ගොඩ දැම්මෙ පුතුනි නුඹ උන්ට බිලි දෙන්න නොව

මතකයි නෙ මහත්තයො
පුංචි කාලෙදි බැලූවෙ
ගොඩ දැම්මෙ සර් ම නෙ
හැදුනු දා මොළේ උණ

ඉගෙන ගන්නට රුසිය
ශිෂ්‍යත්තෙ සමත් වුනෙ
ඉස්කෝළෙ මුල් තැනට
ලකුණු එකසිය හැටකි

දැන් යන්නෙ මහින්දෙට
ගනී අපමණ වෙහෙස
හොඳ කලක් යයි පුතුට
ඉගෙන ගෙන ඉහළටම

ඉගෙන ගත්තොත් පමණි
අපි එගොඩ යන්නේ
ළපටි වයසෙදිත් පුතු
දනියි ඒ බව සොඳින

පන්ති යන්නට සල්ලි
මුලින් වෙන්කර තියල
තමයි ගැට ගහ ගන්නෙ
ජීවිතය යන්තමින

දෙඩචිල්ල මවගෙ එම
රිදුම් දෙයි සවණ මා
අයා ගත් නෙතු පුතුගෙ
රිද්දවයි නුවන් මා

වැඩක් වෙද්දෝ ඉගෙන
රටක් නැති කල අපට
පිට රටින් එන එවුන්
බින්න බසිනා කලෙක

බමුණු කැල මතු දිනෙක
නිදැල්ලේ සරන රට
විකුණන්න වෙයි දැනුම
සොච්චමට පුත නුඹට

මහද නිතියෙන් පෙළන
සිතුම් සඟවා ගතිමි
නොකීවෙමි ඇයට මම
රටට හෙට වන විපත

ඉගෙන ගන්නකො පුතුනි
තව වෙහෙස ගෙන සොඳින
වරදින්නෙ නැත එවිට
කීමි සිත රවටමින

ගොඩ දැම්මෙ පුතුනි නුඹ
උන්ට බිලි දෙන්න නොව
බිලි ගන්න දී රටම
බලා හිටියේ මන්ද

දිනෙක ඔබ අසන විට
මා මෙලොව හැර ගොසිනි
ගොඩ දැම්මෙ පුතුනි නුඹ
උන්ට බිලි දෙන්න නොව

-විශේෂඥ වෛද්‍ය වසන්ත දේවසිරි
2016 මැදින් මස 8 වැනි දා


යුතුකම සංවාද කවය
www.yuthukama.com
ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න.
(Like us on facebook)
https://www.facebook.com/yuthukama