බුදුන් උපන් තැන සහ අපේ අයිතිය

-සධීර බණ්ඩාර-
බුදුරදුන් (සිදුහත් කුමරුන්) උපන්/වැඩ විසූ ස්ථානය (රට) හෙවත් පුරාණ දඹදිව යනු ලක්දිවද යන්න පිළිබඳ විවාදය කලින් කලට මතුවන්නකි. අපේ අත්දැකීම් අනුව බොහෝවිට මෙම සාකච්ඡාව පැන නගින්නේ බිම් මට්ටමේ, ගමේ උපාසක උපාසිකාවන් අතරින් නොව නාගරික පැළැන්තියේ උගත් ‍යැයි සම්මත බෞද්ධයින් හා අන්තර්ජාලයේ හා සමාජ ජාලවල සැරිසරන සමහර තරුණ කොටස් අතරින්ය. සිංහල බෞද්ධයින් අතරින් මෙවන් විවාදයක් ඉදිරිපත් වීම යන කාරණයම සිංහල බෞද්ධයින්ට පහර ගැහීමට, ඔවුන්ව උපහාසයට ලක් කිරීමට යොදාගන්නා සිංහල බෞද්ධ විරෝධී පිරිස්ද වෙත්. හුදු බෞද්ධ ඉතිහාසය හා පුරාවිද්‍යාත්මක ගවේෂණ ගැන ඇල්මක් ඇති පිරිස්ද මේ පිළිබඳව උනන්දුවක් දක්වති. මෙවැනි විවාදයක් උලුප්පා දැක්වීම හරහා හිතාමතාම බෞද්ධයන් අතර මතභේද ඇතිකිරීමට උත්සාහ කරන්නන්ගේද හිඟයක් නැත.

නමුත් බුදුරදුන් ලක්දිව වැඩ විසුවා යැයි තර්ක කරන බහුතරයකට (විශේෂයෙන් තරුණ කොටස්වලට) ඇත්තේ තම/ජාතික අනන්‍යතාව හෝ බුදුරදුන් කෙරෙහි තමන්ට ඇති අයිතිය පිළිබඳ ප්‍රශ්නයක් යැයි අපි විශ්වාස කරමු. බුදුහාමුදුරුවන් වැඩ සිටි රටෙහිම තමන්ටත් ඉපිද ජීවත් වීමට ලැබීම තමන්ගේ වාසනාවක් , ආඩම්බර වීමට කාරණයක් යැයි ඔවුන් සිතනවා විය හැක. පිටස්තරයෙකුගේ දහමක් පිළිපැදීම ගැන (ඉතාමත් කලාතුරකින් හෝ) හිත යටින් යම් නොපැහැදීමක් ඔවුන්ට තිබෙනවාද විය හැක. (පසුගිය කාලයේ පැවති එට්කා විරෝධය අතරතුරදී, ඉන්දියානුවෙකුගේ ආගමක් පිළිපදිමින්ම ඉන්දියානුවන් රැකියා සඳහා මෙරටට පැමිණීම ගැන විරුද්ධ වීමට සිංහල බෞද්ධයින්ට ලජ්ජවක් නැතිදැයි උපහාසයෙන් ඇසූ පඬියන් කිහිප දෙනෙක්ද සිටිබව මෙහිදී මතක් කළ යුතුය). බුදුරදුන් යම්කිසි ආකාරයකින් තමන්ගේ ලේ නෑයෙකු කරගැනීමෙන්, තම රටේම වැඩසිටි අයෙකු කරගැනීමෙන්, බුදුරදුන් ගැන තමන්ටද අයිතියක් ඇතිකරගැනීමට හැකිවනවා යැයි ඔවුන් සිතනවා විය හැක. මෙම කුලකයේම වුනත් නොවුනත්, "ලොව කැළඹූ බෞද්ධයින්" යනුවෙන් බුදුදහම (බොහෝවිට මහායාන බුදුදහම) වැළඳගත් බටහිර ලෝකයේ ප්‍රසිද්ධ චරිත පිළිබඳ පින්තූර සමාජ ජාල තුල බෙදාහරිමින් තමන්ද බෞද්ධයන් වීම පිළිබඳ ආඩම්බර වන බව ඇඟවීමට උත්සාහ කරන තරුණ කොටස් තුලද තම අයිතිය හෝ හීනමානය පිළිබඳ ප්‍රශ්නයක් ඇතැයි අපි විශ්වාස කරමු. මෙම කෙටි සටහන ලිවීමේ අරමුණ බුදුරදුන් සත්‍ය ලෙසම වැඩ සිටියේ කොහිද යන්න පිළිබඳ වාද කිරීම නොව ඉහත සඳහන් කල තරුණ කොටස් ආමන්ත්‍රණය කිරීම සහ බුදුරදුන් පිළිබඳ සැබෑ අයිතිය ඇත්තේ කාටද යන්න සාකච්ඡා කිරීමයි.

මෙහිදී අපේ මතකයට නැගෙන්නේ හෙන්රි ජයසේනයන් විසින් සිංහලයට පරිවර්තනය කරන ලද "හුණුවටයේ කතාව" නාට්‍යයයි. මෙම මුළු නාටකය හරහා, විශේෂයෙන් අවසන් දර්ශන පෙළින් නාට්‍යයේ කතුවරයා කීමට උත්සාහ කරන (හෝ කතුවරයා කීමට උත්සාහ කරන්නේ යැයි අපි විශ්වාස කරන) ප්‍රධාන පණිවුඩයක් ඇත. ඒ දරුවා ගැන වඩා කැක්කුමක් ඇත්තේ වැදූ මවට වඩා හැදූ මවට බවයි. දරුවා ගැන වඩා සදාචාරත්මක අයිතියක් ඇත්තේ වැදූ මවට වඩා හැදූ මවට බවයි. බුදුහාමුදුරුවන් ගැන අයිතිය පිළිබඳවද අපට පැවසිය හැක්කේද මෙවන් දෙයකි. බුදුරදුන් (සිදුහත් කුමරුන්) උපන්නේ කොහිද, ඉන්පසු වසර අසූවක් වැඩ වාසය කළේ කොහිද යන්න එතරම්ම වැදගත් නැත. වැදගත් වන්නේ බුදුරදුන් පිරිණිවන් පෑමෙන් පසුවද උන්වහන්සේව වසර 2500ක් පුරා අඛණ්ඩව රැක බලාගත්තේ කවුද යන්නය. එසේ රැකබලාගත්තේ අන් කවුරුවත් නොව සිංහලයන්ය. වසර 2500ක් පුරා බුදුසසුනත්, බුදුසසුන රකින රටත් බාහිර ආක්‍රමණිකයන්ගෙන් සටන් කර බේරාගත්තේ සිංහලයන්ය. රටෙහි මහා නියඟ, දුර්භික්ෂයන් ඇතිවූ කාලවලදී පවා මරණය පෙනි පෙනීත් බුදුරදුන්ගේ ශ්‍රේෂ්ඨ වූ දහම කටපාඩමින්, ග්‍රන්ථාරූඩ කරමින් ආරක්ෂා කර ගත්තේද සිංහලයන්ය. බදුරදුන්ට සියදහස් වාරයක් පාසා තම රට පූජා කර ඇත්තේද සිංහලයන්ය. පිළිම, විහාර, දාගැබ් ඉදිකරමින් ශාසනය පවත්වා ගැනීමට වැඩිමනක් වෙහෙස වී ඇත්තේ සිංහල රජ දරුවන් ඇතුළු සමස්ත සිංහලයන්ය. සමහර අන්‍ය ආගමිකයන්ගේ, නිරාගමිකයන්ගේ සහ හීනමානික උගත් යැයි සම්මත බෞද්ධයින්ගේ අපහාස උපහාසවලට විරුද්ධව වාද විවාද කරමින් බුදුරදුන් සහ බුදුදහම රැක ගත්තේත්, රැක ගන්නෙත් සිංහලයන්ය. අදටත් බුදුදහම පිළිබඳ (අවම වශයෙන් ථෙරවාද බුදුහම පිළිබඳව හෝ) ලෝකයේ කේන්ද්‍රස්ථානය ලෙස සැලකෙන්නේ මේ ලක්දිවය.

ඔබ බුදුරදුන් උපන් තැන, වැඩ විසූ තැන ගැන වදවෙන්නේ බුදුහාමුදුරුවන් පිළිබඳ අයිතිය ලබාගැනීමට නම් ඉන් පළක් නැත. බුදුහාමුදුරුවන් වැදූ මව කවුද යන්න එතරම් වැදගත් නැත. නමුත් බුදුහාමුදුරුවන් හැදූ මව සිංහලයාය. එසේනම් බුදුහාමුදුරුවන් කොහේ උපන්නත් බුදුහාමුදුරුවන්ගේ අයිතිය ඇත්තේ සිංහලයාටය. මෙය බෞද්ධ ලෝකයාද, සෙසු ලෝකයාද පිළිගන්න සත්‍යයකි. සිංහලයා යැයි කවුදැයි නොදන්නා, බටහිර සමාජ විද්‍යාව තුළින් ලෝකය දෙස බලන පඬියන් ගැන අපි කළබළ විය යුතු නැත.
බුදුහාමුදුරුවෝ අපේය.

-යුතුකම සංවාද කවය
www.yuthukama.com
Like us on facebook :https://www.facebook.com/yuthukama

ඔපෙරා සහ කොස් ඇට

දන්නෝ බුදුන්ගේ ගීතය ඔපෙරා හඬින් ගැයීම ගැන තාමත් සාකච්ඡා වෙන හින්ද තවත් පොඩි දෙයක් කියන්ඩ ඕනෙ කියල හිතුන. සමහරු ඒ ගායනය කරපු කිශානි ජයසිංහට විවිධ නරක වචන කියමින් බැනල තිබ්බ අතරෙ ඒ ගායනය විවේචනය කරල තිබ්බ අයව ගල් වැද්දන්ට සමාන කරමින් රටේ සංස්කෘතියට ගරහන්ඩ අවස්ථාවක් උදාකරගත්ත අයත් හිටිය.

මේ ගායනය ගැන හිතද්දි මට මතක් වුනේ කාලෙකට ඉස්සෙල්ල ජාතික රූපවාහිනියෙ විකාශය වෙච්ච කන්දෙ ගෙදර-2 ටෙලි නාට්ටියෙ කුඩා සිද්ධියක්. මේ නාට්ටියෙ කතානායකය "බාල මහත්තය" (රෝහණ බැද්දගේ). බාල මහත්තය ගමේ හැදිච්ච, ගමේ නම්බුකාර චරිතයක් වුණු සර්ව සම්පූර්ණ ගැමියෙක්. බාල මහත්තයගෙ ලොකු පුතත් ගමේ හැදුනු වැඩුණු කෙනෙක් වුනාට නගරෙ උසස් රැකියාවක් කරන කෙනෙක්. බැඳල ඉන්නෙ නගරෙ හැදිච්ච, අර අපි කියන පොෂ් පැලැන්තිතියෙ කෙනෙක්. ඉතින් මේ දෙන්නගෙ ළමයිනුත් (විශේෂයෙන් දුව) හැඳි ගෑරප්පුවලින් විතරක් කන, නගරෙ විදිහට හැදිච්ච අය. වරක් මේ ලොකු පුතාගෙ පවුල යනව ගමේ, ඒ කියන්නෙ බාල මහත්තයගෙ ගෙදර. අර ලොකු පුතාගෙ දුවට ගමේ දේවල් පුරුදු නැති හින්ද පොඩි පොඩි අකරතැබ්බවලට මුහුණ දෙන්ඩ වෙන්ඩ දෙන අතරෙ හොඳම වැඩේ වෙන්නෙ කෑම මේසෙදි. කෑම මේසෙ තියෙන්නෙ ඉතිං බාල මහත්තයල කන ගමේ කෑම තමා. ඒ වුනාට අර දුවට හැඳි ගෑරප්පුවලින්ම කන්ඩත් ඕනෙ. බොහොම අමාරුවෙන් කන අතරෙ බත් පිඟානෙ තිබ්බ තම්බපු කොස් ඇටයක් කන්ඩ කියල ගෑරප්පුවෙන් ඇනපි. කොස් ඇටේ පිඟානෙන් එළියට විසික් වෙලා යනව නිකං අර කොටින්ට ගහපු මල්ටි බැරල් රොකට් එකක් වගේ. බාල මහත්තය ඇතුළු පිරිසට හිනා. ඕක තමා සිද්ධිය.

දැන් අර වෙච්ච වැඩේට හිනාගිය බාල මහත්තයට ගල් වැද්ද කියල බැනල හරියන්නෙ නෑ. එක්කො කොස් ඇටේ ඇඟිලිවලින්ම ඇරං කන්ඩ ඕනෙ. ගෑරප්පුවෙන්ම කන්ඩ ඕන්නං කොස් ඇටේ හොඳටම තම්බල ගන්ඩ ඕනෙ ගෑරප්පුවෙන් ඇනල ගන්ඩ පුළුවන් ගාන වෙනකං. නිදහස් දවසෙ දන්නෝ බුදුන්ගේ ගීතය ඔපෙරා හඬින් ගැයීම ගැනත් මේ වගේ දෙයක් තමා කියන්ඩ තියෙන්නෙ. එතන වුනේ සිංහල ගීතයක් අමුවෙන්ම ඔපෙරා ශෛලියකින් ගායනා කිරීමක් විතරයි. එතන කිසිම නිර්මාණාත්මක දෙයක් වෙලා තිබ්බෙ නෑ. ඉංග්‍රීසි ඇක්සන්ට් එකකින් හූ කියනව වගේ ඒක අපිට ඇහෙන්නෙ ඒ හින්ද. අර ඉතාලි ඔපෙරාවල කරනව වගේ "ර්"යන්න වැඩියෙන් උච්ඡාරණය කිරීමෙන්ම පේනව එතන වුණේ අමුවෙන්ම අනුකරණයක් කියල. නමුත් කේමදාස මාස්ටර්ගෙ සිංහල ඔපෙරාවල මෙහෙම ප්‍රශ්නයක් නෑ. ඒවා ඔපෙරා වුනාට ඒවායේ සිංහල හෝ උත්තර භාරතීය සංගීතයේ මුද්‍රාව තිබ්බ. ඔපෙරා අනුකරණය කරන්ඩ ගියේ නෑ. ඔපෙරා ශෛලිය අඩුපාඩු සහිතව හරි අපේම දෙයක් කරගත්ත එක කරේ. කේමදාසයන්ගේ ඔපෙරාවල සිංහල වචන උච්ඡාරණය වෙන විදිහ අහල බලන්ඩ. සාමාන්‍ය සිංහල උරුවක් තියෙන්නෙ. නමුත් ඔපෙරාවල වගේ යම් යම් වචන/ශබ්ද අලංකරණ යොදාගන්නව, ඇක්සන්ට් නෑ. කේමදාසයන්ගෙ විශිෂ්ඨම ඔපෙරාවක් වෙච්චි "පිරිනිවන් මංගල්‍යය" අහල බලන්ඩ. ගමේ සාමාන්‍ය උපාසක අම්ම කෙනෙක්ට වුනත් වැඩි අපහසුවකින් තොරව අහං ඉන්ඩ පුළුවන්. කේමදාස මාස්ටර් සංගීතවත් කරපු නාට්‍ය සහ චිත්‍රපටිවලත් මෙම ඔපෙරා ශෛලිය යොදාගත්තත් සාමාන්‍ය කෙනෙක්ට ඒක වැඩිපුර ඉස්මතු වෙලා පේන්නෙ නෑ. මොකද ඒවා අමු ඔපෙරා නොව, අපේම කරගත්ත ඔපෙරා වෙච්චි හින්ද.

ඉතිං ඕක තමා කතාව. කේමදාස මාස්ටර්නං කොස් ඇටේට ගෑරප්පුවෙන් අනින්ඩ කලින් හොඳටම තම්බගත්ත. අඩුම ගානෙ එහෙම කරන්ඩ උත්සාහ කරා. කිශානි ජයසිංහ කිසි හෙවිල්ලක් බැලිල්ලක් නැතුව ඇන්න කොස් ඇටේට ගෑරප්පුවෙන්. ඉතින් කොස් ඇටේ විසිවෙලා ගියා. කොස් ඇටේ විසිවුනා නේද කියල අපි ඇහුවම, කිශානි නෝන හැඳි ගෑරප්පුවලින් ඉංග්‍රීසි කෑම කාල ගත්ත සම්මානවලින් අපිට දමල ගහල වැඩක් නෑ. ඕං ඔහොමයි මට මේ වැඩේ දැනුනෙ.

ප.ලි: බාල මහත්තයගෙ මිනිපිරීගේ කෑම පිඟානෙ මුරුංග ව්‍යංජනයකුත් තිබ්බද කියල හරියටම මතක නෑ.

-සධීර බණ්ඩාර

යුතුකම සංවාද කවය
www.yuthukama.com
ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. 

(Like us on facebook)
https://www.facebook.com/yuthukama

කොටි විරෝධීන්ට එරෙහිව එසවෙන රනිල්ගේ මාධ්‍ය තර්ජනය එදා සහ අද...

මේ ඒ රනිල්මද?

කොටින්ට එරෙහිව ශ්‍රී ලංකා හමුදාවන් වෙනුවෙන් සැමදා පෙනී සිටි චතුර අල්විස්, කීර්ති වර්ණකුලසූරිය ඇතුලු මාධ්‍යවේදීන් කිහිපදෙනෙකු නම් කරමින් ඔවුන්ට තර්ජනය කරමින් රනිල් වික්‍රමසිංහ පාර්ලිමේන්තුව තුළ සිදුකළ කළහකාරී හැසිරීම අපි හොඳින් දැක්කෙමු. මෙය දැකීමෙන් බොහෝදෙනා විමතියට ලක්වී සිටි නමුත් මෙය කිසි ලෙසකින්වත් අළුත් අත්දැකීමක් නොවේ.

2002 නොවැම්බර් මස 7වන දින, London Daily Telegraph සහ Jane's Intelligence Review යන සඟරා සඳහා මාධ්‍යවේදියෙකු ලෙස ක්‍රියා කරමින් සිටි බ්‍රිතාන්‍ය ජාතික පෝල් හැරිස්ගේ වීසා බලපත්‍රය දීර්ඝ කිරීම ප්‍රතික්ෂේප කරමින් පැය 24ක් තුල ලංකාවෙන් පිටව යන ලෙස එවකට පැවති රනිල් වික්‍රමසිංහ රජයෙන් නියෝගයක් ලැබුණි. එයට හේතුව ලෙස එවක රජය දක්වා තිබුණේ ජාතික ආරක්ෂාව පාවාදෙමින් අත්සන් තැබුනු සටන් විරාම ගිවිසුම පෝල් හැරිස්ගේ විවේචනයට ලක්වීමයි. එසේම කොටි සංවිධානයද පෝල් හැරිස්ගේ නොමද විවේචනයට ලක්වීමද ඔහුව පිටුවහල් කිරීමට වක්‍ර හේතුවක් විය. කොටි න්‍යායාචාර්ය ඇන්ටන් බාලසිංහම්ද පෝල් හැරිස්ව පිටුවහල් කරන ලෙස රනිල් වික්‍රමසිංහ රජයෙන් ඉල්ලා සිටි බවට එකල මාධ්‍ය වාර්තා පළවුනි. (http://www.telegraph.co.uk/…/Sri-Lanka-expels-Telegraphs-ma…)

එදා පෝල් හැරිස් මෙන්ම අදද කොටි විරෝධී මාධ්‍යවේදීන් රනිල් වික්‍රමසිංහගේ වෛරයට පාත්‍රවී ඇත. ඒ අතරම කොටි හිතවාදී චැනල් 4 මාධ්‍යවේදී ජොන් ස්නොව් වැන්නන්ට සම්මුඛ සාකච්ඡා දෙමින්, රටෙහි ඕනෑම තැනක බාධාවකින් තොරව, මෙරට හමුදාවන් ගැන රිසි සේ ව්‍යාජ වාර්තා සකස් කිරිමට ඉඩ සලසා දීමට තරම් රනිල් වික්‍රමසිංහ කාරුණික වී ඇත.

රනිල් විසින් ලංකාවෙන් පන්නා දැමූ පෝල් හැරිස් ඝාතනය කරන්නැයි 2004දී කොටි නායකයා විසින් තම සාමාජිකයන්ට නියෝග කල අතර එතැන් සිට 2009දී කොටින්ගේ අවසානය දක්වාම පෝල් හැරිස් බ්‍රිතාන්‍ය තුලද ජීවත් වූයේ බ්‍රිතාන්‍ය රජයේ ආරක්ෂාව යටතේ බව පසුව වාර්තා විය.

2009 වර්ෂයේ මුල සිටම කොටි සංවිධානයට අත්වූ පරාජයන් දැක මෙරට දේශප්‍රේමීන් ප්‍රීති වන අතරම මෙරට ජනයාගේ මිතුරෙකු වූ පෝල් හැරිස්ද තනිවම එහි සතුට විඳදරාගත් බව අපට නිසැකය. 2009 පෙබරවාරි 8 වැනිදා, එනම් යුද්ධයෙහි අවසාන බාගයේදී පෝල් හැරිස් කල ප්‍රකාශයක් සමගින් මෙම සටහන අවසන් කරමි.
"The government of Sri Lanka and its President are to be congratulated on the prosecution of the war with the LTTE which has been accomplished with resolve and courage. This is in stark contrast to the supine efforts of previous governments who flinched from taking on the LTTE which had, accordingly, been able to engender a myth of invulnerability. Only six or seven years ago, it appeared that Sri Lanka might be terminally divided: a fate which would have doomed this unique and wonderful country as a sovereign entity"
====================================================
ප.ලි: 2009 මැයි මාසයේදී, උතුරේ අවතැන් කඳවුරු ගැන ව්‍යාජ කරුණු හා මෙරට හමුදාවන්ට ව්‍යාජ යුධ අපරාද චෝදනා ඉදිරිපත් කරමින් වාර්තාකරණයේ යෙදුනු නික් පැටන්-වෝල්ෂ් ඇතුළු චැනල් 4 මාධ්‍යවේදීන් තිදෙනුකු එවකට මහින්ද රාජපක්ෂ රජය මගින් අත් අඩංගුවට ගෙන රටින් පිටුවහල් කෙරුනි. ඉතිහාසය පුරා කොටි හිතවාදීන් මහින්ද රාජපක්ෂගේ එදිරිවාදීකම්වලට ලක්වීමත්, කොටි විරෝධීන් රනිල් වික්‍රමසිංහගේ වෛරයට පාත්‍ර වීමත් තේරුම් ගැනීමට එතරම් අපහසු නොවිය යුතුය.
මහින්ද වෙනස් වී නැත. රනිල්ද වෙනස්වී නොමැත. සියල්ල ඒ ආකාරයෙන්ම සිදුවෙමින් පවතී.

- සධීර බණ්ඩාර
යුතුකම සංවාද කවය

www.yuthukama.com

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. 

(Like us on facebook)

https://www.facebook.com/yuthukama

වත්මන් ආණ්ඩුව ගුණමකු ආණ්ඩුවක්ද?

වර්තමානයේ බොහෝ දෙනා පවසන්නේ වත්මන් ආණ්ඩුව ගුණමකු ආණ්ඩුවක් බවයි. එය ගුණමකු ආණ්ඩුවක් වීමට නම් තමන්ට ඡන්දය දුන් ජනතාව හෝ තමාට බලයට ඒමට උපකාර කළ පාර්ශව හෝ මෙම ආණ්ඩුවෙන් සත්‍ය ලෙසම බලාපොරොත්තු වූ දේවල් සිදු නොවී තිබිය යුතුය. නමුත් සත්‍ය ලෙසම එවැනි බලාපොරොත්තු කඩවීමක් සිදුවී තිබේද?

එක්සත් ජාතික පාක්ෂිකයන්ගේ බලාපොරොත්තු මෙම ආණ්ඩුව මගින් කඩකර ඇත්ද? කෙසේවත් නොමැත. එජාප පාක්ෂිකයන් බලාපොරොත්තු වූයේ කෙසේ හෝ මහින්ද රාජපක්ෂ පරාජය කිරීම සහ එජාප රජයක් ගෙන ඒම පමණි. එම කර්තව්‍ය සාර්ථක ලෙස ඉටුවී ඇත. මැතිවරණයට පෙර මෙම පාලක පක්ෂය දුන් පොරොන්දු කඩවීම හෝ සහන නොදීම පිළිබඳ එම පාක්ෂිකයන් තුලැ සන්තාපයක් ඇතිද? කිසිසේත්ම නැත. අපේ අත්දැකීම් අනුව එජාප පාක්ෂිකයාට වැදගත් වන්නේ එජාප ආණ්ඩුවක් තිබීම පමණි. එයින් රටෙහි ආරක්ෂාවට හෝ ආර්ථිකයට වන හානිය ඔවුනට එතරම් වැදගත් නැත. උණහපුළු අම්මාට උගේ දරුවා මැණිකක් වන්නා සේ එජාප පාක්ෂිකයනට තම ආණ්ඩුවක් පැවතීම පමණක්ම වටී. (ඔවුනට තම පක්ෂය ගැන ඇති කැක්කුම රට පිළිබඳ ඇති නොවීම රටේ කරුමයකි ).

වත්මන් ආණ්ඩුව බලයට පත් කරගැනීමට දිවා රෑ වෙහෙසුණු බටහිර රටවල්, ඉන්දියාව, කොටි නඩය සහ ඊනියා උගතුන් බුද්ධිමතුන්ගෙන් සපිරි පුරවැසි බලය ආදී පාර්ශවවල බලාපොරොත්තු කඩවී ඇත්ද? අපේ අදහස නම් එම බලාපොරොත්තු ඉහටත් උඩින් ඉෂ්ඨ වී ඇති බවයි. එක් පසකින් එක්සත් ජාතීන්ගේ මණ්ඩලයේදී තම රටට විරුද්ධව තමන්ම යෝජනා ගෙන ඒමට මෙම ආණ්ඩුව ක්‍රියා කරයි. එසේම දරුණු ත්‍රස්තවාදී කටයුතුවලට සම්බන්ධ ඉහළ පෙලේ කොටි සැකකරුවන් තොග වශයෙන් නිදහස් කෙරෙමින් පවතී. එක්සත් ජාතීන්ගේ නිලධාරීන්ට ඕනෑම මොහොතක ඕනෑම හමුදා කඳවුරකට කඩා පැන පරීක්ෂා කිරීමට දැන් හැකියාව ලැබී ඇති අතර කබිනට් ප්‍රකාශකයාම එය ප්‍රසිද්ධියේ සාධාරණීකරනය කරන මට්ටමකට පත්ව තිබේ. බුද්ධි අංශ නිලධාරීන් අත් අඩංගුවට ගෙන අධිකරණවලට දැක්කවීමද දැන් සුලභ දසුනකි. අය වැයෙන් පසු ඕනෑම විදේශිකයෙකුට කිසිදු බාධාවකින් තොරව මෙරට ඉඩම් මිළදී ගැනීමේ අවස්ථාවද ලැබී ඇත. ඉහත සඳහන් කළ බලවේග මෙම අදියරේදී මේවාටත් වඩා දෑ මෙම ආණ්ඩුවෙන් බලාපොරොත්තු වන්නේ යැයි අපි නොසිතමු.

ඊනියා පාවෙන ඡන්ද දායකයන් පිළිබඳවද කතා කළ යුතුමය. ඔවුන්ගේ බලාපොරොත්තු බොහෝ දුරට කඩවී ඇතැයි අපි විශ්වාස කරමු. රටේ ආරක්ෂාව අනතුරේ දැමීම සහ විශේෂයෙන්ම අළුත් අයවැය හරහා මෙම ආණ්ඩුව මොවුනට එළිපිටම සරදම් කර ඇති ආකාරය පැහැදිළිය. නමුත් ඒ සම්බන්ධයෙන් අපි ආණ්ඩුවට සෘජුව දෝෂාරෝපණය නොකරමු. 2002-2004 කාලය තුළ එජාප ආණ්ඩුව වත්මන් අගමැතිවරයාගේ නායකත්වය යටතේම සටන් විරාම ගිවිසුම් අත්සන් කරමින්, රාජ්‍ය ආයතන විකුණමින් රටට කළ හානිය දැන දැනම නැවතත් එම ආණ්ඩුවටම තම මනාපය ලකුණු කර පසුව මැසිවිළි නගන පිරිසකක් හරහා ඡන්ද අයිතිය අපතේ යාම ගැන පමණක් අපි දුක් වෙමු.

අවසාන වශයෙන් වත්මන් ආණ්ඩුව පැරදවීමේ අටියෙන් ඡන්දය භාවිතා කළ අප වැනි පිරිස් මෙම ආණ්ඩුව කරාවියැයි කියල බලාපොරොත්තු වූ නමුත් එසේ නොවේවා යැයි ප්‍රාර්ථනා කළ දේද සිතුවාටත් වඩා වේගයෙන් අද සිදුවෙමින් පවතී. එසේ ගත්කලද මෙම ආණ්ඩුව අපේ ප්‍රර්ථනා කඩ කළද අප බලාපොරොත්තුවෙන් සිටි ආකාරයෙන්ම ක්‍රියා කර ඇත.

මේ අනුව සමස්ථයක් විදියට ගතහොත් වත්මන් ආණ්ඩුව ගුණමකු ආණ්ඩුවක්ද? අපේ අදහසනම් එසේ නොවන බවයි. සියළු දෙනා බලාපොරොත්තු වූ පරිදි සියල්ල ඉතා වේගයෙන් සිදුවෙමින් පවතී. ඉදිරි වසර පහ අවසානයේ රටක් ඉතිරි වුවහොත් පමණක් අපි පුදුම වෙමු.

- සධීර බන්ඩාර

යුතුකම සංවාද කවය

www.yuthukama.com

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. (Like us on facebook)

https://www.facebook.com/yuthukama

සුනිල් රත්නායක, සිංහල රණවිරුවා සහ බයියාගේ හෘදසාක්ෂිය

දිනෙන් දින අළුත් වන යුධ අපරාද ප්‍රශ්නය හමුවේ තරමක් පැරණි ප්‍රශ්නයක් පිළිබඳ නැවතත් කතා කිරීමට සිදුව තිබේ. අපි උත්සාහ කරන්නේ යම් යම් කාරණාවල ඇති යුක්ති අයුක්ති සහගත බව ගැන කතා කිරීමට නොව, එම කාරණාවලට මෙරට ජනයා සංවේදී වන ආකාරය තේරුම් ගැනීමටය.

සුනිල් රත්නායක රණවිරුවාට ඔහු 2000 වසරේ මානුෂික මෙහෙයුම් අතරතුර සිදුකරන ලදැයි කියන අපරාධයක් සම්බන්ධයෙන් මරණීය දණ්ඩනය නියම කර දැනට මාස තුනකටත් වඩා ගතව ගොස් ඇත. මෙම සිද්ධිදාමය කෙරෙහි බයි ජනයා ප්‍රතිචාර දැක්වූයේ කෙසේද? ඔවුන් මුල සිටම සුනිල් රත්නායක ආරක්ෂා කරන පිළිවෙතක සිටියහ. සුනිල් රත්නායක වෙනුවෙන් පෙනී සිටි නීතිඥයාගේ ප්‍රකාශ උපුටා දක්වමින් එය අසාධාරණ තීන්දුවකැයි ඔවුන් එළිපිටම කියා සිටියහ. එය සමස්ත රණවිරුවන්ටම එරෙහි කුමන්ත්‍රණයක් බව ඔවුහු විශ්වාස කළහ. සමාජ ජාලවල තමන්ගේ පින්තූරය වෙනුවට සුනිල් රත්නායකගේ පින්තූරය භාවිතා කළහ. ඔහු වෙනුවෙන් ලිපි ලිවූහ. මාස තුනක් ගතවූ තැනත් ඔහු වෙනුවෙන් ජනාධිපති සමාව ලබා ගැනීම සඳහා පෙත්සම් අත්සන් කරමින් සිටිති.

ඒ අතර සුනිල් රත්නායක කෙරෙහි මෙරට උගත්™ බුද්ධිමත්™ මධ්‍යස්ථ™ යුක්තිගරුක™ ජනයා දැක්වූ ප්‍රතිචාරය කුමක්ද? ඔවුහු මුල සිටම මෙම අධිකරණ තීන්දුව සාධාරණීකරණය කිරීමට උත්සාහ කළහ. අධිකරණයේ ස්වාධීනත්වය උලුප්පා දැක්වීමට මෙම සිද්ධිය ගෙන හැර පෑහ. පැමිණිල්ලේ නීතිඥයාගේ ප්‍රකාශය පමණක් උපුටා දක්වමින් සුනිල් රත්නායක වැරදිකරු කිරීමට උත්සාහ කළහ (මේ ඔවුන්ගේ මධ්‍යස්ථ බව නිරූපණය කරන හැටිය). සුනිල් රත්නායක වෙනුවෙන් පෙනී සිටි අය ජාතිවාදීන්යැයි හංවඩු ගැසූහ. එකම ප්‍රශ්නයක් ගැන මෙවැනි හැසිරීම් දෙකක් තිබිය හැක්කේ කෙසේද?

ඔබේ සමීපතයෙක්ට/පවුලේ අයෙකුට මෙවන් බරපතළ චෝදනාවක් එල්ල වුවහොත් ඔබ හැසිරෙන්නේ කෙසේද? ඔහු / ඇය වෙනුවෙන් ඔබ කොන්දේසි විරහිතව (වැරදිකරු වුවත් නිවැරදිකරු වුවත්) පෙනී නොසිටින්නේද? ඔහු නිවැරදිකරුයැයි සමාජයට ඒත්තුගැන්වීමට ඔබ නොවෙහෙසෙන්නේද? ඔහුට අවාසිසහගත තීන්දුවක් ලැබුණහොත් එය අසාධාරණ තීන්දුවක් ‍යැයි සමාජය ඉදිරියේ කියා පෑමට ඔබ උත්සාහ නොකරන්නේද? ඔහු සිරගත වුවහොත් ඔහුව ඉන් මුදා ගැනීමට ඔබ ක්‍රියා නොකරන්නේද?

අප වැනි නූගත් බයියන් සුනිල් රත්නායක ඇතුළු සටන්භූමියේ රණවිරුවන් වෙනුවෙන් කොන්දේසි විරහිතව පෙනී සිටින්නේ අවිඥානිකව හෝ මෙවැනිම සංදර්භයක් යටතේයැයි අපි විශ්වාස කරමු. බයියාට අනුව රණවිරුවා අපේ එකෙකි. අප වෙනුවෙන් දිවි පරදුවට තබන, අප වෙනුවෙන් සටන් වදින අපේම එකෙකි. රණවිරුවා කරදරයකට පත්වූ විට තම පියා/සහෝදරයා/දරුවා මෙන් සලකා ඔහු කෙරෙහි සංවේදී වන්නේ යටිහිතේ ඇති මෙම අපේ එකකු යන අදහස නිසා යැයි අපි සිතමු. මේ බයියාගේ ස්වභාවයයි (සමහරුන් පවසන්නේ රණවිරුවන් අතින් ඝාතනය වන්නේ දෙමළුන් බැවින් අප රණවිරුවන් වෙනුවෙන් පෙනී සිටින බවත්, ඝාතනය වූයේ සිංහලයන් නම් අප රණවිරුවන්ට විරුද්ධ ස්ථාවරයක සිටිනු ඇති බවත්ය. 2012 වසරේදී වැලිකඩ බන්ධනාගාරයේ STF භටයින් සමඟ ඇතිවූ ගැටුමකින් සිරකරුවන් 27 දෙනෙකු මියගිය සිද්ධියේදී NGO නඩය සිරකරුවන් අහිංසකයන් ලෙස පෙන්වා STF භටයින්ට අපරාද චෝදනා එල්ල කරද්දී අප සෘජුව STF භටයින් වෙනුවෙන් පෙනී සිටි බව මොවුන්ට මතක් කර දීමට කැමැත්තෙමු. මිය ගිය සිරකරුවන් සිංහලද දෙමළද යන්න සොයා බලන මෙන්ද අපි කරුණාවෙන් ඉල්ලා සිටිමු).

නමුත් ඊනියා උගත් බුද්ධිමත් මධ්‍යස්ථ මතධාරීන් රණවිරුවන් වෙනුවෙන් පෙනී නොසිටින්නේ ඔවුන්ට රණවිරුවන් හුදු පිටස්තරයන් පමණක් වන නිසා නොවේද? තම සමීපතයෙකුගේ ප්‍රශ්නයකදී ඔවුන් මේ ලෙසම මධ්‍යස්ථ යුක්තිගරුක චරිත රඟපානු ඇත්ද? මෙයට පිළිතුරු සැපයීම අපි ඔවුන්ගේ හෘදසාක්ෂියටම බාර කරමු.

සිංහල රණවිරුවා වඩාත් ශ්‍රේෂ්ඨ වන්නේ ඇයි?
----------------------------------------------------ලොව ඕනෑම රණවිරුවකු තම ජාතිය වෙනුවෙන්, අන්‍යයන් වෙනුවෙන් ජීවිතය පරදුවට තබන්නෙකි. ඒ අනුවනම් ලොව ඕනෑම රණවිරුවකු ශ්‍රේෂ්ඨ වන්නේය. නමුත් සිංහල රණවිරුවාට ඉන් එහාට ගිය ශ්‍රේෂ්ඨත්වයක් ඇත්ද? (අපි මෙහිදී සිංහල රණවිරුවා යැයි හඳුන්වන්නේ සිංහල බෞද්ධ සංස්කෘතිය තුළ හැදී වැඩුණු, ජාතිය වෙනුවෙන් සටන් කරන සිංහල, දෙමළ, මුස්ලිම්, බර්ගර් ඕනෑම ජන වර්ගයකට අයත් රණවිරුවන්ය )

සිංහල බෞද්ධ සංස්කෘතියක ජීවත් වන අපගේ අවසාන අරමුණ නිවන් දැකීමයි. නිවන් මග අහුරන ක්‍රියාවලින් වැළකීමට අපි හැකි සැමවිටම උත්සාහ කරමු. නමුත් අපි අපගේම තාවකාලික සැපත වෙනුවෙන් කරන වැඩ වලින් නිවන තව තවත් ඈත් කරගන්නෙමු. එනම් අපි තමන් වෙනුවෙන්ම නිවන කල් දමාගන්නා මිනිසුන් වෙමු. එනමුත් රණවිරුවන් දිවි පරදුවට තබා සටන් කරමින් තම නිවන ඈත් කරගන්නේ අපි වෙනුවෙන්ය. අනුන් වෙනුවෙන්ය. අනුන් වෙනුවෙන් සවිඥානිකවම තම නිවන කල් දමාගන්නා සිංහල රණවිරුවා අන් කවරෙකුටත් වඩා ශ්‍රේෂ්ඨ වන්නේ යැයි අපි විශ්වාස කරමු. ඔවුන් ආරක්ෂා කරගැනීම අපේ යුතුකමක් යැයි අපි සලකමු. විදේශීය පමණක් නොව දේශීය හෝ යුධ අධිකරණවලට අප වෙනුවෙන් කරදරේ වැටුනු රණවිරුවන් දැක්කීමට අපි එරෙහි වන්නේද මෙවැනි සංදර්භයක් යටතේයි.

මේ බයියන්ගේ හෘදසාක්ෂියයි!
 
- සධීර බන්ඩාර
යුතුකම සංවාද කවය
www.yuthukama.com
ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. (Like us on facebook)
https://www.facebook.com/yuthukama

රනිල් සහ සිරිසේන, නිවටයන්ද? ගැත්තන්ද?

මේ දවස්වල ජිනීවාවල වෙන දෙයත් එක්ක රනිල් සහ සිරිසේන හඳුන්වන්ඩ "නිවටයා", "ගැත්තා" යන වචන දෙක ගොඩ දෙනෙක් පාවිච්චි කරන බව පේනව. ඇත්තටම මොවුන් දෙදෙනා අයිති වෙන්නෙ මොන කුලකයටද (ඉන්දියාව, බටහිරයන් සහ බෙදුම්වාදය ඉදිරියේ මොවුන්ගේ දේශපාලන හැසිරීම දිහා බලපුවම )?

"නිවටයා" කියපුවම එන්නෙ දුර්වලයා, බයගුල්ලා වගේ අදහසක්. ඒ කියන්නෙ සිද්ධ වෙන දෙයට විරුද්ධයි, හැබැයි ඒ බව පෙන්නන්ඩ ධෛර්යයක්, කොන්දක් නැති බව වගේ දෙයක්. හරියට ජේ.ආර් මහත්තය වඩමාරච්චි මෙහෙයුමෙන් පස්සෙ, ඉන්දියාව යාපනේට අහසින් පරිප්පු දැමීම හරහා ඉන්දු ලංකා ගිසුම අත්සන් කිරීම දක්වා ඉන්දියාව ඉස්සරහ හැසිරුනු විදිහ වගේ.

"ගැත්තා" කියන්නෙ වෙනම කෙනෙක්. පාක්ෂිකයා, අනුමත කරන්නා වගේ අදහසක් දෙන්නෙ. කිසිම විරුද්ධත්වයක් නෑ සිද්ධ වෙන දෙයට. ලැදියාවක් තියෙන්නෙ.

ඒ අතින් රනිල් කියන්නෙ බටහිර ගැත්තෙක්. ඉතිහාසය පුරා ඔහුගෙ තිබ්බ සිංහල බෞද්ධ විරෝධය, බටහිර රටවලට ඇති නැඹුරුව, ෆෙඩරල් මානසිකත්වය හරහා බෙදුම්වාදයට දැක්වූ අනුග්‍රහය ආදියෙන් මේක පිළිබිඹු වෙනව. කොටින්ම රනිල් බටහිර ඉදිරියේ නිවටයෙක්ද වීරයෙක්ද කියල හොයාගන්ඩ විදිහක් නෑ ගැති කම නිසාම.

සිරිසේන ගැන තාම හරියට හිතාගන්ඩ බෑ. හැබැයි ඇමෙරිකාව, ඉන්දියාව අපේ රටට කරන දේට විරුද්ධත්වයක් පෙන්නන්නෙත් නෑ. අගය කරනව මිසක්. දැනට සැකයේ වාසිය අපි සිරිසේන මහත්තයට දීල "නිවටය" කියන ස්ටේටස් එක දෙමු. අපි කලින් පෙන්නල දුන්න විදිහට නෝංජලයෙක් කියල කියන්ඩත් පුළුවන් (https://www.facebook.com/sadeera/posts/10207274582240840). ගැත්තෙක්ද නැද්ද කියල කියන්ඩ තාම කල් වැඩියි.

- සධීර බන්ඩාර

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. 

(Like us on facebook)

https://www.facebook.com/yuthukama

යහපාලනය සහ දෙව්දත්ගේ පංච වර

අප කීමට යන මෙම කාරණාව ජනවාරි 8 වැනිදාට පෙර අප පුන පුනා ප්‍රකාශ කළද, මෛත්‍රීපාලට ඡන්දය දුන් බොහෝ දෙනෙකු (විශේෂයෙන් "පාවෙන" ඡන්ද දායකයන් සහ සමහර ශ්‍රීලනිප සාමාජිකයින් ) එය මායිම් කළේ නැත. නමුත් වත්මන් "යහපාලන" ආණ්ඩුවේ රෙදි ගැලවෙමින් තිබෙන මේ මොහොතේ ඉන්ද්‍රීය ප්‍රත්‍යක්ෂයෙන්ම මෙය තේරුම් ගැනීම අපහසු කාර්යයක් නොවිය යුතුය.

වත්මන් ආණ්ඩුව බලයට ගෙන ඒමේ ප්‍රධාන සටන්පාඨ වූයේ යහපාලනය, ප්‍රජාතන්ත්‍රවාදය, නීතියේ ආධිපත්‍යය, මාධ්‍ය නිදස ආදී කාරණාය. මේවා බැලූ බැල්මට ඉතා විශිෂ්ඨ සංකල්පය. මේවා ඉටුකරගතහොත් හිතූ පැතූ සම්පත් දෙන කේතුමතී රාජධානියකට මෙහා ලංකාව නවතින්නේ නැත. නමුත් අප පෙන්වාදීමට උත්සාහ කළේ මෙම සටන් පාඨ පිටුපස සිටින බලවේගවල අතීත ක්‍රියා පිළිවෙළ හා ඒ හා බැඳුණු ඔවුන්ගේ අරමුණුය. එක්පසෙකින් රනිල්, චන්ද්‍රිකාය. මොවුන්ගේ ආණ්ඩු කාලවලදී ප්‍රජාතන්ත්‍රවාදය, නීතිය, මාධ්‍ය නිදහස පමණක් නොව රටේ ආරක්ෂාවද යහමින් රැකුනු ආකාරය සියල්ලන්ට මතකය. තව පසෙකින් LTTEය වෙනුවෙන් ඍජුව පෙනී සිටි දෙමළ සන්ධානයය. මානුෂික මෙහෙයුම් හා රණවිරුවන් අවමානයට ලක් කළ පුරවැසි බලය හා අළුත් පරපුර ඇතුළු කුප්‍රකට NGO නඩය තවත් අන්තයකින්ය. මේ සියල්ලම පිටුපස ඇමෙරිකාව, එංගලන්තය හා ඉන්දියාව සිටි බව හොරට නිදන්නවුන් හැර අන් සියල්ලෝම දැන සිටියහ. මෙම පාර්ශව සියල්ලම සම්බන්ධ කළ ප්‍රධානම කරුණු වූයේ දෙමළ බෙදුම්වාදයට ඇති හිතෛශී බව සහ පොදුවේ සිංහල බෞද්ධ විරෝධයය. මොවුන්ගේ අරමුණ වූයේ දෙමළ බෙදුම්වාදයට හා බටහිරට එළිපිටම අභියෝග කළ මහින්ද ප්‍රමුඛ ආණ්ඩුව පළවාහැරීම මිසක ඊනියා යහපාලනයක් ගෙන් ඒම නොවන බව අපි සාධක සහිතව පෙන්වා දුන්නෙමු. නමුත් පඬියන් අපට කීවේ වැදගත් වන්නේ පණිවිඩකරුවා නොව පණිවිඩය පමණක් බවය.

මීට සමාන්තර කතා පුවතක් අපට බුදු සමයෙන්ද පෙන්වාදිය හැක. බුදුරදුන්ගේ ජීවිතයට හානි කොට සංඝයාගේ පාලනය සියතට ගැනීමට දේවදත්තයන් යෙදූ උපායන් ගැන අපි හොඳින් අසා ඇත්තෙමු. සියළු ව්‍යර්ථයන් අසාර්ථක වූ කළ දෙව්දත් තෙරුන්ගේ අවසන් උත්සාහය වූයේ සංඝභේදය තුළින් නායකත්වය පැහැරගැනීමය. ඒ සඳහා දෙව්දත් තෙරුන් කෝකාලික, සමුද්ද හා දත්ත යන භික්ෂූන් ද කැටිව ගොස් බුදුරදුන් ගෙන් පංචවරයක් ඉල්ලීය. මෙම පංචවරයන්වලට අයත් වූයේ භික්ෂූන් දිවි හිමියෙන් අරණ්‍යගතව විසිය යුතු ය, පිණ්ඩපාතික විය යුතු ය, පාංශු කූලික විය යුතු ය, රුක්ෂ මූලික විය යුතු ය, මත්ස්‍ය මාංශ අනුභව නො කළ යුතු ය යන ඉල්ලීම්ය. මේවාද බැලූ බැල්මට විශිෂ්ඨ ඉල්ලීම්ය. සඟ සමාජය පිරිසුදු කිරීමටනම් මෙවැනි නීති අවශ්‍ය බවද අයෙකුට සිතිය හැක (නූතන දේවදත්තයෙකුද සංඝයාවහන්සේට නීති පණවමින් පාර්ලිමේන්තු පනතක් ගෙන ඒමට මීට සුළු කළකට පෙර උත්සාහ දැරූ බව මෙහිදී සිහිපත් කළයුතුය.). නමුත් මැදුම් පිළිවෙත අගය කළ බුදුරදුන් මෙම ඉල්ලීම් නීති ලෙස පැනවීම ප්‍රතික්ෂේප කළහ. තමන් බලාපොරොත්තු වූ ලෙසම සිදුවූ දෙය අවියක් කොටගත් දේවදත්ත රූක්ෂ පිළිවෙත් කැමැති භික්ෂූන් වහන්සේ විශාල පිරිසක් ද තමාට අවනත කරගෙන ශාසනයෙහි ප්‍රථම සංඝභේදය සිදු කෙළේය.

මතුපිට මනරම්නම් ඕනෑම කුණක් විකිණිය හැක. ඕනෑම දුෂ්ඨ අරමුණක් ඉටුකරගැනීමට උත්සාහ දරන පිරිස් කරන්නේ එම අරමුණ සඟවා ඉතා ආකර්ෂණීය සංකල්ප, අදහස්, සටන්පාඨවලින් එය ආවරණය කිරීමයි. සළුපිළි ඇන්දවීමයි. අවසානයේ ජනතාව රැවටීමය. 1815දී සිදුවූයේත් මෙයයි. ජේ.ආර් ධර්මිෂ්ඨ සමාජය ගෙන ආවේත් මෙසේමය. පසුගිය ජනවාරි 8 වැනිදා සිදුවූයේත් මෙයයි. වර්තමානයේ බටහිරයන් ලොව පුරා රටවල් අස්ථාවර කරන්නේත් මේ ක්‍රමයටමයි.

තමන් කළ වරදට දෙව්දත් අපායේ දුක්විඳින බව බෞද්ධ සාහිත්‍යයේ සඳහන් වේ. ඉදිරියේදීවත් මෙවැනි උපායන්වලට හසු නොවී අප රට වර්තමාන ලිබියාව මෙන් මිහිපිට අපායක් නොකර ආරක්ෂා කර ගනිමු. පණිවිඩය පමණක් නොව පණිවිඩකරුවා හා ඔහුගේ අරමුණු පිළිබඳවද කල්පනාකාරී වෙමු.

- සධීර බන්ඩාර

යුතුකම සංවාද කවය
www.yuthukama.com

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. 
(Like us on facebook)
https://www.facebook.com/yuthukama