සරත් ෆොන්සේකා තනතුරෙන් පහ කරනු!

අමාත්‍ය සරත් ෆොන්සේකා ත්‍රිමලේ පිළිබද අසත්‍ය ප්‍රකාශ කළා නම් තනතුරෙන් පහකළ යුතුය.- ජාතික ඒකාබද්ධ කමිටුව ජනපතිට ලියයි.



2017 පෙබරවාරි 07

අතිගරු ජනාධිපති මෛත්‍රිපාල සිරිසේන මැතිතුමා

ජනාධිපති ලේකම් කාර්යාලය
කොළඹ 1

අතිගරු ජනාධිපතිතුමනි,
ත්‍රිකුණාමල වරාය ඉන්දියාවට පැවරිමට යාමක් සම්බන්ධව පලව ඇති මාධ්‍ය වාර්තා පිළිබඳවයි
ත්‍රිකුණාමල වරාය ඉන්දියාවට පවරා දීම සඳහා සාකච්ඡා කෙරමින් පවතින බවක් අමාත්‍ය සරත් ෆොන්සේකා මහතා විසින් සම්මුඛ සාකච්ඡාවක පවසන ලද බවට ඉන්දියාවේ ‘‘ද හින්දු‘‘ පුවත්පතේ 2017 ජනවාරි 19 වන දින පලව තිබු වාර්තාව පිළිබදව ඔබතුමන්ගේ කාරුණික අවධානය යොමු කරවනු කැමැත්තෙමු. මේ හා සමාන අදහස් දැක්වීමක් ශ්‍රී ලංකා අග්‍රාමාත්‍ය රනිල් වික්‍රමසිංහ මහතා විසින් කර තිබෙන බවට මැතදී පලවු ප්‍රවෘත්තිය නිසා ඉහත සඳහන් මාධ්‍ය වාර්තාව නොසලකා හැරිය නොහැකි බව අපේ මතයයයි.

මෙම ප්‍රකාශය අපව මහත් විශ්මයටත්, සසල කරවීමටත් සමත් වන්නේ පහත දැක්වෙන කරුණු හේතුවෙනි.

1. ත්‍රිකුණාමල වරාය ඉන්දියාවට පවරා දීමක් සම්බන්ධයෙන් ශ්‍රී ලංකාවේ අමාත්‍ය මණ්ඩලය තිරණයක් ගෙන ඇති බවක් හෝ අවම වශයෙන් එවැනි අදහසක් සාකච්ඡාවට ගෙන ඇති බවක් අප නොදනිමු. අමාත්‍ය මණ්ඩල අනුමැතියක් ලබාගෙන නොගත් බවට වන අපගේ වැටහීම නිවරැදි නම්, එවැනි පවරා දීමක් සදහා කවර හෝ සාකච්ඡාවක් කවර පුද්ගලයකු විසින් හෝ බල අධිකාරියක් විසින් සිදු කරනු ලැබීම නීත්‍යානුකූල නැත.

2. එබැවින්, විධිමත් අනුමැතියකින් තොරව මේ පිළිබඳව ඉන්දියාව හෝ වෙනත් රටක් සමග යම්කිසි සාකච්ඡාවක් පවත්වනු ලැබ තිබේ නම්, මෙම අක්‍රමිකතාව සිදුකර ඇති අයට එරෙහිව දැඩි පියවර ගන්නා ලෙසට අප ඔබතුමාගෙන් අවධාරණයෙන් ඉල්ලා සිටිමු. අප එසේ ඉල්ලා සිටින්නේ 2015 ජනවාරි 08 වන දින ජනවරම ගැනීමේදි ඔබතුමන් විසින් මහජනතාව වෙත ඉදිරිපත් කරන ලද ‘යහපාලන ප්‍රතිපත්ති ප්‍රතිඥාව‘ මෙවැනි අක්‍රමිකතා නිසා අමුඅමුවේ උල්ලංඝණය කිරීමක් වන බැවිනි.

3. කෙසේ වුවද, අග්‍රාමාත්‍යතුමා පසුව පුනරුච්ඡාරණය කර ඇති බව සඳහන් වන අමාත්‍ය සරත් ෆොන්සේකා මහතාගේ මෙම ප්‍රකාශය අසත්‍ය නම් ආණ්ඩුවේ විධායක පියවරයන් පිළිබඳ අසත්‍ය ප්‍රකාශ නිකුත් කිරීම සම්බන්ධයෙන් ඔවුන් අදාළ තනතුරු වලින් ඉවත් කිරීම හැර යම් විකල්පයක් ඔබතුමා සතුව නොමැති බවද පෙන්වා දිය යුතුව ඇත.

4. ත්‍රිකුණාමලය යනු ඉතා වැදගත් මර්මස්ථානයකි. එය එසේම ත්‍රිකුණාමල වරායද උපායමාර්ගිකව වැදගත් ජාතික සම්පතකි. ඒවා ජාතියේ අනාගත සුභසිද්ධිය සඳහා යෙදවීම විනා ඉන්දියාවේ හෝ වෙන යම් රටක හෝ ප්‍රයෝජනය සඳහා පවරා දීමට ශ්‍රී ලංකාව පියවර නොගත යුතුය. ඒ නිසා ඉන්දියාව සමග මෙවැනි ගනුදෙනුවකට අමාත්‍ය මණ්ඩල අනුමැතිය යම් හෙයකින් ලබා දී තිබේ නම්, එය අපගේ අනාගත පරම්පරාව සහ ඔවුන්ගේ අයිතිවාසිකම් මෙන්ම වරප්‍රසාද ද උගස් කිරීමක් ලෙස සැලකිමට අපට සිදු වේ. රටේ මහජනතාව සහ ඔවුන්ගේ අනාගත පරපුර වෙනුවෙන් ජාතික සහ ස්වාභාවික සම්පත් වල භාරකාරීත්වය ඉසිලීම ආණ්ඩුවක වගකීමයි. ජාතියේ වත්කම් හා මර්මස්ථාන අන්සතු කිරීමට එවැනි ආණ්ඩුවකට කිසිදු හැකියාවක් නොමැති විය යුතුය. තවද, ත්‍රිකුණාමලය වැනි උපායමාර්ගික මර්මස්ථානයන් විදේශ බලවේගයන් විසින් කළමණාකරණය කිරීමට සැලැස්වීමෙන් ජාතික ආරක්ෂාවට සහ සුරක්ෂිතාව අවදානමකට ලක් කිරීමට ද වගකිව යුතු රාජ්‍යයකට නොහැකි විය යුතුය. එබැවින් ඉහත සදහන් කෙරුන මාධ්‍ය වාර්තා ලඝු කොට නොසලකන ලෙසද, ජාතිකමය වශයෙන් අවාසිදායක විය හැකි වෙන යම් හෝ යෝජනාවක් සාකච්ඡාවට පවා ගැනීම වැළක්විමට අවශ්‍ය පියවර ගන්නා මෙන් දේශප්‍රෙමි ජාතික බලවේග වල සාමාජිකයන් වශයෙන් අපි ඔබතුමාගෙන් ඉතා ඕනෑකමින් ඉල්ලා සිටිමු.

මෙයට හිතවත්,
විශ්වාසි,

අත්සන් කළේ,
විශේෂඥ වෛද්‍ය අනුලා විජේසුන්දර කර්නල් අනිල් අමරසේකර
සම සභාපතිවරු
ජාතික ඒකාබද්ධ කමිටුව


යුතුකම සංවාද කවය
www.yuthukama.com
Like us on facebook :https://www.facebook.com/yuthukama