ඉහත අදහස පෙරේදා මා හා දුරකතනයෙන් පැවසූයේ මහාචාර්ය ගාමිණි සමරනායකයන් ය. මහාචාර්ය සමරනායක 71 කැරැල්ලට ඍජුව දායක වූ හිටපු කැරලිකරුවෙකු බව ප්‍රකට ය. එහෙත් ඔහු වහා ඇත්ත තේරුම් ගත්තේ ය. එවන් වියතුන් කී දෙනෙකු නම් මෙරට සිටිත් ද?
සමරනායක මහතා පවසන කාරණය ගැඹුරින් සිතා බැලිය යුතු දෙයක් ලෙස යෝජනා කරමි. ඇත්ත වශයෙන් ම ජනතා විමුක්ති පෙරමුණ මෙරට බලයට ඒනම් මේ වන විට එය සිදු වී හමාර ය. කිසියම් පක්‍ෂයක් රටක බලයට ඒම යනු විවාහයක් බඳු ය. විවාහය සිදු වන්නේ පක්‍ෂය විසින් ඉදිරිපත් කරන වැඩපිළිවෙල හා ජනතාව අතර ය. අවුරුදු පනහක් වැනි ඉතා දිගු කාලයක් තුළ කිසියම් පක්‍ෂයකට රටක ජනතා ඡන්දයෙන් බලයට එත නොහැකි නම් එය ජනතාවගේ ප්‍රශ්නයක් නොව අදාළ පක්‍ෂය විසින් ඉදිරිපත් කරන වැඩ පිළිවෙල රටක් විසින් පිළි නොගැනීම පිළිබඳ ප්‍රශ්නයකි. එහි අර්ථය වන්නේ ජනතා විමුක්ති පෙරමුණ පිළිබඳ ජනතා විස්වාසයක් මෙරට ජනයා තුළ නොතිබීම හැර අන් කුමක් ද?
ජනතා විමුක්ති පෙරමුණ මෙරටට කළ විශාලතම සේවය නම් ඔවුන් විසින් ම පසුව අතරමග දී හැර දැමූ ත්‍රස්තවාදයට එරෙහි සටනට සහාය වීම ය.ඒ ද සිදු වූයේ එවකට විමල් ඇතුළු පිරිස එම පක්‍ෂය තුළට ගෙන්වා තිබූ ජාතිකවාදය නිසා ය. විමල් ඉවත් වීමෙන් ජවිපය නැවතත් කිසිදු ප්‍රායෝගික වැඩ පිළිවෙළක් නැති, හුදු පැණිරස විවේචන පමණක් ඉදිරිපත් කරන චුයින්ගමයක තත්වයට වැටුණේ ය. අපි චුයින්ගම් කන්නේ බඩගින්නට නොවේ. එහෙත් කම්මැලිකමට ය. කෙසේ වෙතත්, චුයින්ගම් කෑමේ භයානක බව වැටහෙන්නේ දිවට පමණක් රස දෙන එමගින් බඩ රැවටීමෙන් ගැස්ට්‍රික් වැළදුණු පසුව ය.
කලක සිට ජවිපයට අවශ්‍ය වන්නේ තමන්ට කසාදයක් බැඳගත නොහැකි හෙයින් කසාද බැඳ සිටින රට ගැස්ට්‍රික් ලෙඩෙකු කිරීම ය. විශ්වවිද්‍යාල පද්ධතියට යළි සුවකළ නොහැකි ලෙස ඔවුන් එය සාර්ථක ව බෝ කොට තිබේ. ජවිපය මහින්දට පහර පිට පහර දෙන්නේ මහින්ද යටතේ යුද්ධය නැවතී රටට නිසි සංවර්ධන දිසාවට යොමු වූ බැවිනි. රට නැගුණොත් ජවිපයට විවෙචනය කිරීමට ප්‍රශ්න ඉතිරි වන්නේ නැත. මේ අතර, ජවිපය රනිල්ට සහාය දෙන්නේ රනිල් යටතේ රට නැවතත් අරාජික වී හතර අතින් රටේ ප්‍රශ්න ඔඩු දුවන තැන එම ප්‍රශ්න හරහා තමන්ට ඡන්ද කුට්ටියක් කඩා ගැනීමේ අවස්ථාවක් ලැබෙන නිසා හැර සද්භාවයකින් නම් නොවේ. මෙම අති භයානක දේශපාලන උපක්‍රමය වටහා ගැනීමට තරම් මේ රට සමත් ද?
-මහින්ද පතිරණ
යුතුකම සංවාද කවය
www.yuthukama.com
0 comments :
ෆේස්බුක් ගිණුමක් නොමැතිවත් මෙතනින් ඔබේ අදහස පළ කළ හැක .