"මිනිස්සුන්" රට කරන කලක් එන තුරු...

 -පුනර්ජි දඹොරගම-
අහස් කුස කළු කරන් දහක් දන හඬවලා
ගෙවල් කඩ යට කරන් ගඟේ දිය උතුරලා
එබැව් දැක අපේ හිත් මිනිස්කම් මතු වෙලා
ගඟේ රැළි දිගේ නැග ගියා උඩුගං බලා

එහේ මෙහෙ රටවලින් හයිබ්‍රිඩ් කොමිසමයි
එහා රට එක්කලා අර සීප ගිවිසුමයි
රට බෙදන්නට හදන කොටින්ගේ තදියමයි
රටම කන්නට උපන් ඇමතිවරු පෝළිමයි

බොරුව රජ කරන කල ජනතාව රවටලා
නලුවො වී ඒකෙනුත් වාසි ගන්නට බලා
රළුව අප ගිලගන්න මහා ජළ කඳ වෙලා
කළුව එන එකත් මහ පුදුමයක්දෝ බොලා

ගැලූ ගංවතුර දැක අපිත් එකමුතු වුනා
වළා රොද එබැව් දැක කොහේදෝ සැඟවුනා
"මිනිස්සුන්" රට කරන කලක් එන තුරු විනා
වැස්ස වැහි පෑව්වද සැකක් නම් මතු වුනා.....

යුතුකම සංවාද කවය
www.yuthukama.com
Like us on facebook : https://www.facebook.com/yuthukama