මෙතරම් අපකීර්තියට පත් ආණ්ඩුවක් ඉතිහාසයේ තිබුණේ නෑ - ජ්‍යේෂ්‍ය්ඨ කතිකාචාර්‍ය නවරත්න රඹුක්වැල්ල

-අද උතුරේ වගේ ම කොටිත් ජවිපෙත් මුලින් ම ගැහුවේ පොලිසියට -

කොළඹ විශ්වවිද්‍යාලයේ දේශපාලන විද්‍යා අංශයේ ජ්‍යේෂ්ඨ කථිකාචාර්ය
නවරත්න රඹුක්වැල්ල

දෙවසරකට වැඩි ආණ්ඩුවේ ගමන්මග සහ පැවති ආණ්ඩුවට එල්ල වන චෝදනා පිළිබඳ කොළඹ විශ්වවිද්‍යාලයේ දේශපාලන විද්‍යා අංශයේ ජ්‍යේෂ්ඨ කථිකාචාර්ය නවරත්න රඹුක්වැල්ල මහතා සමග රිවිර කළ සාකච්ඡාවකි.

පසුගිය ආණ්ඩුව ආරම්භ කළ දැවැන්ත සංවර්ධන ව්‍යාපෘති කෙටි කලකින් ම ඇයි රටට බරක් වුණේ?

මහින්ද රාජපක්ෂ 2005 භාර ගත්තේ ජනතාව තමන්ගේ ස්වාධිපත්‍ය ක්‍රියාත්මක කරන්න පත් කළ ආණ්ඩුවේ ස්වාධිපත්‍ය බලය භූමියෙන් 1/3ක ක්‍රියාත්මක නොවුණු රටක්. ඊට බාධා කළ ත්‍රස්තවාදයට එරෙහි යුද්ධය දෙකට දෙවාරේ සිදු වූ රටක්. ඒ වන විට රනිල් වික්‍රමසිංහ සටන් විරාම ගිවිසුම මගින් රට උගුලකට හසු කරලා අසරණ කරලා තිබුණේ. දැන් රනිල් වික්‍රමසිංහ සමග ඉන්න පාඨලි චම්පික රණවක එදා කී වචනවලින් ම කියනවා නම් කොටි සංවිධානය 3600ක් වාරයක් සටන් විරාම ගිවිසුම කඩලා තිබුණා. එවැනි පසුබිමක වසර 30ක් තිස්සේ ඇදී ගිය උතුරේ ත්‍රස්තවාදය නිමා කරලා රටේ ස්වාධිපත්‍ය තහවුරු කිරීම තමයි මහින්දගේ පළමු ව්‍යාපෘතිය වුණේ.

මහින්ද ඉතා ම කෙටි කාලයකින් විස්මිත ලෙස රටේ ස්වාධිපත්‍ය ක්‍රියාත්මක කිරීමට ඉඩ නොදුන් ම්ලේච්ඡ ත්‍රස්ත කල්ලිය පරාජයට පත් කරලා රටේ සමස්ත භූමිය පුරා රටේ ස්වාධිපත්‍ය තහවුරු කළා. ඒක සුළුපටු ව්‍යාපෘතියක් නෙමෙයි, අති දැවැන්ත ව්‍යාපෘතියක්. 2015 ජනවාරි 08 මහින්ද පරාජය කිරීම සඳහා පෙරමුණ ගත් දෙස් විදෙස් බලවේග සියල්ල ම වගේ එදා කොටි සමග සිටියා. ඒ සියල්ල එක මිටට පරාජය කරලා රටේ ස්වාධිපත්‍ය පිහිටු වීම තමයි මහින්ද කළ දැවැන්ත ම ආයෝජනය. දැවැන්තම සංවර්ධන ව්‍යාපෘතිය. ඊට පෙර සිටි ජනාධිපතිවරු 4 දෙනාටම එක් කරන්න බැරි වුණා. ඒ ව්‍යාපෘතිය නිසා 2009 සිට රටට අහිමි වීමට නියමිතව පැවති මිල කළ නොහැකි ජීවිත සහ දේපළ ප්‍රමාණයක් රටට ඉතිරි වුණා. දෙකට බෙදී සදාකාලික යුද්ධයකට ගොදුරු වෙන්න ලියවී තිබූ රටේ ඉරණම වෙනස් වුණා. එවැනි රටට ලාබදායි ආයෝජනයක්, ව්‍යාපෘතියක් මෑත ඉතිහාසයේ ලංකාවේ සිදුවෙලා නෑ.

එයින් පසුව තමයි අවුරුදු 30ක් තිස්සේ සංවර්ධනයේ අරුණලු නොදුටු රටට දැවැන්ත සංවර්ධන ව්‍යාපෘති කෙරෙහි අවධානය යොමු කරන්නේ. එහෙත් ත්‍රස්තවාදය නිසා රටේ සම්පත් විනාශ වෙලා. රටේ සංවර්ධනයට යෙදවිය යුතුව පැවති අති දැවැන්ත මුදලත් ශ්‍රමයක් ත්‍රස්තවාදය නිසා රටට අහිමි වෙලා. සංවර්ධනය සඳහා රටේ මුදල් නෑ. එහෙත් මහින්ද ඒ සියලු අභියෝගවලට මුහුණ දෙමින් රට සංවර්ධනය කිරීමේ දැවැන්ත සංවර්ධන ව්‍යාපෘතියට අත ගැහුවා. ඒ සඳහා ණය ගන්න වුණා. මොකද යුද්ධ කරලා රටේ භාණ්ඩාගාරය හිස්වෙලා තිබුණේ.

එය රට අසලින් මුහුදු සේද මාවත වැටීමේ භූගෝලීය පිහිටීම පදනම් කරගත් ඉන් ලද හැකි වාසිය ඉලක්ක කරගත් සංවර්ධන ව්‍යාපෘතියක්. හම්බන්තොට වරාය, මත්තල ගුවන්තොටුපල, අධිවේගී මාර්ග ඇතුළු රටේ මාර්ග පද්ධතිය ඒ සඳහා කදිම නිදසුනක්. වරායක්, ගුවන්තොටුපලක් හදලා කෙටි කලකින් ලාභ ගන්න බෑ. අපට ගුවන් යානා ආවාම උදලු ටිකක් අරගෙන ගුවන්තොටුපල හදන්න බෑ. වරාය හදන්න බෑ. ඒ නිසා අපි යටිතල පහසුකම් නිර්මාණය කරලා නැව් සහ ගුවන් යානා ගෙන්වා ගැනීම සඳහා ක්‍රමවත් සැලසුමක් ක්‍රියාත්මක කළ යුතුයි. ඒකට කාලයක් ගත වෙනවා. නමුත් මේ ආණ්ඩුවට ඒවා අලාභයි කියලා පිට රටවලට විකුණා ගෙන කෑමට මිස ඒවා දියුණු කරලා රට දියුණු කරන්න සැලසුමක් හෝ වුවමනාවක් නෑ. මහින්ද බලයේ හිටියා නම් මේ වන විට එම ව්‍යාපෘති මල් ඵල දරලා ඉවරයි.

මේ ව්‍යාපෘති සමග රට චීන කොලනියක් වන බවට එකල චෝදනා නැගුණා නේද?

එදා මහින්ද ත්‍රස්තවාදය නිමා කරලා මේ රටේ ස්වාධිපත්‍ය පිහිටුවලා සංවර්ධන ව්‍යාපෘති දියත් කරන කොට රටේ හතුරු බලවේගවලට ඒවාට එරෙහිව අවලාද බොරු චෝදනා නිර්මාණය කරලා පතුරුවා හැරීම හැර විකල්පයක් තිබුණේ නෑ. ඒ සඳහා රටට හතුරු ජාත්‍යන්තර බලවේගත් උදව් කළා. ඒ විදිහට බොරු චෝදනා පතුරුවා හරින්න එදා විපක්ෂයේ සිටි අය ඉතාම දක්ෂයි. ඔවුන් එය ඉතාම සුක්ෂ්ම ලෙස කළා.

මුලින් ම කීවා ලංකාව ලෝකෙන් හුදකලා වෙලා කියලා. ඊට පස්සේ මේ ව්‍යාපෘති චීන සහයෝගය ලබා ගෙන කරන කොට ඇතැම් විශ්වවිද්‍යාලීය උගතුන් යැයි කියා ගන්නා උදවිය ලංකාව චීන මායමට අහුවෙලා කියලා කීවා. ඒ සටන් පාඨ ඔස්සේ බලයට ආ අය වරාය චීනයට විකුණලා දැම්මා. එදා චීන මායම ගැන කතා කළ අය මේ අපරාධ නොදැක්කා වගේ අද දාර්ශනික කතාන්දර කිය කිය ඉන්නවා. ඒ ව්‍යාපෘතිවලට අවලාද නගමින් බලය ඩැහැ ගත් අය අදත් මහින්ද රටට දායාද කළ දේවල් විවෘත කරනවා මිස අලුතින් රටට පාලමක් බෝක්කුවක් හදලා නෑ.

නමුත් පහුගිය ආණ්ඩුව මේ ව්‍යාපෘති ආරම්භ කළේ කොමිස් ලබා ගැනීම සඳහා බවට චෝදනාවක් තියෙනවා?

1970 බලයට පත් සිරිමා ආණ්ඩුව ඉතාම සැලසුම් සහගත ලෙස වසර 30කින් සම්පූර්ණ කිරීමට මහවැලි ව්‍යාපෘතිය ආරම්භ කළා. නමුත් 77 බලයට පැමිණි එජාප ආණ්ඩු එය වසර 6කින් ඉදි කර නිමා කරන කඩිනම් මහවැලිය කළා. මහවැලි ව්‍යාපෘතිය කඩිනම් කළේම කොමිස් ගහන්නයි. එදා ආණ්ඩුව ඡන්ද කළේ සුඛෝපභෝගී ජීවිත ගතකළේ ඒ කොමිස් මුදල්වලින් තමයි.

ඒ වගේ ම මහවැලිය හදලා ටර්බයින් 18ක් කරකවලා ඉන්දියාවට විදුලිය අපනයනය කරන්නයි එදා කතා කළේ. නමුත් රටේ විදුලි අර්බුදයට තවම විසඳුමක් නෑ. මහින්ද හදපු ගල් අඟුරු බලාගාර නොවෙන්න අද රටම අඳුරේ. කඩිනම් මහවැලි ව්‍යාපෘතිය නිසා සිදුවූ පාරිසරික හානිය කියා නිමකරන්න බෑ. මා ජීවත්වන එදා දියතිලකපුර යනුවෙන් හැඳින්වූ හඟුරන්කෙත ආදි තෙත් බිම් වියළි කාන්තාර වුණේ කොමිස් මුදල් බලා ගෙන කළ ව්‍යාපෘති නිසා තමයි.

නමුත් මහින්ද සංවර්ධන ව්‍යාපෘති ආරම්භ කළේ රටේ සංවර්ධනය මිස කොමිස් ඉලක්ක කර ගෙන නෙමේ. ඒවා ඡන්ද ගරන්න මිනිස්සු රවටන්න කළ දේවල් නෙමේ. ඒ සංවර්ධන කටයුතුවලට එරෙහිව දැවැන්ත මඩ අවලාද ප්‍රචාරයක් දියත් වුණේ. එකල නැඟූ චෝදනා කිසිවක් වසර දෙකක් ගත වුණත් තවම ඔප්පු කරලාත් නෑ. මහින්ද පාලනයේ පැවති එක් දුර්වලතාවක් තමයි එහි පරිධියේ සිදුවන දෑ පිළිබඳ අවධානය යොමු නොකිරීම. ඒ නිසා යම් යම් සිදුවීම් වෙන්න ඇති. හැබැයි එකල චෝදනා නැඟුණු සියලු දෙනාම දැන් ඉන්නේ ආණ්ඩුවේ. එහෙම චෝදනා තියෙන කිසිවකු විපක්ෂයේ හිටියා නම් හොරු ඇල්ලීමට මුවා වෙලා විපක්ෂය මර්දනය කරන්න ඔවුන් මේ වෙන කොටත් සිරගත කරලා ඉවරයි.

එකල රටේ කවර සංවර්ධනයක් තිබුණාත් රටේ තිබුණේ පවුල් පාලනයක්?

ඔව්, රටේ පවුල් පාලනයක් ඇති බවට විපක්ෂය විතරක් නෙමේ, ඒ ආණ්ඩුවේ ඉඳලා මේ ආණ්ඩුවට පැමිණි අයත් චෝදනා කළා. දැන් පවුල් පාලන යුගය අවසන් නිසා ඔවුන්ට පුළුවන් නේ වැඩ කරන්න. නමුත් රටේ කිසිම සංවර්ධනයක් වෙන්නේ නෑ. රට අරාජික වුණා විතරයි. වැඩ බැරි මිනිස්සු එකල මහින්ද ආණ්ඩුවට එල්ල කළ චෝදනා නටන්න බැරි මිනිහා පොළොවේ ඇද කියනවා වගේ විහිළු කතා විතරයි. අනෙක එදා කොටි පරාජය කරන යුද්ධය වෙලාවේ මහින්දගේ සහෝදරවරු මිස එදා ආණ්ඩුවේ ඉඳලා දැන් මේ රටේ හතුරු බලවේග ගෙන ආ ආණ්ඩුවට ගිහින් මහින්දට බනින මිනිස්සු විශ්වාස කළා නම් තීරණාත්මක අවස්ථාවේ මහා පාවාදීමක් කරලා ඒ ජයග්‍රහණය ආපසු හරවන්න හොඳටම ඉඩ තිබුණා.

දැන් නව ආණ්ඩුවේ අවුරුදු දෙකත් ගෙවිලා. ඔවුන් එදා රටට ලබා දුන් පොරොන්දු ඉටු වෙලා ද?

මේ ආණ්ඩුව බලයට ගෙන ඒම පිටුපස ඉන්දියාව, කොටි හිතවාදී බටහිර බලවේග, රාජ්‍ය නොවන සංවිධාන, කොටි හිතවාදීන් සහ ජනතා විමුක්ති පෙරමුණ එකතු වෙලා. ජවිපෙ හැමදාම ජාතිකවාදී ආණ්ඩුවක් බලයට ආවොත් එය විනාශ කරලා එජාපයට බලය ලබා දීමට කටයුතු කළා. ඔවුන්ට අවශ්‍ය එජාපය ලවා රටට විනාශ කර සිය පක්ෂයට බලය ලබා දීම සඳහා ජනතාව යොමු කරවා ගන්න. එදා 70 සිරිමා ආණ්ඩුව කිසිම වැඩක් ආරම්භ කරන්න කලින් මාස කිහිපයක් තුළ ජවිපෙ ත්‍රස්තවාදය මුදා හරියා. 1988 ජනාධිපතිවරණය වෙලාවෙත් ඡන්ද වර්ජනය කරවලා එජාප අපේක්ෂකයා දිනවන්න කටයුතු කළා. එදා සිරිමා බණ්ඩාරනායක දිනුවා නම් ඔවුන්ගේ අරමුණ පරදිනවා. සිය නායකයා ඇතුළු ලක්ෂයක් මරා දැමූ එජාපය මෙදා නැවතත් බලයට ගේන්න ජවිපෙ උදව් කළා.

ඉතින් ජනතාවට ලබා දුන් තරු පහේ ප්‍රජාතන්ත්‍රවාදය, මාධ්‍ය නිදහස, මහින්ද වගේ දහ ගුණයක සංවර්ධනය, විනිවිදභාවය, තරුණ පරපුරට හොඳ අනාගතයක් වගේ දහසකුත් එකක් පොරොන්දු කොහොම වුණත් අර කලින් සඳහන් කළ රටේ සතුරන්ගේ බලාපොරොත්තු නම් අකුරට ඉටු කළා. මේ ආණ්ඩුවේ ශේෂ පත්‍රය ගැන බස් රියේ, කඩ පිළේ, මග තොට මුණ ගැහෙන ජනතාවගෙන් අහලා බැලුවොත් ඉතාම කෙටි කාලයකින් මේ තරම් අප්‍රසාදයට පත් ආණ්ඩුවක් අපේ රටේ ඉතිහාසයේ පහළ වෙලා නෑ කියලායි කියන්නේ.

මේ අර්බුදය පටන් ගත්තා විතරයි. තව ඉදිරියට තවත් දරුණු වෙනවා. 1948 පසු බලයට පත් නරක ම ආණ්ඩුව තමයි මේ. අද ආනයන වැඩිවෙලා, අපනයන පිරිහිලා, විරැකියාව වැඩිවෙලා, රුපියල පිරිහිලා, උද්ධමන වේගය ඉහළ ගිහින්, රටේ ණය බර වැඩිවෙලා. තරුණ අසහනය, ජනතා අසහනය වැඩිවෙලා. රටේ සියලු ජනතාව විවිධ කාරණා නිසා අද වීදි බැහැලා. ඒක තමයි දෙ වසරකට ටිකක් වැඩි ආණ්ඩුවේ ශේෂ පත්‍රය. අනෙක් අතට කොටි සහ ජවිපෙ වගේ මුල් කාලේ කළා වගේ උතුරේ මැර කල්ලි පොලිසියට පහර දෙන්න පටන් අරගෙන. රටම අරාජිකයි.

ආණ්ඩුව හම්බන්තොට වරාය, මත්තල ගුවන්තොටුපළ සහ තෙල් ටැංකි විකුණා දමමින් සේද මාවත අසල පිහිටීම නිසා අපට හිමි භූගෝලීය වාසිය අහිමි කළා වගේ ම නව ෆෙඩරල් ව්‍යවස්ථාව ඔස්සේ 2009 අසීරුවෙන් රටට දිනා දුන් පූර්ණ ස්වාධිපත්‍ය ජාතියට අහිමි කරන්න කටයුතු කරමින් ඉන්නවා. ඒ වගේ ම ජාත්‍යන්තරය ගැන විශේෂඥයෝ කියලා බලයට ආ අය රටේ දෙකොණ චීනයට සහ ඇමරිකානු ළැදි ඉන්දියාවට විකුණා දමා පහුගිය දශක දෙකේ ගොඩනැඟුණු නව ලෝක දේශපාලන කඳවුරු දෙකේ පොර පිටියක් බවට අපේ රට ඇදලා දමන්න තමයි සුදානම් වන්නේ. ඊට එරෙහි බලවේග කෘර ලෙස මර්දනය කළා. ඒකාධිපති ලෙස පාර්ලිමේන්තු විවාදයක් පවා නොදී වරාය විකුණා දැමුවා. අපට රටේ ස්වාධිපත්‍ය අහිමි වෙනවා විතරක් නෙමෙයි ජාත්‍යන්තර බලවතුන්ගේ සන්නද්ධ යුද පිටියක් බවට පත් වී තිබෙනවා. එවැනි අනතුරක් මැද රට කැබලි වීම ඉතා සුළු කාරණාවක් විතරයි.

ආණ්ඩුවට මේ වැරදි නිවැරදි කර ගෙන නැවුම් ගමනක් යාමේ අවස්ථාවක් නැද්ද?

අපේ රටේ හැම ආණ්ඩුවක් ම සහලින් රට ස්වයංපෝෂිත කරන්න පොරොන්දු වුණත් හඳෙන් හාල් ගේනවා කීවාත් ඒක යථාර්ථයක් කළේ මහින්ද ආණ්ඩුව. නමුත් මේ ආණ්ඩුව බලය ගත් විගස ඒ ස්වයංපෝෂිතභාවය අවඥාවට ලක් කරමින් මත්තල වී ගබඩා කළා. අද පිට රටින් සහල් ගෙනෙන තැනට රට ඇදලා දාලා ඉවරයි. ගොවියාත් රට හාල් කන්න වෙලා. ලැජ්ජ නැතිව රටින් හාල් ගේනවා කියලා නායකයෝ අපට කියනවා. ඒ අතර ආණ්ඩුව කළ බැඳුම්කර වංචාවට රවි බිලි දීලා බේරෙන්න හදනවා. මේ කටයුතු නිසා ආණ්ඩුවට ලැබුණු ජනවරම අහෝසි වෙලා ඉවරයි. නැවත ඡන්දයක් දිනන්න තියා හිතන්නයත් බෑ. ඉතින් 20 වැනි සංශෝධනය ගෙනත් ඡන්ද කල් දාන්නයි ආණ්ඩුව සුදානම. මේ රටේ ප්‍රජාතන්ත්‍රවාදයට ගරු කරන සියලු දෙනා ආණ්ඩුවෙන් මැතිවරණ උදුරා ගැනීමට අරගල කළ යුතුයි. ඒ නිසා මේ ප්‍රජාතන්ත්‍ර විරෝධි ආණ්ඩුවට ආපසු ගමනක් නෑ. එය වහාම පරාජය කළ යුතුයි.

සාකච්ඡා කළේ: නාමල් උඩලමත්ත

යුතුකම සංවාද කවය
www.yuthukama.com 

Like us on facebook :https://www.facebook.com/yuthukama