-ජ්‍යේෂ්ඨ කතිකාචාර්‍ය මහින්ද පතිරණ-පසුගිය පැරිස් ප්‍රහාරයේ ප්‍රධාන සැකකරුවෙකු වූ සලේ අබ්දෙස්ලාම් බ්‍රසල්ස් නුවර දී අත්අඩංගුවට ගෙන සතියක් යෑමටත් පෙර ඊට පළිගැනීමක් ලෙස අයිසිස් ත්‍රස්තයන්ට යුරෝපයේ හදවත තුළ ඊයේ වන් ප්‍රහාරය සැලසුම් කිරීමට හැකි වීම සැමගේ විමතියට ලක්ව තිබේ. යුරෝපය පුරා විසිරී සිටිමින් අවශ්‍ය වූ විට මහා පරිමාන ප්‍රහාර එල්ල කළ හැකි තරම් දියුණු තත්වයට අන්තවාදි ඉස්ලාම් ත්‍රස්ත ජාල ක්‍ෂණික හා සක්‍රීය බව මින් පැහැදිළි වේ. මෙය එම කලාපයේ ආරක්‍ෂාව දුබලවීම පිළිබඳ පැහැදිළි සත්‍යයකි. බුෂ් සමයේ ඇමරිකානු ආරක්‍ෂක ලේකම්වරයෙකු වූ ඩොනල්ඩ් රම්ස්ෆෙල් නිග්‍රහ‍ාත්මක අර්ථයෙන් යුරෝපය චොකලට් හදන රටවල් ලෙස නම් කළේ ඔවුන්ගේ බොලඳ බව නිසා ය. ප්‍රශ්නය වන්නේ එසේ වෙමින් සිට, ඔවුන් ඇමරිකානු පදයට නටමින් ලොව පුරා තෝරාගත් ත්‍රස්ත කණ්ඩායම්වලට මුදලින් හා භූමියෙන් ද ආධාර කිරීම ය. එල්ටිටිය තනිකර වැඩුනේ යුරෝපා උදාසීනත්වය නිසා ය. මේ අතර, තම භූ දේශපාලන අභිලාෂ ඉටුකර ගැනීම සඳහා ලොව පුරා ත්‍රස්ත කණ්ඩායම් යුරෝපය විසින් යොදා ගන්නේ සෙල්ලම් බඩු සේ නොසැලකිල්ලෙනි. ඇෆ්ගනිස්ථානය, ඉරාකය, බොස්නියාව, ලිබියාව හා සිරියාව ආසන්නත ම නිදසුන් ය. එහෙත් ප්‍රශ්නය වන්නේ මේ සුදුකරපටි අපරාධකරුවන් හා ඝාතකයින් මානව හිමිකම් හා ප්‍රජාතන්ත්‍රවාදයේ මුරදෙවියන් ලෙස හා ත්‍රස්තවාදයට එරෙහි ව සටන් කරන රටවල් හා මිනිසුන් ලෙස ලොව හමුවේ පෙනී සිටීම ය. දැන් දැන් බෝම්බ ලෙස මේ ඇසෙන්නේ ඇත්ත වශයෙන් ම ඒ දෙබිඩිබවේ හා කුහක බවේ හඬ ය.
බ්‍රසල්ස්, පැරිස් හා ලන්ඩන් වැනි නගරවල ත්‍රස්තවාදීන්ට හිතු සේ ක්‍රියාත්මක වන්නට තවත් සාධක බලපා තිබේ. ඒ නම් එම රටවල මුස්ලිම් හා සෙසු සුළු ජාතික කොටස්වලට එල්ල වී තිබෙන ප්‍රවේණිගත ජාතිවාදී පීඩනයයි. විශේෂයෙන් ම මුස්ලිම් ජාතිකයින් නිරන්රයෙන් පොලිස් අත්අඩංගුවට ගැනීම, හිරිහැරකිරීම් හා මහමග දී නිති පරීක්‍ෂා කිරීමට ලක් කිරීම වැනි දෙය මැද මට්ටමේ සාධක ලෙස පෙන්වා දිය හැකි ය. මීටත් යටින් තව බොහෝ සාධක තිබේ. ප්‍රමාණවත් අධ්‍යාපනයක් ලබා ගැනීමට ඇති මං ඇහිරීම, අමාරුවෙන් හෝ එවැන්නක් ලබා ගත්ත ද ඊට සරිලන රැකියාවක් ලබා ගැනීමේ දී බාධා පැමිණවීම මෙන් ම ඇතැම් අවස්ථාවක පොදු සමාජය තුළ කොන් කිරීම වැනි දෙය සුලබ සිදුවීම් ය. යුධ සමයක දී පවා ශ්‍රී ලංකාව වැනි රටක් තම සුළුජාතිකයින්ට සැලකූ අයුර පිළිබඳ මොවුන්ට කොතරම් වැදගත් පාඩමක් ඉගෙනගත හැකි ද? එය මෙරට බොහෝ සුළුජාතිකයින් පවා තේරුම් නොගැනීම ඛේදයකි. කෙසේ වෙතත්, ඉහත වන් හේතු නිසා ම අයිසිස් වෙනුවෙන් සටන්කරුවන් බඳවා ගැනීමට යුරෝපය ඉතා සරු ගොදුරු බිමක් වී තිබේ. මේ වන විට යුරෝපා මුස්ලිමුන් 5000ක් පමණ සිරියාවේ හා ආශ්‍රිත ප්‍රදේශවල බටහිරට එරෙහි සටනෙහි නිරත ව සිටිති. ඊයේ ප්‍රහාරය එල්ල කළේ ද බෙල්ජියම් ජාතික මුස්ලිමුන් විසින් ම ය. ඇතැමුන් යුරෝපය හඳුන්වන්නේ විවෘත සමාජ (open society) ලෙස ය. එහෙත් ඇත්ත වශයෙන් ම අද එය එහි අනිත් පැත්ත ය. යුරෝපය යනු විවෘත සිරගෙයකි (open prison). සුළුජන කොටස්වලට විශේෂයෙන් එය එසේ ය. අවාසනාවකට අප වැනි රටවල සංහිඳියාව හා සමාජ වටිනාකම් කියා දීමට එන්නේ ඒ සිරගෙවන් පාලනය කරන ජේලර්ලා හා ඔවුන්ගේ දේශීය නියෝජිතයින් වීම දෛවයේ සරදමක් නොවන්නේ කෙසේ ද?
යුතුකම සංවාද කවය
www.yuthukama.com
ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න.
(Like us on facebook)
https://www.facebook.com/yuthukama
0 comments :
ෆේස්බුක් ගිණුමක් නොමැතිවත් මෙතනින් ඔබේ අදහස පළ කළ හැක .