"සෝම හිමි" නැවත සිහි කරමු

-චතුර පමුණුව

[2011-12-10 දිවයින ඉරිදා සංග්‍රහය  යේ පළවූ ලිපියකි.අන්තර්ගතය අදටද එකලෙස අදාළ යැයි හැඟෙන බැවින් නැවත පළ කෙරේ..]

2003 සැප්තැම්බර් 14 වැනිදා මහනුවර මහමළුවේදී පැවැත්වූ බොදු සමුළුවක ප්‍රධාන දේශකයා ලෙස පූජ්‍ය ගංගොඩවිල සෝමහිමියෝ සහභාගි වූහ. එම රැස්‌වීමේ සිය කථාව පවත්වමින් සිටින අතරතුර උන්වහන්සේ විශේෂ ලිපියක්‌ ගෙන ප්‍රදර්ශනය කළහ. එම ලිපිය ප්‍රදර්ශනය කරමින් සෝම හිමියන් ප්‍රකාශ කළේ තමන්වහන්සේ ඝාතනය කිරීමට ක්‍රිස්‌තියානි මූලධර්මවාදී සංවිධානයක්‌ මුදල් යොදවා ඇති බවය. ඇත්තෙන්ම සෝමහිමියන් අපවත්වීමට පෙර සහභාගිවූ අවසන් රැස්‌වීම එයයි.

2003 දෙසැම්බර් 12 වැනිදා සෝමහිමියන් රුසියාවේ පීටර්ස්‌බර්ග් නුවරදී හදිසියේ අපවත්වූයේ මෙරට සිංහල බෞද්ධයන්ව සෝ සයුරක ගිල්වමිණි. වර්තමාන සිංහල බෞද්ධ ප්‍රබෝධයේ මූලිකයා වූ උන්වහන්සේ පිළිබඳ මතකය මෙරට දෑ හිතකාමී ජනතාවට ලෙහෙසියෙන් අමතක කළ නොහැක. උන්වහන්සේ අපවත්වී වසර 08 ක්‌ සපිරෙන්නේ හෙට (12) දිනයටය. සෝමහිමි අපවත්වීමත් සමග මෙරට බෞද්ධයන් විශේෂයෙන්ම මධ්‍යම පාන්තිකයෝ තමන්ට එරෙහිව මූලධර්මවාදී කුමන්ත්‍රණයක්‌ සිදුවන බව පැහැදිලිව අවබෝධ කර ගත්හ. එනිසාම ජීවත්වු සෝමහිමියන්ට වඩා අපවත්වූ සෝමහිමියන්ගේ බලපෑම වඩාත් ප්‍රබල විය. 2001 පිහිටුවාගත් රනිල් වික්‍රමසිංහ ගේ එක්‌සත් ජාතික පෙරමුණු ආණ්‌ඩුව 2004 දී බිඳ වැටීමට එක්‌ ප්‍රධාන හේතුවක්‌ වූයේ සෝමහිමි අභාවයයි. එදා එජාප ආණ්‌ඩුව වෙසක්‌ සතියේදී විදුලිය අරපිරිමැසීමට අවශ්‍ය යෑයි කියමින් තොරණවලට විදුලි පහන් දැල්වීමට අවසර දුන්නේ දින පහක්‌ පමණි. එහෙත් නත්තල වෙනුවෙන් මුළු දෙසැම්බර් මාසය පුරාම විදුලි බල්බ එල්ලා සැරසිලි කරන්නැයි රට පුරාම පොලිසිවලට අභ්‍යන්තර කටයුතු අමාත්‍යාංශය හරහා දැනුම්දී තිබිණි. එක්‌සත් ජාතික පක්‍ෂයට ඡන්දය දුන් බෞද්ධයෝ පවා සෝමහිමියන්ගේ හදිසි අභාවයත් සමග සිය පක්‍ෂය කෙරෙහි කළ කිරෙන්නට වූහ. එනිසාම 2004 මහ මැතිවරණයේදී ජාතික හෙළ උරුමයට ආසන 9 ක්‌ ලබා ගැනීමට හැකි විය. හෙළ උරුමයට ඡන්ද ලක්‍ෂ 05 ක්‌ ලැබුණු අතර එයින් ලක්‍ෂ 03 ක්‌ ම එක්‌සත් ජාතික පක්‍ෂයට හිතැති සිංහල බෞද්ධයන් ලබාදුන් ඡන්ද වේ. මේ බව එජාපයේ හිටපු සභාපතිවරයකුම ප්‍රකාශ කර තිබිණි. 2004 න් පසුව ජාතික හෙළ උරුමයේ දේශපාලන ක්‍රියාවලිය ගැන කථා කිරීමට දැන් අවශ්‍ය නැත. නමුත් සෝමහිමියන්ගේ අපවත්වීමත් සමග සිංහල කමට බෞද්ධකමට විශේෂ තැනක්‌ ලැබුණේ මේ ජාතිකවාදී ප්‍රබෝධයක්‌ ඇතිවූ නිසාය. එනිසාම 2005 නොවැම්බර් 17 වැනිදා මහින්ද රාජපක්‍ෂය බල යට ඒමට හැකිවිය. 2005 දී මෙරට සෑම සිංහල බෞද්ධ පුද්ගලයින් තිදෙනකුගෙන් දෙදෙනකු ඡන්දය ලබාදුන්නේ මහින්ද රාජපක්‍ෂටය.

මේ අතීතය අද නැවතත් සිහි කරන්නේ මන්ද? සෝමහිමි මතකයේ මෙන්ම ඒ හරහා ඇතිවූ ආගමික ප්‍රබෝධය බොහෝ දෙනා අමතක කර ඇති නිසාය. සෝමහිමි නිසා ඇතිවූ බෞද්ධ ප්‍රබෝධය හරහා රටේ නමගිය ධර්ම කථිකයින්වූ සමහර භික්‍ෂූන්ගේ අද ක්‍රියාකලාපය කෙසේද? සෝම හිමි මෙන්ම රූපවාහිනිය හරහා ධර්ම කථිකයන්වී අවසානයේ අද සිදුකර ඇත්තේ කුමක්‌ද? ෙථිරවාදයටත් ගරහමින් මෙරට සිංහල බෞද්ධ සංස්‌කෘතියටත් ගරහමින් "සමන්තභද්‍ර" වීම නොවේද? සෝම හිමියන් නිසා ඇතිවූ බෞද්ධ ප්‍රබෝධයෙන් පිම්බුණු මොවුහු අද බෞද්ධයින්ට වංචාකර නොමැතිද? බුදුන් වැඩසිටි කාලයේ ශාසන විරෝධීව හැසිරුණු ජබ්බග්ගිය පුනබ්බසුඛ භික්‍ෂුන්ගේ ක්‍රියාකලාපයන්ද අපට මේ වර්තමාන ශාසන විරෝධීන්ගේ ක්‍රියාවන් දෙස බලද්දී සිහිපත් වේ.

බුදු දහමේ අත්තිවාරම පරාර්ථ සේවයකි. දීපංකරාදී මූලයේදී සුමේධ තාපසගේ තමන්ට නිවන් සැප ලබාගැනීමට හැකියාව තිබුණද ලෝකයාගේ හිතසුව වෙනුවෙන් සේවය කිරීම සඳහා අධිෂ්ඨානකර මතු බුදු බව පැතූහ. සෑම බෞද්ධයකුටම තමන්ගේ නිවන් සැපය පවා අනුන් වෙනුවෙන් අත්හැරීමට ශක්‌තිය තිබිය යුතු බව මහාචාර්ය වල්පොල රාහුලහිමියන් විසින් රචිත භික්‍ෂුවගේ උරුමය ග්‍රන්ථයේ සඳහන් වේ. සෝම හිමියන්ද සැබවින්ම කැපවූයේ පරාර්ථ සේවය සඳහාය. මූලධර්මවාදී ආක්‍රමණයෙන් බෞද්ධයන් ගලවා ගැනීම සඳහාය. බෞද්ධයාට නිසි මග පෙන්වනු පිණිස සෝම හිමියෝ පැයක්‌ නොව පැය තුනක්‌ බණ දෙසූහ. වෙනදා මෙන් ඒ බණ අසන්නට පැමිණියේ මහලු උපාසිකාවන් පමණක්‌ නොවේ. තරුණ තරුණියෝ දහස්‌ ගණනින් සෝමහිමිගේ බණ අසන්නට පැමිණියහ. ඇත්තෙන්ම මෑත කාලයේ වඩාත් විවාදිත භික්‍ෂු දේශපාලන චරිතය වූයේ පූජ්‍ය ගංගොඩවිල සෝමහිමියන්ය. එනිසාම සෝම හිමියන්ගේ හදිසි අභාවය කුමන්ත්‍රණයක ප්‍රතිඵලයක්‌යෑයි රට පුරා ප්‍රචාරයවීමත් සමග බෞද්ධයෝ කලබල වූහ. එම නිසාම ජීවත් වූ සෝම හිමියන්ට වඩා අපවත්වූ සෝම හිමියන් ප්‍රබල විය. දශ ලක්‍ෂයකට අධික බෞද්ධයෝ සෝමහිමියන්ට අවසන් ගෞරවය දැක්‌වීම සඳහා පැමිණියහ. රට පුරා කහකොඩි එසැවිණි. ඒවා මහරගමට හෝ බම්බලපිටියට සීමාවූයේ නැත.

සෝම හිමි අපවත්වී වසර අටක්‌ ගතවන මේ මොහොතේ ජාතියේ වගකීම කුමක්‌ද? සෝම හිමි නිසා බලයටපැමිණි දේශපාලන බලවේගවලට මූලධර්මවාදීන්ගේ ආගමික ආක්‍රමණය නැවැත්විය හැකි පනත ගෙන ඒමට හැකිවූයේ නැත. එම පනත පාර්ලිමේන්තුවේ පුස්‌කයි. එයට වගකිව යුත්තෝ කවරහුද? එදා පැවැති බෞද්ධ ප්‍රබෝධය අද යම් පමණකට පසු බැස ඇත්ද? එම බෞද්ධ ප්‍රබෝධය යටගැසීමට කිසිවකුට ඉඩදිය යුතු නැත. මන්ද විවිධ කුමන්ත්‍රණකාරී ඉවැන්ජලිකල් බලවේග උත්සහ කරන්නේ මෙරට බෞද්ධ බලය විනාශ කිරීම සඳහාය. රාවතාවත්තේ ප්‍රේම් නිවස නම් ළමා නිවාසය ළමාරක්‌ෂණ අධිකාරිය මගින් හා පොලිසිය මගින් පසුගියදා වටලනු ලැබීය. මෙය කතෝලික පල්ලියේ බලවත් සිත්තැවුලට හේතුවක්‌ වී ඇත. කාදිනල් මැල්කම් රංජිත් බිෂොප්තුමා පවසන්නේ මේ හේතුව නිසා තමා රාජ්‍ය උත්සව වර්ජනය කරන බවයි.

මදර් තෙරේසා අනාථ නිවාසය ගැන කතෝලික පල්ලිය එතරම් කලබල වන්නේ ඇයි? එය ශ්‍රී ලංකා රාජ්‍යය සමග තරහවීමට හේතුවක්‌ද? මිහින්තලේ රජමහා විහාරාධිපති හිමියන් ළමා අපචාර චෝදනා මත අත්අඩංගුවට පත්වූ විට මහානායක හිමිවරු රාජ්‍ය උත්සව වර්ජනය කළේද? නැත. ප්‍රේම් නිවසේ සිද්ධිය බලෙන් යටපත් කිරීමට උවමනාව ඇත්තේ කාටද? මේවා ගැන කථා කරන්න නිසි බෞද්ධ නායකයෙක්‌ නැත. අද එදාට වඩා සෝම හිමියන්ගේ අඩුව හොඳින් දැනේ. මන්ද මිෂනාරී බලවේග වේගයෙන් කලඑළි බැස ඇති නිසාය.

යුතුකම සංවාද කවය

www.yuthukama.com ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. 
(Like us on facebook)

https://www.facebook.com/yuthukama

හමුදාව නිග්‍රහයට ලක්‌කිරීමේ "විග්නේෂ්වරන් උපාය"

උතුරු පළාත් මහ ඇමැතිවරයා යළිත් දෙබරයකට ගල් ගසා ඇත. නිරන්තරව විවාදාත්මක මෙන්ම ආන්දොaලනාත්මක ප්‍රකාශ සිදුකරන හිටපු ශ්‍රේෂ්ඨාධිකරණ විනිසුරුතුමා මෙවර තවත් මුසාවාදයක්‌ පතුරුවා ඇත. එනම් උතුරේ තරුණයන් අතර මත්ද්‍රව්‍ය භාවිතය ඉහළ ගොස්‌ ඇති බවත් මෙය ඉතා සූක්‍ෂම ලෙස ව්‍යාප්ත කර ඇති බවත් එයට වගකිව යුත්තේ අන්කවරකුවත් නොව රජයේ ආරක්‍ෂාක අංශ බවත් සී. වී. විග්නේෂ්වරන් ප්‍රකාශ කර තිබීම සැබවින්ම සැලකිල්ලට ගතයුතු කාරණයකි. නිරන්තරව උතුරෙන් හමුදාව ඉවත්විය යුතු බව පවසන මේ මහ ඇමැතිවරයා යළිත් මෙවැනි ප්‍රකාශ සිදුකරන්නේ හමුදාවට නිග්‍රහ කිරීමට බවට සැක නැත. උතුරු පළාතේ තරුණයන් අතර මත්ද්‍රව්‍ය භාවිතය ඇරඹෙන්නේ 2009 මැයි මාසයෙන් පසුව බව හෙතෙම කියයි. කොටි සංවිධානය ක්‍රියාත්මකවූ සමයේ උතුරු නැගෙනහිර පළාත්වල මත්ද්‍රව්‍ය ව්‍යාප්තියක්‌ නොතිබූ බව මේ වැදගත් විනිසුරුතුමා කියයි. ඇත්තෙන්ම යාපනය හමුදා පාලනයේ පවතින්නේ 1995 දෙසැම්බර් 05 වැනිදා සිටය.

රිවිරැස මෙහෙයුමෙන් පසුව යාපනයේ බලය හමුදාව අතට පත්වී දැන් වසර 20 කි. කුමන්ත්‍රණකාරී ලෙස දෙමළ තරුණයන් මළ මිනී බවට පත්කිරීමට උත්සාහයක්‌ ඇති බව විග්නේෂ්වරන් මහතා යාපනයේ පැවැති ක්‍රීඩා උත්සවයකදීත් ප්‍රකාශ කර තිබිණි. එහිදී ද වක්‍රව චෝදනා කර තිබුණේ ආරක්‍ෂක අංශවලටය. නමුත් දෙමළ තරුණයන්ට මත්ද්‍රව්‍ය බෙදා හැරීමට හමුදාවට ඇති උවමනාව කුමක්‌ද? කොටි සංවිධානය බලයේ පැවැති සමයේදී නම් මුහුදු කොටි මත්ද්‍රව්‍ය ප්‍රවාහනය කළා පමණක්‌ නොව ඒ ජාවාරම්කරුවන්ගෙන් කප්පම් ගත් බවද රහසක්‌ නොවේ. උතුරේ මත්ද්‍රව්‍ය ජාවාරම තදින් සිදුනොවූයේ කප්පම් ගෙවමින් මේ ව්‍යාපාරය කිරීමට අපහසු නිසයි.

ඇත්තෙන්ම 2009 න් පසුව දෙමළ ජනයාට නිදහස ලැබිණි. ඒ නිදහස නිසාම උතුරට පළාත් සභාවක්‌ පත්කර ගැනීමට අවස්‌ථාව උදාවිය. එහෙත් විග්නේෂ්වරන්ට අවශ්‍ය සියළු විපත් උදාවන්නේ 2009 පසුව බව කියන්නද? කොටි බෝම්බ පුපුරද්දී ෂෙල් වෙඩි පතිත වෙද්දී, මිනිස්‌ බෝම්බ පුපුරා යද්දී, මේ සියළු ෙ€දවාචක සමඟ ගෙවුණු කාලය හොඳ බව කීමද? මේ මහ ඇමැතිවරයා උත්සහ ගන්නේ. අපට නම් මෙය අදහාගත නොහැකිය. 2009 මැයි මාසයෙන් පසුව රටේ සෑම ප්‍රදේශයකම බලය ශ්‍රී ලංකා රාජ්‍ය සතුවිය. එක කොඩියකට එක නීතියකට රට නතු විය. එහෙත් විග්නේෂ්වරන් ප්‍රකාශ කරන්නේ කොටි කොඩිය යටතේ පැවැති කාලයේ උතුර මත්ද්‍රව්‍යවලින් නිදහස්‌ව සාමකාමීව තිබුණු බවයි. මේ ඊනියා මහඇමැතිට අවශ්‍ය නැවත කොටි පාලනයකට යන්නද?

ඇත්තෙන්ම උතුරු මහඇමැතිවරයා සිදුකරන මෙවැනි සාහසික ප්‍රකාශවලින් සිදුවන්නේ හමුදාව නිග්‍රහයට ලක්‌වීමය. මේ ප්‍රකාශ ජාත්‍යන්තරයටද යයි. එයින් සිදුවන්නේ කවරක්‌ද? යුද අපරාධ චෝදනා ඉදිරිපත් කිරීමට සූදානම්ව සිටින ජාත්‍යන්තර බලවේගයන්ට විශේෂයෙන්ම කොටි ඩයස්‌පෝරාවට තවත් අනුබලයක්‌ ලැබීම පමණි.

උතුරේ හමුදාව ඉවත් කිරීමට "සිරිසේන - වික්‍රමසිංහ" නව ආණ්‌ඩුවද සූදානම් නොවන නිසා හමුදාව නිග්‍රහයට ලක්‌කිරීමේ තවත් උපාය මාර්ගයක්‌ විග්නේෂ්වරන් අරඹා ඇත. මෙය විග්නේෂ්වරන්ගේ පමණක්‌ නොව දෙමළ සන්ධානයේද ප්‍රධාන දේශපාලන උපක්‍රමයකි.

'විද්‍යා' පාසල් සිසුවියගේ ඝාතන පුවත රටේම ආන්දොaලනයට ලක්‌වූ බව අමුතුවෙන් කිවයුතු නැත. මේ සම්බන්ධව පැවැති රූපවාහිනි වැඩසටහනකදී ළමා කටයුතු නියෝජ්‍ය ඇමතිනි විජයකලා මහේෂ්වරම් මහත්මිය ප්‍රකාශ කළේ කුමක්‌ද? කොටි පාලනය පැවැති සමයේ කාන්තාවන්ගේ ආරක්‍ෂාව වඩා සුරක්‍ෂිතව පැවැති බවයි. එමෙන්ම රාත්‍රි 12 ට පවා කිසිදු හිරිහැරයකින් තොරව කාන්තාවන්ට නිවසින් එළියට බැසීමට හැකියාවක්‌ තිබුණ බව ඇය ප්‍රකාශකර සිටියාය. මේ අවස්‌ථාවේදී එම වැඩසටහන මෙහෙයවූ නිවේදකයා විජයකලා මහත්මියගෙන් කොටි සංවිධානය ළමුන් පැහැරගෙන ගොස්‌ ළමා බළකා සෑදීම ගැන ප්‍රශ්න කිරීමේදී ඇය අපූරු උත්තරයක්‌ දුන්නාය. ඇය කීවේ ඒ අය කැමැත්තෙන් මේවාට සහභාගි වූ බවයි. ඒ අවස්‌ථාවේදී මෙම වැඩසටහනට සහභාගිවූ ළමා කටයුතු රාජ්‍ය ඇමැතිනි රෝසි සේනානායකද තම නියෝජ්‍ය ඇමැතිනියගේ ප්‍රකාශයෙන් අපහසුතාවට පත්වූ බව පෙනිනි.

විග්නේෂ්වරම් මෙන්ම විජයකලාද එකම මානසික මෙහෙයුමක නිරතවන බව පැහැදිලිය. 'විද්‍යා' දැරිය දෙමළ ජාතියකුගේම අතින් දූෂණය වී ඝාතනය වුවත් අපවාදයට ලක්‌කෙරෙන්නේ ආරක්‍ෂක හමුදාවයි. හදිසියේ හෝ මෙයට සෙබළෙක්‌ සම්බන්ධ වූවානම් කවර තත්ත්වයක්‌ උදාවෙයිද? එහෙත් අපේ ආරක්‍ෂක අංශ කටයුතු කරනු ලබන්නේ විනයානු කූලවය. 2009 න් පසුව උතුරු නැගෙනහිර පළාත්වල සේවය කරන ආරක්‍ෂක අංශ සාමාජිකයන්ට ස්‌ත්‍රී දූෂණ චෝදනා එල්ලවුණේ නැත. විග්නේෂ්වරම්ලා දුක්‌ වන්නේ එවැනි චෝදනාවක්‌ නැගීමට අවස්‌ථාවක්‌ නොලැබෙන නිසාය. එනිසා මත්කුඩු වලින් හමුදාවට දමා ගසයි.

උතුරු මහ ඇමැතිවරයා මත්කුඩුවලින් හමුදාවට දමා ගසනවිට අන්තරායකර ඖෂධ පාලක මණ්‌ඩලයේ සභාපති නිලංග සමරසිංහ මහතා ප්‍රකාශ කරන්නේ විග්නේෂ්වරන්ගේ ප්‍රකාශයට කිසිම පදනමක්‌ නොමැති බවයි. යාපනය මත්ද්‍රව්‍ය පැතිරීම ඉතාම අඩුම ප්‍රදේශයක්‌ බව සමරසිංහ මහතා ප්‍රකාශ කරයි. මෙරට කුඩු ගෙන එන ප්‍රධාන මත්ද්‍රව්‍ය ජාවාරම්කරුවන් 17 දෙනෙක්‌ හඳුනාගෙන ඇති බවත් එයින් 07 දෙනෙක්‌ම දෙමළ ජාතිකයන් බවත් උතුරේ දෙමළ තරුණයින්ට කුඩු විකුණුවේ දෙමළ ජාවාරම්කරුවන් මිස අන් අය නොවන බව සමරසිංහ මහතා අවධාරණය කරයි.අන්තරායකර ඖෂධ පාලක මණ්‌ඩලයට උතුරේ මත්ද්‍රව්‍ය බෙදාහැරීම පිළිබඳව හමුදාවට චෝදනා එල්ල කරමින් කිසිම අයෙකු මෙතෙක්‌ පැමිණිලි කර නැති බවත් සමරසිංහ මහතා පවසයි. එහෙත් විග්නේෂ්වරන් නම් මේ කරුණු පිළිගන්නේද යන්න ප්‍රශ්නයකි. ඉකුත් 08 වැනිදා උතුරේ මත්ද්‍රව්‍ය පැතිරීම පාලනය පිළිබඳව අන්තරායකර ඖෂධ පාලක මණ්‌ඩලයේ රැස්‌වීමක්‌ පැවැති අතර එයට උතුරු මහ ඇමැති මෙන්ම අමාත්‍ය ජෝන් අමරතුංගද සහභාගි විය. වෛද්‍ය සමරසිංහ මහතා විග්නේෂ්වරන් අසලම සිට අදහස්‌ දක්‌වමින් මේ ව්‍යාජ චෝදනා ප්‍රතික්‍ෂේප කිරීම අගය කළ යුතුය. ඖෂධ පාලක මණ්‌ඩලය මේ ව්‍යාජ තර්ක ප්‍රතික්‍ෂේප කළද විග්නේෂ්වරන් නම් සිය චෝදනා හකුලාගනීද යන්න පැහැදිලි නැත. ඔහුට අවශ්‍ය හමුදාවට මඩ ප්‍රහාර එල්ල කර සිංහල විරෝධී මතයක්‌ උතුරු නැගෙනහිර පළාත්වල ඇති කිරීමටය. එය කොටි හිතවාදී බලවේගවල මෙන්ම දෙමළ ඩයස්‌පෝරාවේද සතුටට හේතුවනු ඇත. එක්‌ අතකින් දෙමළ තරුණයන් මත්ද්‍රව්‍යවලින් බේරා ගැනීමට විග්නේෂ්වරන් මහතා තුළ ඇති උනන්දුව සිංහල දේශපාලකයන්ට නැතිවීම කනගාටුවට කරුණකි. එහෙත් මේ මහ ඇමැතිවරයා මත්ද්‍රව්‍ය චෝදනා නගමින් ආරක්‍ෂක අංශවලට මඩ ගැසීම කිසිසේත්ම අනුමත කළ නොහැක.

චතුර පමුණුව

-දිවයින

ගල්ලෙන බිඳ ලෙන්දොරින් පහළට ඇද වැටීම

පූජ්‍ය ගංගොඩවිල සෝම හිමියන් අපවත් වී වසර 11 ක්‌ සපිරුණේ ඉකුත් 12 වැනිදාය. ගෙවුණු වසර 11 තුළදී රටේ පැහැදිලි දේශපාලන ආර්ථික හා සමාජමය පරිවර්තනයක්‌ සිදුවිය. සෝම හිමියන්ගේ අභාවයෙන් පසු පිබිදුණු බෞද්ධ බලවේගය, මෙරට දේශපාලන ව්‍යාපෘතිය පෙඩරල්වාදයෙන් ජාතිකවාදයට ගෙනයැමට සමත් විය. සුදු නෙලුම වෙනුවට ත්‍රස්‌ත මර්දනය සඳහා අවශ්‍ය සමාජ බලවේගයක්‌ බිහිවිය. 2004 අප්‍රේල් 04 වැනිදා පැවැති මහ මැතිවරණයේදී ජාතික හෙළ උරුමයට ඡන්ද 552724 ලැබී භික්‍ෂුන් නව දෙනකුට පාර්ලිමේන්තු යැමට හැකිවන්නේද මේ බෞද්ධ පිබිදීමට දේශපාලන වටිනාකමක්‌, අගයක්‌ ලැබුණු නිසාවෙනි. 2005 නොවැම්බර් 17 වැනිදා මහින්ද රාජපක්‍ෂ බලයට පැමිණීම සඳහා තීරක බලවේගය වූවේද ජාතික හෙළ උරුමය බව ප්‍රකට කරුණකි. මහින්දට බලයට ඒමට හැකිවුණේ සිංහල බෞද්ධ ඡන්දවලිනි. ප්‍රභාකරන් උතුරේ ඡන්ද වර්ජනය කිරීමටදුන් අණ මාරාන්තික ප්‍රහාරයක්‌ වූයේ එජාප නායකයාට මිස සන්ධාන අපේක්‍ෂකයාට නොවේ.

2004 පෙබරවාරි 17 වැනිදා ජාතික හෙළ උරුමය බිහිවිය. එහිදී හක්‌ගෙඩිය ලකුණින් දිවයින පුරාම මහ මැතිවරණය වෙනුවෙන් භික්‍ෂුන්වහන්සේලා ඉදිරිපත් කිරීමට එකඟතාවය පළවිය. ඊට පසුදින එනම් පෙබරවාරි 18 වැනිදා උඩුවේ ධම්මාලෝක හිමියන් එවක වැඩි සිටි අසපුවේදී පුවත්පත් සාකච්ඡාවක්‌ පැවැත්විණි. බෞද්ධයාගේ අයිතිවාසිකම් ආරක්‍ෂා කර ගැනීම වෙනුවෙන් තමන් මැතිවරණයට පිවිසි බව මෙහිදී පූජ්‍ය උඩුවේ ධම්මාලෝක හිමියෝ ප්‍රකාශ කර සිටියහ. එම පුවත්පත් සාකච්ඡාව වාර්තා කිරීම සඳහා මේ ලියුම්කරුද සහභාගිව සිටියේය. දැන් හෙළ උරුමය වසර දහයක්‌ පැරණි පක්‍ෂයකි. ගෙවුණු වසර දහය තුළ නොයෙකුත් හැලහැප්පීම් මැද්දේ යම් දේශපාලන ගමනක්‌ ගියද අද මේ පක්‍ෂයට සිදුව ඇත්තේ කුමක්‌ද? හංසයා සරණාගතව නිසා මේ බෞද්ධ පක්‍ෂය දෙදරීමකට පත්ව ඇති බවනම් පැහැදිලිය.

ඉකුත් නොවැම්බර් 16 වැනිදා දිවයින පුවත්පතට "හෙළ උරුමය දැලි පිහියෙන් කිරිකෑම" යනුවෙන් ලිපියක්‌ ලියා පළකරනු ලැබුවේද නොබෝ දිනකින්ම හෙළ උරුමය පුපුරායැමට ඉඩ ඇති බව ඉවෙන් දැනුණු නිසාය. 2004 අප්‍රේල් මාසයේදී මැතිවරණ ජයග්‍රහණයෙන් පසුව "හෙළ උරුමය ලද ජය බෞද්ධයන් රවටන නායකයන්ට දුන් පිළිතුරකි" මැයෙන් ලිපියක්‌ පළ කළෙමු. එහෙත් දැන් එවැන්නක්‌ පළ කිරීමට නොහැකිය. ඕනෑම දේශපාලන පක්‍ෂයක්‌ තුළ විවිධ මත ගැටුම් පවතී. පක්‍ෂ හැරයැම් ඉතා සුලභය. 2004 දී හෙළ උරුමයට පත් වූ භික්‍ෂුන් මෙන්ම ගිහියන්ද පක්‍ෂය හැරගොස්‌ ඇත. නමුත් එයට තිබුණු සමාජ වටිනාකමේ විශාල නායයැමක්‌ දක්‌නට ලැබුණේ නැත. සැබවින්ම මෙරට මධ්‍යම පාන්තික සිංහල බෞද්ධ ජනතාව තුළ හෙළ උරුම මතයට විශාල ගෞරවයක්‌ තිබිණි. නමුත් වර්තමානයේ සිදුවන්නේ කුමක්‌ද?

හෙළ උරුමය ආරම්භ කිරීමට මූලික වූයේ විධායක ජනපති ක්‍රමය අහෝසි කිරීමට නම් නොවේ. බෞද්ධ අයිතිවාසිකම් රැකගැනීමටය. 2004 දී පිවිතුරු හෙටක්‌ ගැන අප අසා තිබුණේ නැත. ව්‍යවස්‌ථා වෙනස්‌කම් වලින් බෞද්ධයන්ට සාධාරණය ඉටුකළ හැකිද? බෞද්ධයන් අන්‍යාගමට හැරවීමට එරෙහිව ගෙනා පනතට ස්‌වාභාවික මරණයක්‌ අත්වන්නට ඉඩදුන් හෙළ උරුම නායකයෝ "පිවිතුරු හෙටක්‌ ප්‍රතිපත්ති" ක්‍රියාත්මක කිරීමට මහින්ද රාජපක්‍ෂ ක්‍රියා නොකරන්නේ යෑයි කියමින් සන්ධාන රජයෙන් ඉවත් විය. මෙය සාමාන්‍ය හෙළ උරුම පාක්‍ෂිකයා අන්දමන්ද කරන්නක්‌ විය. ඔවුහු වික්‍ෂිප්ත වූහ.

මහින්ද රාජපක්‍ෂ රජය කඩා බිඳගෙන පැමිණි හෙළ උරුම නායකයෝ ප්‍රකාශ කළේ තමන් ගල්ලෙන බිඳ පැමිණි බවයි. හෙළ උරුම නායකකාරකාදීන්ට සිංහයා සමඟ ප්‍රශ්නයක්‌ තිබුණද සාමාන්‍ය පාක්‍ෂිකයාට සිංහයා සමඟ වෛරයක්‌ තිබුණේ නැත. එනිසා ඔවුහු උභතෝකෝටිකයකට පත්වූහ. දැන් ගල්ලෙන බිඳ හෙළ උරුමය ඇතුළු වී ඇත්තේ කොටි, නරි, හිවලුන් වෙසෙනා ලෙනකට බව කිවහොත් නිවැරදිය. මහින්ද රාජපක්‍ෂ ආණ්‌ඩුවේ වැරදි ඇති බව පැහැදිළිය. එහෙත් ඒ වැරදි මත "මහින්ද" එලවා දමා කවරකු පත් කරන්නේද? චන්ද්‍රිකා, රනිල්, වික්‍රමබාහු, මනෝ ගනේෂන්, අසාද් සාලි ඇතුළු කිසිවිටක එකිනෙකට නොපෑහෙන බලවේග සමඟ කටයුතු කරමින් මෛත්‍රී පාලනයක්‌ ඇතිකළ හැකිද? බෞද්ධයන් රවටනු ලැබුවේ කවරකු විසින්ද? 2015 ජනාධිපතිවරණය ප්‍රකාශයට පත්කිරීමත් සමඟ ශ්‍රී ල.නි.ප. මහලේකම්වරයා තම පක්‍ෂයේ සභාපතිට එරෙහිව පොදු අපේක්‍ෂකයා ලෙස තරගයට පිවිසියේය. එවිට එජාප මහලේකම්වරයා මේ පොදු අපේක්‍ෂකයාගේ හටන සුබ නැති බව හොඳින්ම අවබෝධකරගෙන ජනාධිපති මහින්දගේ ජය තහවුරු කිරීමට පැති මාරු කළේය. රටේ ප්‍රධාන පක්‍ෂ දෙක දෙදරා ගියා සේම ජාතික හෙළ උරුමයද දෙදරා ගියේය. හෙළ උරුම නියෝජ්‍ය ලේකම් හිටපු අමාත්‍ය උදය ගම්මන්පිල මහතා යළිත් ජනාධිපතිවරයාට සහය දීමට ඉදිරිපත් වූයේ මේ අශුද්ධ සන්ධානය තුළ තමන්ට කටයුතු කළ නොහැකි බව පවසමිනි. පාක්‍ෂිකයන් අතර ජනප්‍රිය නායකයකු වූ ගම්මන්පිල මහතා ආපසු හැරී යැම මගින් 2004 දී ආරම්භ කළ පක්‍ෂය එතෙක්‌ මෙතෙක්‌ අත්දුටු දැවැන්තම දෙදරීම සිදුවිය.

ගල්ලෙන බිඳ පැමිණි හෙළ උරුමය අද ගල්ලෙනෙන් පහළට ඇදවැටී ඇතැයි කියන්නේ කනගාටුවෙනි. බෞද්ධ මතය වෙනුවට පිවිතුරු හෙටක්‌ ඉදිරියට පැමිණීම නිසා බලාපොරොත්තු වූ පරිදිම හෙළ උරුමය දෙදරා ගොස්‌ ඇත. හෙළ උරුමයට ඡන්දය දුන් කිසිවෙකු යහපාලනයක්‌ ගැන විශේෂ උනන්දුවක්‌ දැක්‌වූයේ නැත. යහපාලනය ගැන කථාකරන්නේ රාජ්‍ය නොවන සංවිධාන මෙන්ම බටහිර බලවේග බව අමුතුවෙන් කිව යුතු නැත. පූජ්‍ය අතුරලියේ රතන හිමියන් යහපාලනය ගැන කථාකරමින් රාජපක්‍ෂ ජනාධිපතිවරයා එළවා දමන බවට මහ හඬින් ප්‍රකාශ කිරීම සාමාන්‍ය හෙළ උරුම පාක්‍ෂිකයන්ගේ සතුටට නම් හේතුවූයේ නැත. උදය ගම්මන්පිල සමඟ හෙළ උරුමය මන්ත්‍රීවරු කණ්‌ඩායමක්‌ද නැවත ගල්ලෙන බිඳගෙන සන්ධානයට ගියේද පිවිතුරු හෙටක්‌ ප්‍රතිපත්තියට වඩා සුපුරුදු මහින්ද චින්තනය හොඳ යෑයි හැඟුණු නිසාය. නායකකාරකාදීන් කවරක්‌ කීවද සාමාන්‍ය හෙළ උරුම පාක්‍ෂකයා පොදු අපේක්‍ෂකයා කෙරෙහි යහපත් ප්‍රතිචාරයක්‌ දක්‌වයිද යන්න පැහැදිළි නැත. 2004 වසරේ සිට හෙළ උරුමයේ දේශපාලන ගමනේ හොඳ නරක ගැන ලිපි රැසක්‌ මා අතින් සටහන්ව ඇත. නමුත් මේ දෙදරා යැමත් සමඟ මේ සමාජ බලවේගයේ ගමන කොතැනටද? සැබවින්ම සිදුවූයේ ගල්ලෙන බිඳ ලෙන්දොරින් පහලට ඇදවැටීම නොවේද?

-චතුර පමුණුව

දිවයින

යුතුකම සංවාද කවය

www.yuthukama.com

එළාරගේ පරාජය සිහිපත් කරන ජාතිය ප්‍රභාකරන්ගේ පරාජය අමතක කරයි!

ලිබියානු නායක මුහමර් අල් ගඩාෆි විපක්‍ෂ කැරලිකරුවන් විසින් අල්ලාගනු ලැබුවේ 2011 ඔක්‌තෝබර් 21 වැනිදාය. පුරා වසර 42 ක්‌ ලිබියාව පාලනය කළ ගඩාෆි අවසානයේ කැරලිකරුවන්ට හසුවුණේ බෝක්‌කුවක්‌ යට සැඟවී සිටියදීය. තමා බලය හොබවන කාලයේදී හෙතෙම සිය විරුද්ධවාදීන් හඳුන්වා දෙනු ලැබුවේ මීයන් ලෙසය. බටහිර ලෝකය ලිබියානු නායකයාගේ මරණය අසා අත්පුඩි තලන්නට විය. ලිබියානු නායකයාගේ මරණයෙන් පසු ලිබියාවට ප්‍රජාතන්ත්‍රවාදයත් යහපාලනයත් ලැබී එරට ජනී ජනයා සාමයෙන් උනුන් වැළඳ සිනහසෙමින් ජීවත්වනු ඇතැයි බටහිර ලෝකයත් ඇමරිකාවත් බලාපොරොත්තු විය. එහෙත් දන්නා යකා පලවා හැර නොදන්නා යක්‍ෂයන් දුසිම් ගණනක්‌ කැඳවා ගැනීම නිසා අද ලිබියාවට සිදුව ඇත්තේ කුමක්‌ද? සම්පූර්ණ අරාජික අසාර්ථක රටක්‌ බවට පත්වීම නොවේද? ලංකාවේ යහපාලනය ගැන කතා කරන ගිහි පැවිදි සියලු දෙනාටමත් මෙය ඉතා හොඳ පාඩමකි. අප්‍රිකානු කලාපයේ ඉතාම හොඳම ජීවන මට්‌ටම පැවැතියේ ලිබියානු රාජ්‍යය තුළය. නමුත් අද එරටට ගුවන්යානයක්‌ ගොඩබැස්‌සවීමට බැරි තත්ත්වයක්‌ උදාවී ඇත. ලිබියාව කෑලි කෑලිවලට කැඩී ගොස්‌ අවිගත් මුස්‌ලිම් අන්තවාදි කණ්‌ඩායම් තම ගෝත්‍රයට අයත් ප්‍රදේශ පාලනය කිරීමට පටන්ගෙන තිබේ. පාර්ලිමේන්තු ප්‍රජාතන්ත්‍රවාදය නමට පමණකි. එසේ නම් අදත් ගඩාෆි ජීවත්ව සිටියානම් ලිබියාව තවමත් සාමකාමීය. ඊනියා යහපාලනය වෙනුවෙන් ලිබියානු වැසියෝ දිවිදෙති.

යහපාලනය යනු රටක්‌ අස්‌ථාවර කිරීමට යොදාගන්නා උපකරණයක්‌ දැයි අපට සැක සිතේ. 2015 ජනාධිපතිවරණයට ඇත්තේ තව දින 25 ක්‌ පමණි. ජනාධිපතිවරණය ප්‍රකාශයට පත්කිරීමට පෙර සිටම අතුරලියේ රතන හිමියෝ යහපාලනය ගැන කතා කළහ. නමුත් එය සාමාන්‍ය මහජනතාවගේ අවශ්‍යතාවක්‌ හෝ උවමනාවක්‌ වූයේ නැත. කොළඹ කේන්ද්‍රීය කරගත් රාජ්‍ය නොවන සංවිධානවලට නම් මහින්ද රාජපක්‍ෂ රජය ගැනත් එහි ක්‍රියාකාරිත්වය හා යහපාලනය ගැනත් ප්‍රශ්නයක්‌ පැවතිණි. පූජ්‍ය ගංගොඩවිල සෝම හිමියන් එදා පුරා පැය තුනක්‌ බණ දේශනා පවත්වත්දී යහපාලනය ගැන කතා කළ බවක්‌ අපට නම් මතක නැත. සෝම හිමියන් අපවත්වී වසර 11 ක්‌ ගෙවුණේ ඉකුත් සිකුරාදාය. එදා උන්වහන්සේගේ අභාවයෙන් ඇතිවූ බෞද්ධ ප්‍රබෝධය නිසා මන්ත්‍රීකම් දිනා ගත් භික්‍ෂුන් මෙන්ම ගිහියන්ද සෝම හිමි පැතූ බෞද්ධ රාජ්‍ය අමතක කර පිවිතුරු හෙටක්‌ ගැන කතා කරති. මෙය සැබැවින්ම බරපතළ වංචාවකි. එදා 2003 දෙසැම්බර් 24 වැනිදා පූජ්‍ය ගංගොඩවිල සෝම හිමියන්ගේ ආදාහන උත්සවය පැවැත්විණි. ඒ ආදාහන උත්සවයට පෙර දින රූපවාහිනිය ඔස්‌සේ හිටපු ජනාධිපතිනිය ප්‍රකාශ කර සිටියේ සෝම හිමියන්ගේ ආදාහන උත්සවයෙන් පසු කවරකු හෝ අන්‍යාගමිකයන්ට පහර දුනහොත් දැඩි දඬුවම් දෙන බවය. එසේම සෝම හිමියන්ගේ ආදාහනය සිදුවී අවසානයේ නිවෙස්‌ බලා යමින් සිටි බෞද්ධයන්ටද කඳුළු ගෑස්‌ ප්‍රහාර එල්ල කරනු ලැබීය. එවක පොලිසිය භාර සිටියේ අන්කවරකුවත් නොව හිටපු ජනාධිපතිනියයි. ඒ කාලයේ එක්‌සත් ජාතික පක්‍ෂය බලයේ සිටියද ආරක්‍ෂක අමාත්‍යාංශය ජනාධිපතිනිය යටතට ගෙන තිබිණි. එදා බෞද්ධයන්ට කඳුළු ගෑස්‌ ප්‍රහාර එල්ල කළ පිරිස්‌ සමඟ පිවිතුරු හෙටක්‌ සාදන්නේ කෙසේද යන්නත් අපට නම් ප්‍රශ්නයකි. "බුදු හිමියන්ටත් කලි යුගයේ දෙවියන්ගේ පිහිටයි" යන ගීත පාඨය සිහිවන්නේ මෙවැනි අවස්‌ථාවලදීය.

විරුද්ධ පක්‍ෂ කණ්‌ඩායම්වලට යහපාලනය මෙන්ම විධායක ජනපතික්‍රමය මතක්‌ වූයේ ජනපති මහින්ද රාජපක්‍ෂ පාලනය පෙරළා ගැනීමට කිසිම සටන් පාඨයක්‌ නොවූ විටය. යහපාලනය වෙනුවෙන් අරාබි වසන්තය ඇරඹුනේ 2010 දෙසැම්බර් මාසයේදීය. මුලින්ම ටියුනීසියාවේ ජනපති බෙන්අලි පලවා හැරීය. පසුව අරාබි වසන්තය ඊජිප්තුවට, ලිබියාවට, යේමනයට පැතිරී සිරියාවේ කැරැල්ල ආරම්භ විය. අරාබි වසන්තයට පින්සිදුවන්නට සිරියානු වැසියන් ලක්‍ෂ දෙකක්‌ ඝාතනය වී අවසානය. දැන් යහපාලනය වෙනුවෙන් සිරියානු වැසියෝ දිවි දෙති. අරාබි වසන්තයේ එක්‌ සුජාත දරුවෙක්‌ ලෙස සුන්නි වහාබ්වාදි අයි.එස්‌.අයි.එස්‌. යක්‍ෂයාද බිහිවිය. ජනාධිපතිවරණ වේදිකාවල යහපාලනය පවුල්වාදය ගැන වෛරී ප්‍රකාශ නිකුත් කරන කිසිවෙක්‌ ප්‍රජාතන්ත්‍රවාදය වෙනුවෙන් සිදුවූ ඊනියා අරාබි වසන්තය හරහා මියගිය ලක්‍ෂ ගණනක්‌ දෙනා ගැන කතා කරන්නේ නැත.

අරාබි වසන්තය පිළිබඳව බටහිර ලෝකය බෙහෙවින් සතුටු වූවා සේම මෙවර ජනාධිපතිවරණයේ දී රාජපක්‍ෂ ජනාධිපතිවරයා පරාජය වනු දැකීම සියලු විදේශ බලවේගවල ඒකායන ප්‍රාර්ථනය බව අමුතුවෙන් කිවයුතු නැත. International Crisis Group නමැති සංවිධානය ඉකුත් 09 වැනිදා මෙරට ජනාධිපතිවරණ ගැන නිවේදනයක්‌ නිකුත් කර ඇත. එහි සඳහන් වන්නේ මුස්‌ලිම් ඡන්ද වැලැක්‌වීම සඳහා බොදුබල සේනාව ක්‍රියා කිරීමට ඉඩ ඇති බවයි. එසේම මෛත්‍රීපාල සිරිසේන මහතා ජයග්‍රහණය කළහොත් එම ආණ්‌ඩුව අස්‌ථාවර කිරීමටද බොදුබල සේනාව ක්‍රියාකිරීමට ඉඩ ඇති බවය. එසේ නම් විදේශීය බලවේගවල අවශ්‍යතාව කුමක්‌ දැයි පැහැදිලිය. කවර බලවේග ක්‍රියාත්මක වුවද රටේ ජනතාව අකෘතඥවනු ඇතැයි අප විශ්වාස කරන්නේ නැත. වසර දෙදහසකට පෙර දුටුගැමුණු රජු විසින් එළාර රජු පරාජය කර යළි රට එක්‌සේසත් කිරීම ගැන අප නැවත නැවතත් සිහිකරමු. එලෙසම ජනාධිපතිවරයා මීට වසර 5 කට පෙර ප්‍රභාකරන් ඇතුළු කොටි ත්‍රස්‌තනඩය සහමුලින්ම වනසා රට මුදා ගැනීම මෙතරම් ඉක්‌මනින් අමතක කිරීම සුදුසුද? එනිසාම සිංහල බෞද්ධයා කිසිවිටක අකෘතඥයකු විය යුතු නැත. ජනතාවට අවශ්‍ය තීන්දුව ඔවුන් විසින් ගනු ඇත. නමුත් අරාබි වසන්තය මෙරටට කැඳවන අමන තීරණ ගත යුතු නැත. මීට වසර පහකට පෙර රට තිබුණු අයුරු අමතක කිරීම කිසි ලෙසකින්වත් කළ යුතු නැත.

 

-චතුර පමුණුව

[දිවයින]

යුතුකම සංවාද කවය

www.yuthukama.com

කල්මුණේ දිස්‌ත්‍රික්‌ක යෝජනාව හා චෞද්රිගේ නසරිස්‌තානය

චෞද්රි රහමන් අලි මුස්‌ලිම්වරුන් වෙනුවෙන් පකිස්‌තානය නිර්මාණය කළ යුතුයෑයි මුලින්ම ප්‍රකාශ කළ පුද්ගලයාය. පකිස්‌තානය යන නම නිර්මාණය කළේත් මොහුය. එමෙන්ම ඉන්දියාව පුරාම මුස්‌ලිම් රාජ්‍ය ඇතිකළ යුතුය යන මතයේ දැඩිව සිටි පුද්ගලයකු වන මොහු ශ්‍රී ලංකාවේද මුස්‌ලිම් රාජ්‍ය දෙකක්‌ බිහිකළ යුතුයෑයි ප්‍රකාශ කළේය. ශ්‍රී ලංකාවේ බටහිර ප්‍රදේශයේ සපරිස්‌තානය නම් වෙනම මුස්‌ලිම් රාජ්‍යයක්‌ද නැගෙනහිර ප්‍රදේශයේ නසරිස්‌තානය නමින් වෙනම රාජ්‍යයක්‌ද ඇතිකළ යුතු බව චෞද්රි ප්‍රකාශ කළේය. කේම්බ්‍රිඡ් විශ්වවිද්‍යාලයේ අධ්‍යාපනය හැදැරූ චෞද්රි බෙංගාලයේ මුස්‌ලිම්වරුන් වෙනුවෙන් බංගිස්‌තාන නම් වෙනම රටක්‌ද රාජස්‌තානයේ මුයිනිස්‌ථාන් නමින් තවත් මුස්‌ලිම් රාජ්‍යයක්‌ද කේරළයේ මැප්ලිස්‌තාන් නම් තවත් රාජ්‍යයක්‌ද ඇතිකළ යුතු බව ප්‍රකාශ කළේය. මොහු මේ අදහස ප්‍රකාශ කළේ 1933 දී පකිස්‌තානයේ ප්‍රකාශනය මගිනි. එය  Now or Never; Are We to Live or Perish Forever? නමින් ද මෙම ප්‍රකාශය නිකුත් විය. චෞද්රි රහමන් අලි පිළිබඳව විකිපීඩියා වෙබ් අඩවියේ තොරතුරු සටහන්ව ඇති අතර ඔහු දකුණු ආසියානු කලාපය පුරා ඇති කිරීමට යෝජනා කළ මුස්‌ලිම් රාජ්‍යවල සිතියමද එහි දක්‌වා ඇත. හින්දුන් සමඟ සහයෝගීව ක්‍රියා කිරීමට චෞද්රි තුළ කිසිම අදහසක්‌ නොතිබුණු අතර මොහොමඩ් අලි ජින්නා පවා මොහුගේ අදහස්‌ පිළිගැනීමට මුලින් එකඟ වී නැත.

ඇත්තෙන්ම අපට හදිසියේ මේ මුස්‌ලිම් ජාතිකවාදියා ගැන සොයන්නට සිත්වුණේ මන්ද? ඒ අන් කිසිවක්‌ නිසා නොව ශ්‍රී ලංකා මුස්‌ලිම් කොංග්‍රසය නැගෙනහිර පළාතේ වෙනම මුස්‌ලිම් දිස්‌ත්‍රික්‌කයක්‌ ඇති කළ යුතු බවට කරන යෝජනාව නිසාය. කොංග්‍රසයට අවශ්‍ය කුමක්‌ද? චෞද්රි 1933 දී ප්‍රකාශයට පත්කළ නසරිස්‌තානය නමැති සිහින රාජ්‍යයට මූලික පදනම සකස්‌ කර ගැනීමය. ඇත්තෙන්ම මෙයට ඉඩදිය යුතුද? කිසිසේත්ම නැහැ. එසේ ඉඩදුනහොත් බේරුවල ද වෙනම මුස්‌ලිම් දිස්‌ත්‍රික්‌කයක්‌ ඇති කළ යුතුයෑයි යෝජනා කරනු ඇත. කල්මුණේ වෙරළාසන්න බල ප්‍රදේශයේ වෙනම පරිපාලන දිස්‌ත්‍රික්‌කයක්‌ ප්‍රකාශයට පත්කළ යුතු යෑයි යෝජනාවක්‌ ඉකුත් ඔක්‌තෝබර් 23 වැනිදා කල්මුණේ මහනගර සභාවේදී වැඩි ඡන්දයෙන් සම්මත වී ඇත. මෙම යෝජනාව ඉදිරිපත් කර ඇත්තේ මුස්‌ලිම් කොංග්‍රසය මගිනි. කල්මුණේ මහ නගර සභාවේ නගරාධිපති නිසාම් කාරියප්පර් ප්‍රකාශ කරන්නේ අම්පාර දිස්‌ත්‍රික්‌ ලේකම් කාර්යාලයට යන මුස්‌ලිම් ජනතාවට භාෂාව සම්බන්ධ ගැටලු ඇතිවන නිසා වෙනම දිස්‌ත්‍රික්‌කයක්‌ ඇතිකිරීම වඩාත් යෝග්‍ය බවය. ඇත්තෙන්ම භාෂාවට වඩා ඇත්තේ වෙනත් අරමුණකි. මේ දිස්‌ත්‍රික්‌කයේ ශරියා නීතිය ක්‍රියාත්මක කිරීමටද මුස්‌ලිම් කොංග්‍රසය ක්‍රියාකරනු ඇත. එහෙනම් කල්මුණේ දිස්‌ත්‍රික්‌ යෝජනාවට දෙමළ ජාතික සන්ධානය තරයේ විරුද්ධව අදහස්‌ දක්‌වා ඇති අතර නගර සභාවේදී මෙයට විරුද්ධව ඡන්දය ලබාදී තිබේ. ඇත්තෙන්ම අම්පාර දිස්‌ත්‍රික්‌ ලේකම් කාර්යාලයට යන දෙමළ ජාතිකයන්ට භාෂා ගැටලු ඇතිවන්නේ නැද්ද. අනිවාර්යයෙන්ම ගැටලු ඇතිවේ. එසේනම් ඔවුන් මේ යෝජනාවට පක්‍ෂව ඡන්දය දිය යුතුව තිබිණි. නමුත් මේ මුස්‌ලිම් දිස්‌ත්‍රික්‌කය තුළ හින්දුන්ට කතෝලිකයන්ට "අබසරණ" වන නිසා දෙමළ ජාතික සන්ධානය මෙයට විරුද්ධ විය. උතුර නැගෙනහිර එක්‌කළ යුතුයෑයි කියන දෙමළ සන්ධානය අම්පාර දිස්‌ත්‍රික්‌කයද දෙකට කැඩීමට එකඟ වන්නේ නැත.වාර්ගික ආගමික පදනමින් දිස්‌ත්‍රික්‌ක ඇතිකිරීමට ගියහොත් එය රටම අවුලකට ඇද දමන තත්ත්වයකි. ශ්‍රී ලංකාවේ දිස්‌ත්‍රික්‌ නිර්මාණය කිරීමේදී වාර්ගික හෝ ආගමික පදනම ගැන කිසිම ලෙසකින් සලකා බලා නැත. කල්මුණේ දිස්‌ත්‍රික්‌කය සඳහා වූ යෝජනාව මුස්‌ලිම් කොංග්‍රසයේ වාර්ෂික සම්මේලනයේදීත් සම්මත කරගෙන ඇති අතර මෙය හදිසියේම කරලියට ගෙනආවේ ඉදිරි ජනපතිවරණයේදී තමන්ගේ සහාය හිමිවන්නේ මේ දිස්‌ත්‍රික්‌කය ලබාදෙන පුද්ගලයාට යන්න ප්‍රධාන අපේක්‍ෂකයන් දෙදෙනාටම දැන්වීමටය. මේ යෝජනාව දැන් ඔවුන් ජනාධිපතිවරයාට ඉදිරිපත් කර ඇත. කවරක්‌ නමුත් ඉදිරි ජනාධිපතිවරණයේදී මුස්‌ලිම් කොංග්‍රසය ජනාධිපතිවරයාට සහාය දැක්‌වීමට ඉදිරිපත් වීම බොහෝ දුරට සැක සහිතය.

ඌව පළාත් සභා ඡන්දයේදීද හොඳින් පෙන්නුම් කෙරුණේ මුස්‌ලිම් ඡන්ද එජාපයට ඇදී ගොස්‌ ඇති බවකි. මේ යෝජනාව ගැන පාර්ලිමේන්තුවේදීද කතාබහක්‌ ඇතිවුණු අතර එහිදී එජාප පාර්ලිමේන්තු මන්ත්‍රී විජයදාස රාජපක්‍ෂ මහතා මේ යෝජනාව දැඩිව විවේචනය කළේය. එක්‌සත් ජාතික පක්‍ෂය මේ යෝජනාව ප්‍රතික්‍ෂේප කිරීම අගය කළ යුත්තකි.

2003 ජනවාරි 29 වැනිදා අග්නිදිග විශ්වවිද්‍යාලයේ දී විශේෂ ප්‍රකාශනයක්‌ එළිදැක්‌විණි. එය ඕලුවිල් ප්‍රකාශය ලෙස ප්‍රකටය. එදා එල්.ටී.ටී.ඊ. සංවිධානයද ක්‍රියාත්මකව තිබුණු බැවින් මේ ප්‍රකාශය රජයට මෙන්ම කොටි සංවිධානයටද යොමුකර තිබිණි. මෙහි සඳහන් වූ වැදගත්ම පණිවුඩය කුමක්‌ද? නැගෙනහිර පළාත මුස්‌ලිම්වරුන්ගේ පාරම්පරික නිජභූමිය බවය. එනිසා වෙනම කලාපයක්‌ අවශ්‍ය බව එම ප්‍රකාශය මගින් අවධාරණය කර තිබිණි. මේ ප්‍රකාශය නිකුත් කිරීමෙන් පසු දැවැන්ත පෙළපාලියක්‌ද පැවැත්වූ අතර එයට සහභාගිවූවන් අවධාරණය කළේ වෙනම කලාපයක්‌ මෙන්ම තමන්ගේ පාලනයකටත් අවශ්‍ය ඉඩකඩ ලබාදිය යුතු බවයි. මෙම ප්‍රකාශය 1976 මැයි මාසයේ දී සම්මත කළ වඩුක්‌කෝඩේ ප්‍රකාශය හා සමාන යෑයිද ප්‍රකාශ විණි. කල්මුණේ දිස්‌ත්‍රික්‌ක යෝජනාව ද කෙළින්ම සමාන වන්නේ ඕලුවිල් ප්‍රකාශයට බව අමුතුවෙන් කිව යුතු නැත. මුස්‌ලිම් කොංග්‍රසයට අවශ්‍ය කල්මුණේ ඉස්‌ලාමික රාජ්‍යයක්‌ ඇතිකරන්නද? මේ ඉල්ලීමට රජය එකඟ වුවහොත් මීගමුව, ජාඇල ප්‍රදේශවල කතෝලිකයන් සඳහාද වෙනම දිස්‌ත්‍රික්‌කයක්‌ වෙන්කර දීමට ද රජයට සිදු වනු ඇත.

ඕලුවිල් ප්‍රකාශය අප පැහැදිලිව ප්‍රතික්‍ෂේප කරන්නේ මේ රට සෑම ජාතිකයෙකුගේම නිජභූමිය වන බැවිනි. මේ රටේ ශිෂ්ටාචාරය නිර්මාණය කළේ මහජාතිය විසිනි. නමුත් කිසිම සුළු ජන ප්‍රජාවට අඩු සැලකිලි දක්‌වා නැත. ඒ බෞද්ධ සම්ප්‍රදාය නිසාය. ඕලුවිල් ප්‍රකාශය පිළිගන්නේ නම් කොළඹ වෙසෙන මුස්‌ලිම්වරුන්ටද ප්‍රශ්න ඇතිවේ. මන්ද ඔවුන් නැගෙනහිරට අයත් නොවන නිසාය. දෙමළ නිජභූමියද මුස්‌ලිම් නිජභූමියද ප්‍රතික්‍ෂේප කළ යුතුය. මුස්‌ලිම් කොංග්‍රසය ඡන්ද කඩාගැනීමේ අරමුණින් මේ කල්මුණේ දිස්‌ත්‍රික්‌ක යෝජනාව ගෙනවිත් ඇති බව පැහැදිළිය. නැගෙනහිර පළාතේ හිස ඔසවන වහාබ් අන්තවාදයටද මේ වෙනම දිස්‌ත්‍රික්‌කයක්‌ ඇති කිරීම ආශිර්වාදයක්‌ වන්නේය. එනිසාම මේ දිස්‌ත්‍රික්‌ යෝජනාව කුණු කූඩයට දැමිය යුතුය. නැතිනම් චෞද්රි රහමන් අලිගේ නසරිස්‌තානය නැගෙනහිරින් බිහිවනු ඇත.

-චතුර පමුණුව
 [ඉරිදා දිවයින]

යුතුකම සංවාද කවය
www.yuthukama.com