අපේකම - අවුරුද්දට විතර ද?

-පුනර්ජී දඹොරගම-
ගහ වැල ද බර වෙලා
මලින් තව හැඩ වෙලා
ගොයම් ගස් සරු වෙලා
අස්වැන්න ගෙට ගෙනා...

පාං පිටි හුරු වෙලා
පිටරටින් මෙහි ගෙනා
අවුරුද්ද දාටවත්
කිරිබතක් රහ වෙලා...

වෙනදාට කේක් කන
කඩේ ලොකු ගනන් වල
අලුව මුං කැවුමකින්
මේසයම ඉතිරිලා.....

නැතිව හොඳ සින්දුවක්
අවුරුද්දකුත් පුරා
අද ගුවන් විදුලියම
මියුරු ගීයක් වෙලා....

බස් වහර නොදන්නා
වෙනද රූ පෙට්ටියේ
මෙන්න අද පේනවා
හෙළ නැටුම් ගායනා....

සින්තටික් මල් ඇතත්
හුස්ම නැති ගෙවල් වල
බලාපන් ගෙවත්තේ
එරබදුත් පිපෙනවා...

නගරයම හිස් වෙලා
ගම්මැද්දෙ රොක් වෙලා
ඇළ දොලේ වැව් තොටේ
හැබෑ මිනිසුන් වෙලා...

අපේකම මතු වෙලා
කොහෝ හඬ නද දෙනා
තිබුනනං මේ වගේ
හැමදාම අවුරුද්ද......

-යුතුකම සංවාද කවය
www.yuthukama.com
ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. 
(Like us on facebook)
https://www.facebook.com/yuthukama