11/13/2015

බෙදුම්වාදය අත්හැරියවුන් බෙදුම්වාදයට යලි තල්ලු කළ යහපාලනය

කතෘ:යුතුකම     11/13/2015   1 comment

-බණ්ඩාර දසනායක

මීට සති කීපයකට උඩින් අපට අසන්නට ලැබුනු විශේෂ ප්‍රවෘත්තියක් වෙත නැවත අවධානය යොමු වියයුතු යැයි සිතුවේ එය තරමක් ජාතික වැදගත්කමකින් යුතු වූ ප්‍රවෘත්තියක් වීම නිසාමයි. ජාතික වැදගත්කමක් මෙන්ම සංවාදයට තුඩුදෙන ස්වභාවයක්ද ඒ පුවතෙහි වේ. කරුණා අම්මාන් හෙවත් විනයාගමූර්ති මුරලිදරන් ද්‍රවිඩ එක්සත් විමුක්ති පෙරමුණ සමග එක් වුනු බව අසන්නට ලැබුණි. ඔහු එම පක්ෂය සමග එක්වෙමින් දක්වා තිබූ අදහස් සිහි බුද්ධියෙන් විමසිය යුතු වන්නේ ජාතික වැදගත් කමකින් යුතු කරුණ සැඟවී ඇත්තේ ඒ තුල වීමෙනි. කරුණා අම්මාන් ද්‍රවිඩ එක්සත් විමුක්ති පෙරමුණ හෙවත් ටීයූඑලෙෆ් (TULF) පක්ෂය සමග එක් වෙමින් කියා සිට ඇත්තේ ඔහු වැඩිදුරටත් දෙමළ ජනයාගේ අයිතිවාසිකම් හා අභිලාශයන් වෙනුවෙන් පෙනී සිටින බව හා දෙමළ ජනයාට සාධාරනය ඉටු කිරීම වෙනුවෙන් ක්‍රියා කරන බවයි. දෙමළ ජනයාට සිදුවූවායැයි කියන ඊනියා අසාධාරනයන් මොනවාද? දෙමළ ජනයාගේ අහිලාශයන් මොනවාද? මේ වෙනත් කිසිවක් නොවේ, අධිරාජ්‍යවාදීන්ගේ වරප්‍රසාධ අත් හැරීමට අකමැති වූ උතුරේ දෙමළ ප්‍රභූන් මුළු රටේම පාලනය බැරිනම් කොටසක හෝ පාලනය අත්පත් කරගැනීමේ බෙදුම්වාදී මෙහෙයුමේ නිරතවන්නන්ගේ පැරනි රසාංගයකි. මීට පූර්ණ ආශිර්වාදය මුලින් බ්‍රිතාන්‍යයේද වර්තමානයේ බ්‍රිතාන්‍යට හිතවත් සියළු බටහිර රටවලද ලැබේ. එහි පුදුමයක්ද නැත. ඒ දකුණු ඉන්දීය දෙමළ ජනයා බ්‍රිතාන්‍ය වහල් සේවකයන් ලෙස මෙහි ගෙනවිත් පදිංචි කරවූවන් වන බැවිනි.

කරුණා අම්මාන් වැඩි දුරටත් කියා තිබෙන්නේ 13 වන ව්‍යවස්ථා සංශෝධනයේ සියළු යහපත් අංග පූර්ණ වශයෙන් ක්‍රියාවට නැංවිය යුතු බවයි.13 වන ව්‍යවස්ථා සංශෝධනය යනු ඉන්දියාව විසින් මෙරට බෙදුම්වාදීන් සැනසීම සඳහා ලක් රජයට බලහත්කාරයෙන් පැටවූ එකක් මිස එහි වෙන අර්ථයක් නැත. එබැවින් එහි කුමන අංගයක් වුවත් යහපත් වන්නේ ලක් රජයේ ජාතිකත්වයට නොව බෙදුම්වාදයටය. අද කරුණා අම්මාන් මේ බෙදුම්වාදයට හිතවත් 13 වන සංශෝධනයේ යහපත් අංග ලෙස බෙදුම්වාදයට හිතවත් යෝජනා පූර්ණ වශයෙන් ක්‍රියාත්මක විය යුතු බව කියයි.කරුණා අම්මාන් යනු පැරනි එල්ටීටීඊ ක්‍රියාකාරී සමාජිකයෙකි. එනම් ඔහු කලක් ඊලම වෙනුවෙන් ප්‍රභාකරන්ගේ පිලේ සිට සටන් මෙහෙයවූ අයෙකි. ඔහු 2000 -2001 රනිල් වික්‍රමසිංහ මහතා අගමැතිව සිටි එක්සත් ජාතික පක්ෂ රජය විසින් කොටි සංවිධානය සමග ඇතිකරගත් අවබෝධතා ගිවිසුම බල පැවැත්වුනු කාලයේ ප්‍රභාකරන්ගේ පිලෙන් වෙන් විය. ඔහු වෙන් වූයේ ඔහු වටා සිටි කොටි සාමාජිකයන් කන්ඩායමක්ද සමගයි. කරුණාගේ වෙන් වීමට ඔහු ප්‍රභාකරන්ගෙන් ඈත් වී රනිල් වික්‍රමසිංහ වෙත ලං වී තිබීම හේතුවක් වුවත් රනිල් වික්‍රමසිංහ මහතා කොටි සංවිධානයේ අරමුණු වලට පූර්ණ වශයෙන් පිටුපෑ බව හෝ ඔහු අප රටේ සිංහල බෞද්ධ ජාතිකත්වයට පක්ෂපාතී කෙනෙක් බවත් එයින් ගම්‍ය නොවේ. කෙසේ නමුත් කරුණා අම්මාන් ප්‍රභාකරන්ගෙන් වෙන් වී යෑම කොටි සංවිධානය ලද එක්තරා පරාජයක් විය.

2005 ජනාධිපතිවරණයෙන් මහින්ද රාජපක්ෂ මහතා ජය ගෙන ජනාධිපතිවරයා ලෙස පත් විය. ඒ වන විටත් කරුණා අම්මාන් ඇතුළු පිරිස ප්‍රභාකරන් කණ්ඩායමට එරෙහි වූවා මිස බෙදුම්වාදය අත්හැර නොතිබිණි. මාවිලාරු සොරොවුව වසන්නට ගොස් තම අවසානය සනිටුහන් කරගත් කොටි සංවිධානය යුධමය වශයෙන් පරාජය කිරීමේ මෙහෙයුමේදී මහින්ද රාජපක්ෂ මහතා ඊට නිවැරදි නායකත්වය දෙමින් ජාත්‍යන්තරය තුලද කොන්ද කෙලින් තබාගෙන සිටියේය. මහින්ද රාජපක්ෂ මහතාගේ මග පෙන්වීමෙන් හා නායකත්වයෙන් ත්‍රිවිධ හමුදාව සටන ජයග්‍රාහී මාවතක ගෙනයද්දී ඊලාම්වාදය පුස් වෙඩිල්ලක් පමණක් විය. බොහෝ ඊලාම්වාදීන් තම බෙදුම්වාදී අරමුණු අතහැර පලා ගියෝය. කරුණා අම්මාන් පිල්ලෙයාන් වැනි ප්‍රභාකරන්ගේ කල්ලියෙන් වෙන් වූවන් තම පිරිසද සමග බෙදුම්වාදය අත හැර රජයේ හමුදා වලට ත්‍රස්තවාදය තීරනාත්මක ලෙස පරාජය කිරීමේ මෙහෙයුම සාර්ථක කරගැනීමට උදවු විය. සටනේදී අත්ඩංගුවට පත් කොටි නායකයන්ටද ඊලම සිහිනයක් පමණක් බව පසක් වී තිබුණි. කේපීලාට සැඟවී සිටින්නට නොහැකි විය. සටන පරාජය වී ඊලම අත්හැරි ඔහුටද කරන්නට තිබූ එකම දෙය රාජපක්ෂ මහතාගේ නායකත්වයෙන් යුතු රජයට හා ආරක්ෂක අංශ වලට යටත්ව ඊලාම් සිහිනය අත්හැරදමා පන බේරා ගැනීම පමණි. කරුණා අම්මාන් මුලදීම ඊලම අත්හැරීය. ඔහු සටන් පැවති කල්හිදී ත්‍රිවිධ හමුදාව සමග සහයෝගයෙන් කටයුතු කර පසු කලෙක රටේ ජාතිකත්වයට ලැදි පක්ෂය වූ ශ්‍රී ලංකා නිදහස් පක්ෂයේ සාමාජිකත්වයද ලබා දෙමළ දේශපාලන ප්‍රවාහයේ බෙදුම්වාදී සලකුණට තිබූ ප්‍රභලත්වය නිශේධනය කළේය. පිල්ලෙයාන්ද පසුකාලීනව බෙදුම්වාදයට එරෙහි ගමන් මගක ගියේය. කරුණා අම්මාන්ගේ ඊලාම් බෙදුම්වාදය අත්හැරීම පසුපස වූ ප්‍රභලම සාධකය මහින්ද රාජපක්ෂ මහතාගේ නායකත්වය යටතේ කොටි ත්‍රස්තවාදය මුළුමනින් පරාජය වීම හා ජාතික බලවේග වල නැගී සිටීම හමුවේ ඊලම හා දෙමළ නිජභූමි මිථ්‍යාව පුස්සක් වීමයි.

දැන් සිදු වෙමින් පවතින්නේ කුමක්ද? මේ වසරේ ජනවාරි මස 8 වනදා සිට සිදුවූයේ යුධමය වශයෙන් පරාජය වී මතවාදීවද නන්නත්තාර වූ ඊලාම්වාදී බෙදුම්වාදීන් නැවත ක්‍රම ක්‍රමයෙන් ශක්තිමත් වීම හා නැගී සිටීමයි. පලිගැනීමේ චේතනාව පමණක් පෙරදැරීව කටයුතු කරන මෛත්‍රීපාල සිරිසේන ජනාධිපතිවරයා මහින්ද රාජපක්ෂ මහතාගෙන් පලිගැනීමට කල්පනා කළේ රටේම ජාතිකත්වය දුර්වල කිරීමෙනි. ඔහු මුලින්ම කළේ රටේ ජාතිකත්වයටත් ජාතික බලවේග වලට හිතවත් ශ්‍රී ලංකා නිදහස් පක්ෂයටත් එරෙහි විජාතික බලවේග වල ස්ථිර නියෝජිතයා වූ එක්සත් ජාතික පක්ෂයේ නායක රනිල් වික්‍රමසිංහ මහතා අගමැති කිරීමයි. ඉන් අනතුරුව ඔහු සියළු කටයුතු කළේ බෙදුම්වාදී සුළුතර අන්තවාදීන්ට සහය දෙන ජාතික මතවාද කියා නාමයක් නැති එක්සත් ජාතික පක්ෂයේත් චන්ද්‍රිකා රාජිත වැන්නන්ගේත් උපදෙස් මතයි. මෛත්‍රීපාල සිරිසේන මහතා ශ්‍රී ලංකා නිදහස් පක්ෂ නායකත්වයද තමන් වෙත ලබා ගත්තේ පක්ෂයට ඇති ලැදිකමක් නිසා නොව ශ්‍රී ලංකා නිදහස් පක්ෂය එක්සත් කාතික පක්ෂයට හා රනිල් ප්‍රමුඛ විජාතික බල කඳවුරට අවශ්‍ය ලෙස නම්මා තබා ගැනීමටය. සිරිසේන මහතා උතුරේ අධි ආරක්ෂක කලාප එකින් එක ඉවත් කළේ කිසි හෙවිල්ලක් බැලිල්ලක් නැතුවයි. ඉන් නොනැවතුනු ඔහු උතුරේ බෙදුම්වාදී දෙමළ සන්ධානයට ඔවුන්ගේ අන්තවාදය වැපිරීමට ඉඩ ලබා දුන්නේය. ඉන්දීය අගමැතිවරයා මෙරටට පැමිණ 13 වන ව්‍යවස්ථා සංශෝධනය මතක් කර දුන්නේ කළයුතු දේ සිරිසේනට කියා දෙමිනි. මෛත්‍රීපාල සිරිසේන මහතා එංගලන්තයේ සංචාරය කර එරට බල්ධාරීන්ගෙන්ද උපදෙස් ගෙන පැමිණියේය. සිරිසේන රනිල් ආණ්ඩුව ජාත්‍යන්තරයේද නොකඩවා පොරොන්දු දී තිබෙන්නේ උතුරු නැගෙනහිරට බලය බෙදා දෙන බව හා යුධ අපරාධ සොයා බැලීමට ජාත්‍යන්තර බලපෑම් මත දේශීය යාන්ත්‍රණය නම් උගුල අටවා රනවිරුවන්ටත් ඊට නායකත්වය දුන් අයටත් දඬුවම් කරන බවටයි.

මහින්ද රාජපක්ෂ මහතාගේ නායකත්වය යටතේ ශක්තිමත්ව හා සුරක්ෂිතව තිබූ ස්වදේශීයත්වය හා ජාතිකත්වය දුර්වල වී දැන් නැවත විජාතික බලවේග සියල්ල ශක්තිමත් වී ඇත. කොටින්ම කීවොත් දැන් මේ රට නැවතත් චන්ද්‍රිකා රනිල් යුගයේ මෙන් පාලනය කරන්නේ ඊලාම්වාදීන්, බටහිර රටවල තානාපතිවරු, බටහිර රටවල් හා ඉන්දියාව මෙන්ම රාජ්‍ය නොවන සංවිධාන එක්වයි. රට ගැන තීරන ගන්නේ ඔවුන්ය. දැන් ඔවුන් විසින් රටේ ජාතිකත්වයටම එරෙහිව ජාත්‍යන්තර නීති කතා කරති. ඊලාම්වාදී බෙදුම්වාදීන් නව පනක් ලබා ඇත. මහින්ද රාජපක්ෂ මහතාගේ පාලන සමයේ හැම අතින්ම පරාජය වී සිය ස්ව‍යංපාලන බලාපොරොත්තුව සුන් කරගත් ඊලාම් බෙදුම්වාදීන්ට දැන් රජ මගුල්ය. ජාත්‍යන්තර දෙමළ කොටි ඩයස්පෝරාව නැවතත් අපේ රටට එරෙහිව පල් බොරු ගොතමින් ජාත්‍යන්තරය තුල යකා නටමින් රටබේරාගත් නායකයන්ටද තර්ජනය කරති. එහෙන් දෙමුහුම් යුධ අධිකරණ පිහිටුවීමට කැසකවමින් එය වසන් කිරීමට කප්පරක් බොරු මාධ්‍ය හරහා උදේ හවා ප්‍රචාරය වෙමින් තිබේ. මේ ජාතික බලවේග වල තාවකාලික පසුබෑමක් වුවත් මෙසේ පසුබසින සුළු කාලයට විජාතික බලවේග විසින් අටවන මර උගුල් බොහෝය. දැන් විජාතික බලවේග වල හා ඊලාම්වාදීන්ගේ නැවත ශක්තිමත් වීම තුල මුලින් කී ලෙසට බෙදුම්වාදය අත්හල කොටින්ට සහය වූ පිරිස් හා කරුණා අම්මාන් වැනි ජාතිකත්වය පිළිගෙන මහින්දගේ නායකත්වය යටතේ බෙදුම්වාදයෙන් තොර ගමනක් යෑමට සිටියවුන්ද විජාතික යහපාලනයේ ආශිර්වාදයෙන් නැවතත් බෙදුම්වාදය දෙසටම තල්ලු වෙමින් ඇත.

ඒ විජාතික ගැති යහපාලන ආණ්ඩුව විසින් රටේ ජාතිකත්වය දියකර හරිමින් විජාතික බලවේග හා ඊලාම්වාදීන් ශක්තිමත් කිරීමේ ද්‍රෝහී නිවට ප්‍රතිපත්තිය හමුවේ නැවතත් කරුණා අම්මාන් වැනි බෙදුම්වාදය අත්හල පුද්ගලයන්ට පවා ඊලාම්වාදයේ ප්‍රලාප ගැන නැවත විශ්වාසයක් ඇති වීම නිසාය. ඔවුන්ට රටේ ජාතිකත්වය තුල තමනට ඇති යහපත් පැවැත්ම ගැන තිබූ විශ්වාසය නැතිකර තිබෙන්නේත් සිංහල ජාතියේම අවාසනාවට සිංහල මෝඩ ජනයාගේ ආශිර්වාදය ඇතිව බලයට පත් වූ යහපාලන පෙරේත කුම්භාණ්ඩ රැලය. එක් පසෙකින් දැවැන්ත ජාතික බලවේගයක් නැවතත් ගොඩනැගෙමින් ඇත්තේ දිනෙන් දින විජාතික යහපාලනය ජනතා අප්‍රසාධයේ අන්ත කෙලවර කරා වේගයෙන් ඇදෙන අතරතුරයි. ජාතික බලවේග වටා කොපමණ ජන බලවේගයක් ඒකරාශී වුවත් මෙවර බටහිර හා ඉන්දියාව ප්‍රමුඛ විජාතික බලවේග මෙරට දෙමළ ජාතිවාදීන් හා ඉස්ලාමික අන්තවාදීන්ද සමග ජාතික බලවේගයට එල්ල කරන පීඩනය කිසිසේත් සුළුපටු එකක් නොවනු ඇත. අභියෝගයේ තරම කුමක් වුවත් කුමන කැප කිරීමක් කර හෝ මේ පීඩනයෙන් ගැලවී ජාතිකත්වය නගා සිටුවා වසර දහස් ගනනක් තිස්සේ රැකගෙන ආ රට ඉදිරියටද සුරක්ෂිත කිරීමට රටට සැබෑ ලෙස ආදරය කරන සියළු දේශප්‍රේමී ජනතාව බලවත්ව අධිෂ්ඨාන කරගත යුතුය.

-බණ්ඩාර දසනායක
යුතුකම සංවාද කවය
www.yuthukama.com 

Like us on facebook
https://www.facebook.com/yuthukama

, ,

ඔබේ අදහස මෙතන ලියන්න...

ඔබේ ෆේස්බුක් ගිණුම භාවිතයෙන් මෙතනින් අදහස් පළ කරන්න.

1 comment :

  1. කරුනාට සති කීපයකට කලින් ඩග්ලස් දේවානන්දා ත් ප්‍රකාශ කර තිබුනේ උතුරේ ඉඩම් ජනතාවට ලබාදීම ඉක්මන් කල යුතු බවයි. ඩග්ලස් දේවානන්දා ද බෙදුම්වාදය අත්හැර (අවම වශයෙන් අමතක කර හෝ) රාජපක්ෂ ආන්ඩුව සමග සහයොගයෙන් කටයුතු කල අයෙක් වන අතර ඔහුගේ මේ ප්‍රකාශයෙන්ද පෙනෙන්නේ දෙමල දේශපාලකයන් අතර නැවත මතුවෙමින් එන දෙමල ජාතිකයින්ගේ අභිලාෂයන් පිළිබඳ රැල්ලයි. ඒ පිලිබඳ මේ ලිපියේ විශ්ලේෂනයට එකඟ වන අතර මේ තත්ත්වයට හේතුවන තවත් එක් කරුනක් මතු කල යුතුය. එනම් යහ පාලන යයි කියා ගන්නා මේ ආන්ඩුවේ ක්‍රියාකාරීත්වය තුල දෙමල ජාතික සංධානය ඊට ප්‍රතිවිරුද්ධ අනෙකුත් දෙමල ජාතික දේශපාලන කන්ඩායම් වලට සාපේක්ෂව උතුරේ දෙමල ජාතික ජනතාව අරබයා අසහාය වාසියක් අත්කරගෙන තිබීම යි. දෙමල ජාතික සංධානයේ සටන් පාට ආරක්ෂක හමුදා උතුරින් ඉවත් කිරීම, එල් ටී ටි යේ මියගියවුන් වීරත්වයට පත් කිරීම, ඉඩම් ආපසු ලබා ගැනීම වැනි දෙමල ජාතිවාදී සහ දෙමල ජනතාව පහසුවෙන් ආකර්ෂනය වන සුලු ඒවා වන අතර ඊට රාජ්‍ය අනුග්‍රහය, අනුමැතිය මෙන්ම ආශිර්වාදයද හිමි වන බව සාමාන්‍ය දෙමල ජනතාවටද පෙනේ. මේ හමුවේ අනෙකුත් දෙමල ජාතික පක්ෂවලට ද අභිලාෂවාදී දෙමල ජාතිවාදයට කිට්ටු පැරනි සටන්පාට හරහා දෙමල ජනතාවට සමීපවීම හැර වෙන විකල්පයක් නැති කර තිබීම බෙදුම් වාදය අත් හැර ඇති බවට පෙනෙන්ට තිබූ දේශපාලකයින් නැවත එම සටන් පාට වලට පැමිනීමට හේතුවක් ව ඇත. මේ අනුව බලන විට ජනාධිපතිවරයාට එම නිලයට හිමි පව්රුෂය ශාරීරිකව මෙන්ම මානසිකවද නොමැති කමත් ඉන් වාසි ලබන බෙදුම්වාදයට සහ අධිරාජ්‍යවාදයට ලංකාව තුල ඉඩ සැකසීමේ සංසාරික උවමානවෙන් සිටින අගමැතිවරයාත් හරහා රට නැවත පැමින තිබෙන්‍ෙ ඉතා අවදානම් සහගත තැනකට බව පැහැදිලිය.

    ReplyDelete

ෆේස්බුක් ගිණුමක් නොමැතිවත් මෙතනින් ඔබේ අදහස පළ කළ හැක .

කිණිහිරය

හීන් සැරය

කෙටි සටහන්

මාධ්‍ය ගබඩාව

ප්‍රවර්ග

1505 2015 BBS NGO Theory අනගාරික ධර්මපාල අනුර කුමාර අමරසේකර ආචාර්ය දයාන් ජයතිලක ආමන්ඩ් ද සූසා ඉන්දු ලංකා ඊළාම් ඊළාම්වාදී එජාප කවි කවි විචාර කාලය කෙටි කතා ගම්මන්පිල ගැමුණු චම්පික චිත්‍රපට විචාර චින්තනය ජනපතිවරණය ජනාධිපතිවරණය ජයග්‍රහණය ජවිපෙ ජාතික බලවේග ජාතිකවාදය ජාතිය ජිනීවා තිස්‌ස තී‍්‍ර රෝද රථ ත්‍රීකුණාමලයේ ආනන්ද දකුණු අප‍්‍රිකානු දහතුන දේශපාලන නසරිස්‌තානය නිදහස නෝනිස් පොත් ප්‍රකාශකයන් පොදු අපේක්‍ෂයා බම්බුව බලු කතා බුදු දහම බෙංගමුවේ නාලක බෙදුම්වාදය බෙදුම්වාදී බෞද්ධයා භාෂාව මරක්කල මහ නාහිමි මහින්ද මහින්ද රනිල් මානව හිමිකම් මුස්‌ලිම් මෛත්‍රිපාල යටත්විජිතකරණය රණ විරුවා රනිල් වික්‍රමසිංහ රන් කරඬුව රාජතාන්ත්‍රික රාජපක්‍ෂ ලේකම් වහාබ් විජේවීර විධායක බලය විමුක්ති වනිගසේකර වෙනස සැපද සංගීතය සජින් සමාජ විචාර සරච්චන්ද්‍ර සාහිත්‍ය හා විචාර සිංහල සිංහල බුද්ධාගම සීපා ස්වර්ණ පුස්තක හෙළ උරුමය

පාඨක අදහස්

© 2014 www.yuthukama.com