බටහිර කුමන්ත්‍රණ හුඹස් බියක්ද?

'බටහිර කුමන්ත්‍රණ' යන වචනය අපේ රටේ දේශපාලනයේ සුලභව භාවිතා උන එක් වචනයකි. කාලයක් තිස්සේ භාවිත කිරීම නිසාත් එ.ජා.ප. ඇතුළු බටහිර හිතවාදී බලවේග විසින්
නිරන්තරයෙන් එවන් බටහිර බලපෑමක් නොමැති බව කරන ප්‍රකාශ නිසාත් බටහිර කුමන්ත්‍රණ පිලිබඳ අවධානය සහ වැදගත්කම අපේ රටේ මිනිසුන්ගේ හිසින් ගිලිහී යමින් පවතියි. නමුත් බටහිර කුමන්ත්‍රණ වල ක්‍රියාකාරීත්වය ඉතා ප්‍රබලව ක්‍රියාත්මක වන වත්මන් සමයේ එහි වැදගත්කම නැවත මතුකළ යුතුමය. මෙම රූපයේ දැක්වෙන්නේ ලෝකයේ ඇමරිකානු හමුදා කඳවුරු තිබෙන ස්ථාන සහ ඒවායේ බල ව්‍යාප්තිය පිලිබඳව දක්වන සිතියමක්. ඒ වගේම ඇමරිකානු කඳවුරු ඇතැයි සැක කෙරෙන සහ පිහිටුවීමට උත්සාහ කරන ස්ථානයනුත් මේකෙ 'කොළ' පාටෙන් දක්වල තියෙනව(අපේ රටත් එහෙම ස්ථානයක් ලෙස දක්වලා තියෙන බව දකින්න පුලුවන්). ලෝකය පුරා රටවල් විශාල ප්‍රමානයක ඇමරිකානු කඳවුරු සිය ගණනක් මේ ආකාරයෙන් ස්ථාපනය කරල තිබෙන්නේ ඔවුන්ගේ ගෝලීය ආධිපත්‍යය තහවුරු කිරීමටයි.  මෙහි දැක්වෙන ආකාරයට ඇමරිකානු බල ව්‍යාප්තිය අඩුවෙන්ම තියෙන්නේ ආසියානු කලාපයේ ප්‍රදේශ කිහිපයකය. ඇමරිකානුවො අනිත් ප්‍රදේශ වල බලය ව්‍යාප්ත කරල මේ ටික විතරක් අත් ඇරල තියෙන්නේ ස්ව කැමැත්තෙන් නොවෙයි. ඇමරිකාවට මේ ප්‍රදේශ අත් හරින්න වෙලා තියෙන්නේ රුසියාව, චීනය සහ ඉන්දියාව විසින් ආසියානු කලාපයේ ප්‍රබලව නැගී සිටීම නිසා. එහෙත් ඇමරිකාව මේ කලාපයේ බලය ව්‍යාප්ත කිරීමේ නිරන්තර උත්සාහය අත් හැර නොමැත. මෙහිදී ඇමරිකාව ප්‍රමුඛ බටහිර බලවේග ප්‍රධාන වශයෙන් පාර්ශව තුනකින් ආසියානු කලාපයට ඇතුල් වීමට උත්සාහ කරන බව පෙනෙයි. රුසියාවට බටහිරින් ඇති යුක්‍රේනය, ජෝජියාව, ආර්මේනියාව ආදී වූ සෝවියට් දේශය බිඳී ආ රටවල් පලවෙනි පාර්ශවයයි. යුක්‍රේනයේ ගිය අවුරුදු දෙකක පමණ සිට බටහිර බලවේගයන්ගේ උදව්වෙන් ඇති කරන ලද අරගල, ප්‍රජාතන්ත්‍ර විරෝධී ආණ්ඩු පෙරලීම සහ කැරලි හේතුවෙන් බොහෝ ගණනක් මිය ගොස් රට බෙහෙවින් අස්ථාවර තත්වයකට පත්වී තිබෙයි. ජෝජියාවේද පාලනය බටහිර ගැති රූකඩ පාලනයකින් ප්‍රත්ස්ථාපනය කර ඇති අතර පසු ගිය මාස කිහිපයේ ආර්මේනියාවේද අවුළුවන්නට උත්සාහ කර අරගලය ව්‍යර්ථ වී ගියේය. මෙසේ කුමන්ත්‍රණ සහ ලේ වැගිරීම් මඟින් පිහිටුවා ගත් ආණ්ඩු හරහා එම රටවල් වල තවත් ඇමරිකානු යුධ කඳවුරු පිහිටුවීම, එම රටවල් වලට NATO සංවිධානයේ සාමාජිකත්වය ලබා දීමට ඇමරිකාව උත්සාහ කරමින් සිටියි. දෙවනි පාර්ශවය ජපානය, පිලිපීනය, වියට්නාමය ආදී වූ දකුණු චීන මුහුද අවට ඇති රටවල්ය. ඇමරිකාව විසින් එම රටවල් අතර පෙර නොතිබූ දකුණු චීන මුහුදට අයිතිවාසිකම් කීමේ බල අරගලයක් නිර්මාණය කර ඇත. චීනයට විරුද්ධව එම රටවල් වලට උදව් කරන ආකාරයෙන් ඔවුන්ගේ යුධ ආධිපත්‍යය සහ හමුදා කඳවුරු එම කලාපය තුළ පතුරවමින් සිටියි. තෙවන පාර්ශවය අපේ රටයි. අපේ රටේ භූගෝලීය පිහිටුම නිසා ඇති උපායමාර්ගික බව වැදගත් වෙන්නේ මෙහිදීය. ඇමරිකානු බල ව්‍යාප්තිය දුර්වල ආසියානු කලාපයේ මධ්‍යගතව සහ නෞක වෙලඳ මාර්ගයේ මධ්‍යගතව අපේ රට පිහිටා තිබෙයි. අපේ රටේ පිහිටුවන ප්‍රබල යුධ බලකොටුවකට ඉන්දියාවේ ඇතුළු ආසන්න රටවල් සහ කලාපයට යුධමය ලෙස ප්‍රබල බලපෑමක් ඇති කළ හැකිය. පෙරදිග සහ අපරදිග අතර මුහුදෙන් සිදුවෙන වෙළඳාම සහ චීනය කොරියාව ආදී කාර්මික රටවල් වලට අත්‍යවශ්‍ය ඛණිජ තෙල් ප්‍රවාහනය වෙන්නේ අපේ රට ආසන්න මුහුදු මාර්ගයෙන්ය. පහත සිතියමෙන් එය පැහැදිලි වෙයි. එම නිසා අපේ රටේ පිහිටුවන යුධ කඳවුරකට මුහුදු මාර්ගය ඇසුරෙන් සිදුවෙන වෙළඳාම පාලනය කිරීම සහ ඛණිජ තෙල් ප්‍රවාහනයට බාධා කිරීමෙන් චීනය ආදී රටවල කටයුතු අඩාළ කල හැකිය. මේ ආදී වශයෙන් වන තවත් හේතූන් නිසා ඇමරිකානු දේශපාලකයන්ට අපේ රට වැදගත් ස්ථානයක් වෙයි. අපේ රට බටහිර කුමන්ත්‍රණ වලට ඉලක්ක වන්නේ මේ නිසාවෙනි.බටහිර බලවේග අපගේ රටේ පාලනයට ඇතුල් වීමට ආකාර කිහිපයකින් උත්සාහ කරයි. යුධ අපරාධ චෝදනාව ඉන් එකකි. බටහිර රටවල් වලට මිතුරු ඊශ්‍රායෙලය පලස්තීනයේ ළමයින් ඇතුළු සිවිල් වැසියන් සිය ගණන් මරා දැමුවද ඔවුන්ට එ.ජා. මානව හිමිකම් කමිටුවෙන් ගැටළුවක් නැත.ඇමරිකාව සහ බටහිර රටවල් විසින් ඇෆ්ගනිස්තානයේ සහ ඉරාකයේ දියත් කළ යුද්ධ මඟින් ද සිවිල් වැසියන් ලක්ෂ ගණනින් ඝාතනය වුවද ඊටද එම රටවල්ද මානව හිමිකම් කමිටුවෙන් ප්‍රශ්න නොකෙරෙයි. එහෙත් ත්‍රස්තවාදය අවසන් කර මනුශ්‍ය ඝාතන අවසන් කළ අපේ රටට යුධ අපරාධ පීඩනය සහ ඒ හරහා එන සම්බාධක මඟින් රටට පීඩනය එල්ල කර ඔවුන්ගේ දේශපාලන අරමුණු වලට නැමෙන තත්වයකට අපිව පත් කිරීමට උත්සාහ කරති. මේ උත්සාහය තවමත් ක්‍රියාත්මක වෙයි. දෙවනි ආකාරය වන්නේ වඩාත් බටහිර ගැති පාලකයන් සහ රජයක් පිහිටුවා ගැනීමෙන්ය. ඔවුන් වර්තමානයේ බලයට පත් රජයේ එ.ජා.ප. නායකත්වය බලයට පැමිණි වහාම ඇමරිකානු රාජ්‍ය ලේකම් වරයා සහ බටහිර දේශපාලකයන් අපේ රටට ආරාධනා කර ගෙන්වා ගැනීම, අපිට යුධ සමයේ සහ ඉන් පසුව සංවර්ධනයට බොහෝ සේ උදව් කර චීනයේ වරාය නගරය(port city) වැනි ව්‍යාපෘති නවතා දැමීමෙන් මේ බව පැහැදිලි වෙයි. තුන් වෙනි ආකාරය වන්නේ වෙනත් රටවල් වලද සිදු කළ ආකාරයෙන් බටහිර ගැතිකම් නොදක්වන පාලකයන් සහ දේශපාලන නායකයන් හට විවිධ ක්‍රම මඟින් චෝදනා එල්ල කරමින්, ව්‍යාජ ප්‍රතිරූපයන් මවාපාමින් ගෙනයන මානසික යුධමය(psychological warfare) ක්‍රියාමාර්ගයයි. අපේ රටේ මෙය පසුගිය කාලයේ ඇති වූ ඊනියා මෙගා චෝදනා ඩීල් රැල්ල මඟින් මනාව පැහැදිලි වෙයි. අපේ රටේ තිබූ ත්‍රස්තවාදී යුද්ධය සහ බෙදුම් වාදය බටහිරයන් උපයෝගී කරගන්නා අනෙක් මාර්ගයයි. කිසිදු බටහිර රටක් ත්‍රස්තවාදයට එරෙහි යුද්ධයේදී අපේ රටට ආධාර නොකළ නමුත් ඔවුන් කොටි ත්‍රස්තවාදීන්ට උදව් කර තිබූ ආකාරය යුද්ධයෙන් පසුව සොයාගත් බටහිරයන් විසින් සැපයූ යුධ සහ තාක්ෂණ උපකරණ මඟින් පැහැදිලි විය. අදටත් යුධ අපරාධ චෝදනා එල්ල වී ඇත්තේ මානුශීය මෙහෙයුම් කල රජයේ හමුදාවට මිසක් බස් වලට බෝම්බ තබා සිවිල් වැසියන් ඝාතනය කළ ත්‍රස්තවාදී සංවිධානයට නොවෙයි. යම් හෙයකින් කොටි ත්‍රස්තවාදීන් හෝ වර්තමාන බෙදුම්වාදී දේශපාලකයන් උතුරු නැගෙනහිර ෆෙඩරල්, ස්වයං නිර්ණය හෝ ඉඩම් බලතල සහිත පාලනයක් ලබාගතහොත් ඒ හරහා බටහිරයන්ට උතුරේ ඔවුන්ගේ යුධ අට්ටාල ගසාගැනීමට අවකාශ ළඟා කර ගනු ඇත. මේ ආකාරයෙන් බොහෝ ක්‍රම මඟින් ඇමරිකාව ප්‍රමුඛ බටහිර බලවේග අප රටේ දියුණුවට, දේශපාලනයට, ආරක්ශාවට සහ ඒකීයත්වයට තර්ජන එල්ල කරමින් ඔවුන්ගේ දේශපාලන අරමුණු මුදුන්පත් කරගැනීමට උත්සාහ කරයි

බටහිර කුමන්ත්‍රණ අපිට විතරක් ඇයි? මෙය ඇතමෙක් අසන ප්‍රශ්නයකි. බටහිර කුමන්ත්‍රණ ඇත්තේ අපිට පමණක් නොවෙයි. බටහිර කුමන්ත්‍රණ මඟින් අපිට වඩා බොහෝ විනාශයන් අත් වූ රටවල් බොහොමයක් ලෝකයේ ඇත.ලිබියාව, යුක්‍රේනය, සිරියාව, ඉරාකය ආදී රටවල් මෑත කාලීනව බටහිරයන් හමුවේ විනාශයට සහ අස්ථාවර බවට පත් වූ රටවල් වෙති. අප්‍රිකා මහද්වීපයේ දියුණුම රටවූ ලිබියාවට ඇමරිකාව, ප්‍රංශය ඇතුළු බටහිර රටවල් වලින් ප්‍රහාර එල්ල වූයේ ඒකාධිපති පාලනය සහ ප්‍රජාතාන්ත්‍රවාදය නොමැති බව චෝදනා කරමින්. සාමය, ස්ථාවරත්වය සහ සංවර්ධනය හොඳින් පැවතුන ලිබියාව අද ආගමික අන්තවාදීන්ගේ සහ ගෝත්‍රිකයන්ගේ යුද පිටියකි. විනාශ වූ රටකි. යුක්‍රේනයද පෙර තිබුනාට වඩ ආර්ථිකව සහ දේශපාලනිකව බොහෝ සේ අස්ථාවර රටකි. සිරියාවේ සහ ඉරාකයේ බටහිරයන් කරන ලද ක්‍රියාදාමයන්ගේ ප්‍රතිඵල වශයෙන් දිනපතා මිනිසුන් සිය ගණන් ඝාතනය වෙයි. මිනිසුන් පෙළට තබා වෙඩි තබන, පිහි කෑලි වලින් බෙලි කපනා ISIS ත්‍රස්තවාදී සංවිධානය බිහිවීමට මඟ පෑදුවේද ඇමරිකානු ආක්‍රමණ මඟින් ඉරාකය සහ සිරියාව අස්ථාවර වීමයි. කලින් එක් රටක් වෙලා තිබ්බ සුඩානය දැන් බටහිර රටවල් වල ආශිර්වාදයෙන් රටවල් දෙකක්. දෙකට කැඩුන රටවල් දෙකේ දේශසීමාවේ දිනපතා ගැටුම් සහ ඝාතන. මේ රටවල් බෙදීමේ ප්‍රධාන හවුල් කරුවා තමයි 2002 සමයේ රනිල් වික්‍රමසිංහ සටන් විරාම ගිවිසුම් ගහන්න හවුල් කරගත්තෙත් අපේ රටේ ෆෙඩරල් විසඳුම් ගේන්න ප්‍රධාන ලෙස උත්සාහ කරපු බාහිර බලවේගය. මේ ආදී වූ සිදුවීම් වලින් පැහැදිලි වන්නේ බටහිර රටවල් අපේ රටට විතරක් නෙමෙයි තව බොහෝ රටවල් වලට බලපෑම් සහ කුමන්ත්‍රණ කරමින් එම රටවල් වලට විනාශකාරි ප්‍රතිඵල අත්කර දී ඇති බවයි.තත්වය මෙසේ වී නම් බටහිරයන් යක්ශයන්ද? ඔවුන් සමඟ සියළුම සබඳතා අත් හිටුවිය යුතුද? ඇතමෙක් අසන මෙම ප්‍රශ්නයට පිලිතුර වන්නේ අප කිසි විටකත් එවැන්නක් අදහස් නොකරන බවයි. ප්‍රශ්නය ඇත්තේ බටහිර සාමාන්‍ය ජනයා සමඟ නොව බටහිර දේශපාලනය සහ ඒ හා බැඳුන නූතන අධිරාජ්යවාදය සමඟය. ඒ වගේම බටහිර දේශපාලන සබඳතාද අපි පවත්වාගත යුතු වන්නෙමු. නමුත් ඔවුන් කවරෙක්ද, ඔවුන් අපි යුද්ධයේ සිර වී සිටින විට අපිට ක්‍රියා කළේ කෙසේද යන්න මතකයේ තබාගෙන ඔවුන් කරේ තබාගන්නේ නැතුව අතේ දුරින් තබා ගත යුතුය. ආර්ථික සහ දේශපාලනික සබඳතා තව දුරටත් බටහිරයන් සමඟ පවත්වා ගැනීම ඉතා වැදගත්ය. දින 100යෙ ආණ්ඩුව මෙන් අපිට බටහිර හිතවාදි වීමට හෝ ඔවුන්ට පාවඩ දැමීමට තරම් බටහිරයන් කිසි ලෙසකින් වත් අපිට හිතවාදී නොවූහ. තවමත් ඔවුන් මාන බලන්නේ යුද්ධය දිනා රටට සාමය ගෙන දුන් යුධ විරුවන්ට යුධ අපරාධ චෝදනා එල්ල කිරීමටය. ඒ ලෙසම අපිට යුධ සමයේදී මෙන්ම මානව හිමිකම් චෝදනා වලදී අපට උදව් කළ චීනය සහ රුසියාව ආදී රටවල් සමඟ සබඳතා තර කර ගත යුතුය. ඇතමුන් පසුගිය ආණ්ඩුවට චෝදනා නැගුවා අපේ රට චීන කොලනියක් කරන්න හදන බවට. නමුත් බටහිරයන් රටවල් වලට බලපෑම් කරන ආකාරයෙන් හෝ කුමන්ත්‍රණ කරන ආකාරයෙන් චීනය වෙනත් රටකට බලපෑමක් කර ඇති අවස්ථාවක් අසන්නට නොලැබේ. එමෙන්ම බටහිර බලවේග මඟින් ක්‍රියාත්මක වෙන අන්තර්ජාතික මූල්‍ය අරමුදල වැනි ආර්ථික මර උගුල් ආයතන සමඟ ගනුදෙනු කිරීමට වඩා චීනය හෝ අන්තර්ජාතික මූල්‍ය අරමුදලට විකල්පයක් ලෙස BRICS රටවල් විසින් පිහිටවූ මූල්‍ය අරමුදල වැනි ආයතන සමඟ ගනුදෙනු කිරීම සහ සංවර්ධන ණය ලබා ගැනීම වඩා යෝග්‍ය වෙයි. මේ ආකාරයෙන් විදේශ රටවල් සහ බලවේග නිවැරදිව හඳුනාගෙන ඔවුන් සමඟ ගනුදෙනු කිරීම වඩාත් වැදගත් වෙයි.අවසන් වශයෙන් කිව යුත්තේ යුද්ධය නිම වූවාට දෙමළ බෙදුම් වාදය අවසන් වී නොමැත. ෆෙඩරල්, ස්වයං නිර්ණ අයිතිය, බලය බෙදීම පිලිබඳව දෙමළ බෙදුම්වාදීන්ගේ උත්සාහයද ඊට බටහිර උපකාරයද අවසන් වී නොමැත. යුධ අපරාධ චෝදනා, සම්බාධක තර්ජන විසඳී හෝ අවසන් වී නොමැත. කොටින්ම බටහිරයන් අපේ රටට උගුල් ඇටවීම නැවතී නොමැත. බටහිර කුමන්ත්‍රණ යන වචනය දේශපාලන සටන් පාඨයක් ලෙස මිනිසුන්ට එපා වී තිබුණද බටහිර කුමන්ත්‍රණ අනතුර මඳකිනුදු අඩු වී නොමැත. කියුබාවේ ෆිදෙල් කැස්ත්‍රෝ ඝාතනය කිරීමට ඇමරිකානුවො 600 වතාවකට අධිකව උත්සාහ දරා ඇති බව සඳහන් වෙයි. දශක ගණනාවක සිට කියුබාව, සහ සෝවියට් දේශයෙන් බිඳුනු රටවල් වලට කුමන්ත්‍රණ කරමින් සිටියි. එම නිසා අපේ රටට එරෙහි යටි උගුල් අවුරුදු තුන හතරකින් අවසන් නොවෙයි. රටේ නායකයන් මේ පිලිබඳව නිරන්තරයෙන් අවධානයෙන් සිටිය යුතු අතර ජනතාව තමන්ගේ බඩට වඩා රට ගැන සිතා එකමුතුව සිටිය යුතු වෙයි. බටහිර ජාතීන් අපිට 1505එ සිට පහර දුන්හ. 1815දී සම්පූර්ණයෙන්ම අපේ රට අල්ලගෙන 1948 වන තෙක් පාලනය කළහ. එනිදු නොනැවතී තව දුරටත් විවිධ ආකාරයේ බලපෑල් එල්ල කරමින් සිටිති. අද ක්‍රියාත්මක වන්නේ එහි නූතන අධිරාජ්‍යවාදී ස්වරූපයයි. මේ බලපෑම් සහ කෙණිහිලි කම් තව අවුරුදු බොහෝ ගණනක් පවතිනු ඇත. ඒ පිලිබඳව අපි දැනුවත් විය යුතු මෙන්ම ඊට එරෙහිව ශක්තිමත් විය යුතු වෙයි. රටේ ජනතාව දේශපාලකයන් තේරීමේදී මේ කාරණාවද සැලකිල්ලට ගත යුතුය. බටහිරයන් සමඟ වැඩි සෙනෙහෙ දක්වන ඔවුන් පස්සේ යන එ.ජා.ප නායකයන් වැනි දේශපාලකයන් වෙනුවට රාජ්‍ය සබඳතාවන් ප්‍රතිපත්තිය බුද්ධිමත්ව කරන අපිට විපතේදී උදව් කර චීනය සහ රුසියාව ආදී රටවල් සමඟ වඩා හිතවාදී දේශපාලකයන් තෝරාගැනීම වඩාත් වැදගත් වෙයි.

-සේනක කුමාරසිංහ

යුතුකම සංවාද කවය

www.yuthukama.com