෙන් මහින්ද නැවතත් පක්ෂයේ සභාපතිත්වයට පත් කරා ගැනීමයි.එවිට මහින්ද මහතාගේ පාර්ශවයට ඇවැසි ආකාරයකට නාමයෝජනා ලබා දීම හා මැතිවරණ ව්‍යාපාරය කරා ගෙන යාමට හැකිය.විධායක සභාව අගමැති අපේක්ෂක ලෙස නම් කොට නාමයෝජනා ලබා දුන්නද අවසාන වශයෙන් අගමැති පත් කිරීමට බලය ඇත්තේ සිරිසේනට බව මතක තබා ගත යුතුය.පාර්ලිමේන්තු සම්ප්‍රදාය අමු අමුවේ කෙළෙසමින් රනිල් අගමැති ලෙස පත් කල සිරිසේනට,බහුතරය සහිත සන්ධාන මන්ත්‍රීන් පිරිසක් සහිත පාර්ලිමේන්තුවක් තුල අගමැතිකම නිදහස් පක්ෂයේම මහින්ද හැර වෙනත් ඕනෑම කෙනෙක්ට ලබාදිය හැකිය.මේ අවධානම අපි සැවොම තේරුම්ගත යුතුය.

සිරිසේන තව දුරටත් රනිල්ට සර් කියා ඇමතීමට සූදානම් නැත,ඔහුට තව දුරටත් රනිල්ගේ පදයට නැටීමට කැමැත්තක් නොමැති අතරම එසේ තමා බලය තහවරු කරගැනීමට මහින්දගේ ජනතා බලය යොදා ගැනීමට මේ අවස්ථාවේ සැරසී සිටී.ඒ සඳහා කළයුතු වන්නේ අගමැති අපේක්ෂකත්වය (පක්ෂ නායකත්වය නොමැතිව) දීමට පොරොන්දු වීමයි,එමගින් මහින්ද නිදහස් පක්ෂය ප්‍රමුඛ සන්ධානයට බහුතරයක් දිනා දෙනු ඇත.සුපුරුදු පරිදිම එය සොරාගෙන වෙනත් අගමැති කෙනෙක් පත් කිරීමට සිරිසේන පසුබට නොවෙනු ඇත.මහින්ද පිල වෙනම තරඟ කොට බහුතරය දිනා ගත හොත් සිරිසේනට කිසිවක් කල නොහැකි බවද අමුතුවෙන් කිව යුතු නොවේ.
ඌරගෙ මාළු ඌරාගේම පිටේ තියා කප්පවන්නට බටහිර බලවේග සිරිසේනට උපදෙස් ලබාදී නොමැති බව කිසිවෙකුට හෝ පැවසිය හැකි වෙත්ද?

අද නිදහස් පාක්ෂිකයා තමා පක්ෂය අත් හැරීමට සුදානම් වී හමාරය.තනි නායකයෙක් වටා ජනතා බලය ගොඩ නැගී ඇත.මහින්ද රිද්දීමට,මහින්දට පණිවිඩයක් දීමට,මහින්දගේ බලය අඩු කිරීමට හංසයාට ඡන්දය දුන් සැලකිය යුතු පිරිසක් ඒ වරද නිවැරදි කර ගැනීමට පුල පුලා බලා සිටී.වෙනසක් බලාපොරොත්තුවෙන් බොරුවට හසුව තමාටම දොස් නගා ගන්නා තවත් බොහෝ දෙනෙක් තම වරද නිවැරදි කරගන්නට බලා සිටී.ගියවර මැතිවරණයේදී වික්ෂිප්තව ඡන්දය නොදුන් නිදහස් පාක්ෂිකයන් පිරිසකුත් මහින්ද දින වීමට බලා සිටී.මහින්ද බලවත් වී ඇත.ඒ මේ රටට ආදරය කරන ජනතාවගේ බලයයි.මහින්ද පක්ෂයට දැඩි සේ ආදරය කරන නායකයෙක් බව අප නොදන්නවා නොවේ.නමුත් ඔහු ඊටත් වඩා මේ රටට ආදරය කරන්නෙක් බව අපගේ විස්වාසයයි.නිදහස් පාක්ෂිකයා පක්ෂය අතහැරීමට සූදානම් නම් මහින්ද ඊටද හිස නමා ජනතා පැතුම අනතුරේ නොහෙළා පක්ෂය අත් හැරීමට තීරණය කල යුතුය.

සිංහලයන්ගේ ජාතිකත්වය පහල සිට ඉහල නායකත්වය කරා ගලායන්නකි.අද එය සිදුවෙමින් පවතී.මේ නායකයා සොයා ජනතාව ඇදෙමින් පවතින මොහොතකි.අද සැලකිය යුතු මට්ටමේ සිංහල බෞද්ධ නායකත්වයක් මහින්ද තුලින් පිළිඹිබු වේ.නායකත්වය සිංහල බෞද්ධද නැද්ද යන්න තීරණය වන්නේ ඒ නායකත්වය නියෝජනය වන පිරිස මතය.මහින්ද මහතාගේ සිංහල බෞද්ධකම නැතහොත් ජාතිකත්වය අවිිඥානිකද නැතහොත් සවිිඥානිකද යන කාරණාව එතරම් වැදගත් නොවන්නේ සිංහලයන්ගෙන් බහුතරයකගේම ඇත්තේ අවිිඥානික ජාතිකත්වයක් නැතහොත් අවිිඥානික සිංහල බෞද්ධකමකි.එයද ප්‍රශ්නයක් නොවන්නේ ඒ ජාතිකත්වයද අවශ්‍ය තැන්හි එකතු කරගත හැකි සවිිඥානික ජාතික මතධාරීන් පිරිසක්(මුලිකවම භික්ෂුන් වහන්සේලා ඇතුළු ජාතික මතවාදීන්)රට තුල ඇති බැවිනි. නායකයෙක් හට අවිිඥානිකව ජාතිකත්වය ඇති විට ඔහු කිසිවිටකත් තාම බලය තරකර ගැනීමට ජාතිකත්වය යොදාගන්නේ නැත.මහින්ද තුලද ඇත්තේ එවැනි අවිිඥානික සිංහල බෞද්ධකමකි ජාතිකත්වයකි.ඒ නිසා චම්පික,රතන ලාට මෙන් ජාතිකත්වය දඩමීමා කොට ගෙන දේශපාලනයේ යෙදීමට මහින්දට හැකියාවක් නොමැති අතර කළයුතු වන්නේ ජාතික මතවාදයේ පිරිස් මහින්ද වටා එක් වී මහින්දට මග පෙන්වීමය.මෙය බොහෝ කලකට පසුව උදාවූ ජාතික දේශපාලනයේ වැදගත්ම අවස්ථාවකි.

අද කළයුත්ත නොකළ යුත්ත තීරණය කරන්නේ නායකත්වය නොව ඒ නායකත්වය නියෝජනය කරන පිරිසයි.එනම් අද කළයුත්ත කුමක් දැයි තීරණය කරන්නේ මහින්ද නොව දේශප්‍රේමී ජනතාවයි.මහින්ද කලයුත්තේ එයට අවනතවීම පමණි.

-සමීර ගල්පාය

යුතුකම සංවාද කවය

www.yuthukama.com

සුද්දා අපට ඉගැන්වූ ප්‍රජාතන්ත්‍රවාදයේ පාඩම

හුදු යහපාලන විරෝධීන් නොවෙමු..

යහපාලනය නෙමෙයි මොන පාලනයක් ගෙනාවත් පොඩි පොඩි ප්‍රශ්න ඇති වෙනවනේ. ඇත්තටම ඕව ප්‍රශ්න නෙමෙයි. මහ ලොකුවට ගන්න දෙයක් උනා නම් කමක් නෑ තව.
මොනාද ඔය ප්‍රශ්න විදියට තියෙන්නේ?

රටේ ආරක්ෂාව සම්බන්දයෙන් ගත් විට අධිආරක්ෂිත කලාප ඉවත් කිරීම,හමුදා කඳවුරු ඉවත් කිරීම,මිය ගිය LTTE සාමාජිකයින් සිහි කිරීම කියන කාරණා ටිකනේ.මෙහෙමයි ඉතින් ආණ්ඩුවක් වෙනස් වෙනකොට තමන්ගේ ප්‍රතිපත්ති වලට අනුකුලව තමා රටේ ආරක්ෂාව කොහොම විය යුතුද කියල තීරණය කරන්නේ.

මේ ආණ්ඩුව විශේෂයෙන්ම සැලකිලිමත් වෙලා තියෙන්නේ අවුරුදු30ක් යුද්ධයකින් පීඩා විඳපු උතුරේ දෙමල මිනිස්සුන්ට සාමකාමී ප්‍රජාතන්ත්‍රවාදී සමාජ වටපිටාවක් නිර්මාණය කර දෙන්න.ඇත්තටම ඒ මිනිස්සුන්ට යුද්ධයේ නටබුන් අවශේෂ දකින කොට ඇති වෙන හැගීම ගැන අපිට වටහුන් නැති උනාට ජෝන් කෙරී,ම්ලිබැන්ඩ් මහත්වරුන්ට තේරෙනවා. එවැනි දැනමුත්තන්ගේ අනුශාසනායටතේ මේ ආණ්ඩුව කටයුතු කිරීම ඇත්තටම සතුටු විය යුතු කාරණයක්. ඒ සමාජ වටපිටාව ඇති කිරීමට බාධාවක් වන සියලු දේ ඉවත් කිරීම අත්‍යාවශ්‍යයෙන්ම කල යුත්තක්. එවිට හමුදා කඳවුරු රණවිරු ස්මාරක ඉවත් කිරීම අනාගතයේදී මේ රටේ සාමය සහජීවනය සංහිදියාව ඇති වීමට ලොකු පිටුවහලක් වෙයි. අධිආරක්ෂිත කලාප ඉවත් කිරීමේ මූලික අරමුණ වන්නේ උතුරේ ගොවියන්ට අවශ්‍ය ඉඩම් ලබා දී රටේ නිෂ්පාදන ක්‍රියාවලිය ශක්තිමත් කිරීමයි. රනිල්,රවී වැනි ආර්ථික විශේෂඥියන් යටතේ ලංකාව දැවැන්ත ආර්ථික සංවර්ධනයක් කරා යාමේ පළමු පියවර ලෙස උතුරේ ආර්ථික සංවර්ධන ක්‍රියාදාමයන්(අධිආරක්ෂිත කලාප ඉවත් කොට මහජනතාවට බෙදා දීම)හඳුනාගන්න පුළුවන්.

මියගිය LTTE සාමාජිකයින් සිහිකිරීම මහා ආන්දෝලනාත්මක ප්‍රශ්නයක් බවට පෙන්වීමට ඇතැමුන් ක්‍රියා කිරීම කිසිසේත්ම ප්‍රජාතන්ත්‍රවාදය අගයන රටක සිදුවිය යුතු දෙයක් නොවෙයි. තමන්ගේ වීරයන්(බොහෝ දෙමල ජනයාට ප්‍රභාකරන් ඇතුළු පිරිස වීරයන්ය.) සැමරීමට ඇති ප්‍රජාතන්ත්‍රවාදී අයිතිය නැති කිරීමට කිසිවෙකුටත් අයිතියක් නොමැත.කුමක් කීවත් ආණ්ඩුව මෙම සැමරීමට ඉඩකඩ සැලසීම බටහිර රටවල ප්‍රශංසාවට ලක්වීම රට ලැබූ ජයග්‍රහණයකි. එය අප රට තුල ඇති වෙමින් පවතින ප්‍රජාතන්ත්‍රවාදයට පාදමක් වනු නිසැකය. සහජීවනය හා සංහිදියාව ඇති කිරීමේ මූලික අරමුණ පෙරදැරිව ජාතික ගීය දෙමළින් ගායනා කිරීමට ඉඩ දීම මගින් ජනවර්ග අතර සහජීවනය ඇති කිරීම සම්බන්දයෙන් මුලු මහත් ලෝකයටම ආදර්ශයක් දීමට අපට හැකියාව ලැබුනි. ලෝකයේ මෙවන් අවස්ථාවක් ලද එකම රට වීමේ අභිමානය යලි කිසිවෙකුටත් අපෙන් උදුරාගත නොහැකි බව සතුටින් දන්වා සිටිමි. මේ කුමන කරුණක් සම්බන්ධයෙන් දෙගිඩියාවක් වුවත් මේ රට ප්‍රජාතන්ත්‍රවාදී,සාමකාමී රටක් බවට පත්වෙන බවට කිසිදු සැකයක් ඇති කරගැනීමට අවශ්‍ය නැත. මන්දයත් මුලු මහත් අරාබිකරයටම,සුළු වශයෙන් ආසියාකරයට ප්‍රජාතන්ත්‍රවාදයේ දොරගුළු ඇරදුන් ඇමරිකාව,එංගලන්තය ප්‍රමුඛ යුරෝපීය රටවල් අද මේ රටට අවශ්‍ය උපදෙස් අත්වැල රනිල් ප්‍රමුඛ ආණ්ඩුවට සපයන නිසාය. එහි එක් සන්ධිස්ථානයක් ලෙස වසර40 කට පසුව ඇමරිකානු රාජ්‍ය ලේකම් වරයෙකු මෙරටට පැමිණීම හැඳින්විය හැකිය .

එංගලන්ත මහ රැජින සිරිසේන මහතාගේ අතට ඇත දීම,ඩේවිඩ් කැමරන් මහතා ඉදිරියට පැමිණ සිරිසේන මහතාගේ කාරයේ දොර ඇරීම වැනි කාරණාද මෙරට දේශපාලනයේ හැරවුම් ලක්ෂ්‍ය ලෙස සියුම්ව කල්පනා කර බැලීමේදී අවබෝධ වනු ඇත. ප්‍රජාතන්ත්‍රවාදයේ සංහිදියාවේ සහජීවනයේ පණිවුඩය රැගෙන ජෝන් කෙරී මහතා දේවදුතයෙක් සේ මෙරටට පැමිණ අපමණ ප්‍රීතියෙන් නැවත දෙවියන් වහන්සේගේ අඩවියට උන්වහන්සේට කරුණු සැල කිරීමට පිටත් වී ඇත. ඔහු එසේ පිටත් වුයේ සාමයේ පණිවුඩයද රැගෙන බැරක් ඔබාමා ද දෙවදුතයෙක් සේ මෙරටට එනු ඇතැයි යන ඉඟිය ලංකාවාසීන්ට ලබාදෙමින්ය. සියල්ල ඉහත සඳහන් කෙරූ අයුරින් සිදුවී තිබියදීත් නිස්කාරණයේ ආණ්ඩු විරෝධී කතන්දර ගෙතීමින් වැලකී සාමයේ දේවදුතයා පැමිණෙන තුරු අපේක්ෂාවේ දෑස් දල්වා සිටිමු. කල යුත්තේ එය පමණකි. 

""මෙය සුද්දා අපට ඉගැන්වූ ප්‍රජාතන්ත්‍රවාදයේ පාඩමයි.""

-සමීර ගල්පාය
යුතුකම සංවාද කවය
www.yuthukama.com

--------------------------------------------- 
"නිවැරදිව හරවත්ව කියවන්න අපගේ ෆේස්බුක් පිටුව සමඟ එක්වන්න.
https://www.facebook.com/yuthukama
ෆේබුක් පිටුවට Like  කර එකතු වන්න "
---------------------------------------------