පෙබරවාරි 10 ජයග්‍රහණය නිරූපණය වන ආණ්ඩුවක් හදමු - ගෙවිඳු කුමාරතුංග

පෙබරවාරි 10 ජයග්‍රහණය නිරූපණය වන ආණ්ඩුවක් හදමු- ගෙවිඳු කුමාරතුංග
"පෙබරවාරි 10 රටවැසි ප්‍රකාශය" සම්මන්ත්‍රණය
2018-02-26
කොළඹ මහජන පුස්තකාල ශ්‍රවනාගාරයේදී
සංවිධානය : යුතුකම සංවාද කවය

යුතුකම සංවාද කවය
www.yuthukama.com

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. (Like us on facebook)
https://www.facebook.com/yuthukama

සම්බන්ධන්ගේ ඊළාම් පොහොට්‌ටුව

-මොහාන් සමරනායක-

දෙමළ ජාතික සන්ධානයේ නායක 85 හැවිරිදි රාජවරෝදියාන් සම්බන්ධන් මහතා අප රටේ සිටින ජ්‍යෙෂ්ඨතම දේශපාලනඥයා වන්නේය. ලංකා දෙමළ රාජ්‍ය පක්‌ෂයෙන් (ඉලංගෛ තමිල් අරසු කච්චි) 1956 දී දේශපාලනයට අවතීර්ණ වී 1977 දී මුල් වරට පාර්ලිමේන්තුවට පිවිසි ඔහු දොළොස්‌ වසරක විරාමයකින් පසු 2001 දී යළි පාර්ලිමේන්තුවට තේරී පත්ව අද දක්‌වාම මන්ත්‍රී ධුරයේ රැඳී සිටී. 2015 අගෝස්‌තු 17 මහ මැතිවරණයේදී ඔහුගේ පක්‍ෂයට හිමි වූයේ මන්ත්‍රී ධුර 16 ක්‌ පමණක්‌ වුවද, සිරිසේන - වික්‍රමසිංහ ආණ්‌ඩුව පිළිගන්නා ප්‍රජාතන්ත්‍රවාදී මූලධර්ම පිහිටෙන් සම්බන්ධන් මහතා විපක්‌ෂ නායක පදවිය හිමිකර ගත්තේය. ඊට කළගුණ සලකනු වස්‌ ඔහු යහපාලන ආණ්‌ඩුවේම කොටසක්‌ බවට පත්ව සෑම අයවැයකටම, සෑම පනතකටම පක්‍ෂව ඡන්දය දෙයි.

දේශපාලන මතවාදය කුමක්‌ වුවද, දේශපාලන පරිණතභාවය, ඉංගී්‍රසි බස ව්‍යක්‌ත ලෙස හැසිරවීමේ හැකියාව, කතාවෙහි චතුරබව හා වයෝවෘද්ධභාවය යන ලක්‍ෂණ නිසා සම්බන්ධන් මහතා බොහෝ පිරිසක්‌ අතර ගෞරවයට පාත්‍ර වී සිටී. නාගරික මැද පන්තියේ ඇතැම් විචාරකයන් විසින් ඔහු හා ඔහුගේ දෙමළ ජාතික සන්ධානය 'මධ්‍යස්‌ථ මතධාරී' යන විශේෂණයෙන් හඳුන්වනු ලැබේ. නව ආණ්‌ඩුක්‍රම ව්‍යවස්‌ථාවක්‌ සම්පාදනය කිරීමෙහිලා පෙරමුණ ගෙන සිටින එක්‌සත් ජාතික පක්‍ෂ පාර්ලිමේන්තු මන්ත්‍රී ජයම්පති වික්‍රමරත්න නව ව්‍යවස්‌ථාවක අවශ්‍යතාව පහදමින් මෑතක පාර්ලිමේන්තුවේ කළ කතාවකදී සම්බන්ධන් මහතා සාධාරණ දේශපාලනඥයකු ලෙස හැඳින්විය. අධිපති රටවල අරමුදලින් නඩත්තු වන මෙරට එන්. ජී. ඕ. ප්‍රජාවේ බහුතරයද එසේ විශ්වාස කරති.

සම්බන්ධන් මහතා වටා ගොඩනැඟී ඇති ප්‍රතිරූපය එබඳු වුවද, ස්‌වකීය දේශපාලන න්‍යාය පත්‍රය, එනම් අවසානයේ වෙනම රාජ්‍යයක්‌ බවට පත්වීමේ ශක්‍යතාවය සහිත පෙඩරල් පාලන ව්‍යqහයක්‌ උතුරු - නැගෙනහිර ස්‌ථාපනය කිරීමේ ප්‍රයත්නය සපුරා ගැනීමට ඉවහල් වන්නේ නම් විතණ්‌ඩවාදී මිත්‍යා තර්කවලින් සමාජය මුලා කිරීමටත්, තම අරමුණු වසන් කොට ප්‍රතිවාදීනට චෝදනා කිරීමටත් නොපැකිලෙන බව ඔහු පෙබරවාරි 19 වැනිදා පාර්ලිමේන්තුවේදී යළිත් වරක්‌ සනාථ කළේය. ඒ පෙබරවාරි 10 පළාත් පාලන ආයතන ඡන්ද විමසීමේ ප්‍රතිඵලය ගැන උද්වේගකර විග්‍රහයක්‌ කරමිනි. මහින්ද රාජපක්‍ෂ ජනාධිපතිවරයා නායකත්වය දුන් ශ්‍රී ලංකා පොදුජන පෙරමුණ අත්කරගත් ජයග්‍රහණය බරපතළ ලෙස ගණන් ගැනීමට, ප්‍රතිවාදීනට කලබලවීමට සහ පක්‍ෂයේ ආධාරකරුවනට උද්දාමයට පත්වීමට පදනමක්‌ නැති නොවටිනා එකක්‌සේ හෑල්ලු කිරීමට ඔහු තම කථාවේදී උත්සාහ කළේය.

ඔහු ගොඩනැඟූ හාස්‍යජනක තර්කය මෙසේය. පළාත් පාලන මැතිවරණයේදී රාජපක්‍ෂ මහතා ලැබූ මුළු ඡන්ද ප්‍රතිශතය 44.69% කි. එ.ජා.පය, ශ්‍රී.ල.නි.ප ය හා එජනිස මුළු ඡන්ද සංඛ්‍යා එකතු කළ විට ප්‍රතිශතය 45.99% ක්‌ වේ. එය මහින්දගේ ප්‍රතිශතයට 2 කින් වැඩිය. ජනතා විමුක්‌ති පෙරමුණ ලැබූ 6.26% හා ඉලංකෙයි තමිල් අරසුකච්චි ලැබූ 3.06% ද, ඊට එක්‌ කළ විට පොදුජන පෙරමුණට එරෙහිව ප්‍රකාශ වූ මුළු ඡන්ද සංඛ්‍යාවේ ප්‍රතිශතය 55.31% කි.-ඉතින් උද්දාම වීමට මෙහි ඇත්තේ කුමක්‌ද? කිසිවක්‌ නැත. සම්බන්ධන් මහතා තර්ක කරයි. (So, What is their to get Existed about ? Nothing at All) මේ තර්කයේ අඥාන හා වංචාකාරි බව සාක්‍ෂි සහිතව පැහැදිලි කරමින් විචාරකයන් කිහිපදෙනකුම ඉංගී්‍රසි මාධ්‍ය පුවත්පත්වලට ලිපි සපයා තිබිණ. සම්බන්ධන් මහතා මහින්ද රාජපක්‍ෂ මහතාගේ ජය හෑල්ලු කිරීමට ගොඩනඟන තර්කය තමාට ලැබුණ ප්‍රතිඵලය අරබයා අදාළ කරගන්නේ නැතැයි එක්‌ ලේඛකයෙක්‌ පෙන්වා දුන්නේය. උතුරු පළාතේ බහුතර ජනතාව වෙසෙන යාපනය දිස්‌ත්‍රික්‌කයේදී සම්බන්ධන් මහතාගේ දෙමළ ජාතික සන්ධානයට ලැබුණු මුළු ඡන්ද ප්‍රතිශතය 35% දක්‌වා මෙවර පහත වැටිණ. මැතකදී බිහිවූ දෙමළ ජාතික ජනතා පෙරමුණ 21% ක්‌ ද, ඩග්ලස්‌ දේවානන්දගේ ඊපීඩීපී 19% ක්‌ද හිමි කරගත්තේය. වෙනත් ලෙසකින් කියතහොත් යාපනය දිස්‌ත්‍රික්‌කයේ ජනයාගෙන් 65% ක්‌ම දෙමළ ජාතික සන්ධානය ප්‍රතික්‌ෂේප කර තිබේ. මහින්ද රාජපක්‍ෂ ඇඳ සිටින ඇඳුම ඉරී ඇති බව දකින ආර්. සම්බන්ධන් තමා සිටින්නේ නිරුවතින් බව අමතක කරයි.

පොදු ජන පෙරමුණට ප්‍රතිවාදී පක්‍ෂ පොදු න්‍යාය පත්‍රයක සිට තර`ග නොකළ මැතිවරණයක්‌ අරභයා මෙවැනි ඉලක්‌කම් හරඹයක්‌ වලංගු වන්නේ කෙසේ දැයි තවත් ලේඛකයෙක්‌ ප්‍රශ්න කළේය. පළාත් පාලන ආයතන ඡන්ද විමසීමේදී පොදු ජන පෙරමුණ ජයගත් බවත් ප්‍රජාතන්ත්‍රවාදී සමාජයක ජනතා තීන්දුවට ගරු කළ යුතු බවත් සිය කථාවේ එක්‌ තැනක ස`දහන් කරන විපක්‌ෂ නායකයා ඊළඟ මොහොතේ ප්‍රතිශත අගයන් සසඳමින් ඉහත සඳහන් ගද්‍රභ තර්කය ගොඩනඟනුයේ පොදු ජන පෙරමුණේ ජය අවතක්‌සේරු කිරීමට හා ඊළඟ ජනාධිපතිවරණයේදී පොදුජන පෙරමුණට 50% ඉක්‌මවා ඡන්ද ගැනීමට නොහැකිය යන සාවද්‍ය මතය ඒත්තුගැන්වීමේ අරමුණ ඇතිවය. මහින්ද රාජපක්‍ෂ 2005 ජනාධිපතිවරණයේදී ඡන්ද 50.2% ක්‌ ද, 2010 දී 57.9% ක්‌ද ලැබූ බව ඔහුට අමතක වී තිබේ. නැතහොත් හිතාමතාම අමතක කර තිබේ.

මේ ලිපියේ ප්‍රධාන අරමුණ විපක්‌ෂ නායකයාගේ අනුවණ ඉල්ලකම් හරඹය ගැන කතා කිරීම නොවේ. මා අවධානය යොමු කරනුයේ පළාත් පාලන ඡන්දයෙන් පසු පාර්ලිමේන්තුව මුල් වරට රැස්‌වූ පෙබරවාරි 19 වැනි දා ඔහු කළ කථාවේ අග භාගයේදී මෙරට ජනතාවට විශේෂයෙන් දකුණේ සිංහල ජනයාට කළ බරපතල අන්තරාය ඇඟවීමටය. එසේම ඒ අන්තරාය ඇඟවීම පිටුපස ඇති දේශපාලන වංචනික ස්‌වභාවය පෙන්නුම් කිරීමටය.

ඔහු කී දේ මගේ බසින් සංක්‍ෂිප්තව මෙසේය. -මහින්ද රාජපක්‍ෂ ජනාධිපති ධුරයට පත්වීමෙන් පසු උපරිම බලය බෙදීමක්‌ ගැන කතා කළේය. ආණ්‌ඩුක්‍රම ව්‍යවස්‌ථා සම්පාදන ක්‍රියාවලියට ඒකාබද්ධ විපක්‍ෂයද එක්‌ විය. එහෙත්, පළාත් පාලන ආයතන ඡන්ද විමසීමෙන් පසු ඊළම බිහිවීමට ඉඩ ඇතැයි රාජපක්‍ෂ මහතා හදිසියේම කියන්නට පටන් ගත්තේය. පළාත් පාලන ඡන්දය ඊළම පිළිබඳ ජනමත විචාරණයක්‌ ලෙස හැඳින්වූ හිටපු ජනාධිපතිවරයා එ.ජා.පයට ඡන්දය දුනහොත් ඊළම බිහිවනු ඇති බැවින් ඔවුනට ඡන්දය නොදී නෙළුම් පොහොට්‌ටුවට ඡන්දය දෙන්නැයි ජනතාවට කියා සිටියේය. දෙමළ ජාතික සන්ධානය සිය මැතිවරණ ව්‍යාපාරයේදී රට බෙදීමට කතා කළේ නැත. අප කතා කළේ එක්‌සත්, නොබෙදුණු හා නොබෙදිය හැකි තනි රටක්‌ තුළ සාධාරණ හා ප්‍රමාණවත් බලය බෙදාගැනීමේ රාමුවක්‌ ගැන පමණි. රාජපක්‍ෂ කළේ දකුණේ අහිංසක සිංහල ජනතාව රැවටීමය. පොදුජන පෙරමුණ මේ දුෂ්ඨ මාර්ගයෙහි ඉදිරියට යන්නේ නම්, අප නිසා නොව නෙළුම් පොහොට්‌ටුව නිසා ඊලම විකසිත වනු ඇති බව මම ඔබට කියමි. ("I want to tell you, Elam will Bloom not on Account of us, but on account of your'Lotus Bud'. Your Lotus Bud will Bloom in to an Elam") සම්බන්ධන් මහතාගෙන් මේ ප්‍රකාශයෙන් මා දකින පරිදි ප්‍රධාන කරුණු 3 ක්‌ ඇඟවෙයි.

1. තමා ඊළමට විරුද්ධ බව හෝ තමන්ට ඊළමක්‌ අවශ්‍ය නැති බව.

2. ඊළම සිංහලයාට අනර්ථයකි. එබැවින් එය වළක්‌වා ගැනීමට සිංහල ජනයා උනන්දු විය යුතුය.

3. එක්‌සත්, නොබෙදුණු හා නොබෙදිය හැකි රටක්‌ තුළ ප්‍රමාණවත් බලය බෙදා ගැනීමේ රාමුවක්‌ ඊළමක්‌ බිහිවීමට මුල් නොවන බව. මේ ඇඟවීම් ප්‍රත්‍යක්‍ෂ මූලක සාක්‍ෂිවලින් සනාථ වන්නේ දැයි විමසා බලමු.

1. සම්බන්ධන් මහතා ඇතුළු දෙමළ ප්‍රභූ පන්තියේ නායකයන් ශ්‍රී ලංකාවට නිදහස ලැබීමටත් පෙර සිටම තමන්ට වෙනම රාජ්‍යයක්‌ අවශ්‍ය බව කියන මතවාදය සමාජගත කොට පෝෂණය කරමින් යථාර්ථයක්‌ බවට පත් කර ගැනීමට අඛණ්‌ඩව ක්‍රියාකරන බවට ප්‍රමාණවත් සාක්‍ෂි පවතී. වත්මන් විපක්‌ෂ නායකයා දේශපාලනයට පිවිසෙනුයේ දෙමළ රාජ්‍යයක්‌ ස්‌ථාපනය අරමුණු කොට ගෙන එස්‌. ෙ-.වී. චෙල්වනායගම් 1951 දී ආරම්භ කළ ඉලංකෙයි තමිල් අරසු කච්චි පක්‍ෂයෙනි. මොවුන් එක්‌ව 1972 දී පිහිටුවා ගත් දෙමළ එක්‌සත් විමුක්‌ති පෙරමුණ 1975 දී සම්මත කළ වඩුක්‌කොඩෙයි යෝජනාවෙන් ඊළම සිය ප්‍රධාන අරමුණ කොට ගත්තා පමණක්‌ නොව එය සපුරා ගැනීම සඳහා අවශ්‍ය වුවහොත් ආයුධ අතට ගැනීමේ අයිතිය ද පිළිගනු ලැබීය. 70 දශකයේ මැද භාගයේදී පමණ ඊළම අරමුණු කොට ගත් දෙමළ තරුණයන්ගේ සන්නද්ධ සටන් ව්‍යාපාරය පිළිසිඳ ගත්තේ මේ මතවාදයේ ගර්භාෂය තුළය. සම්බන්ධන් මහතා පාර්ලිමේන්තුවට පිවිසි 1977 මහ මැතිවරණයට දෙමළ එක්‌සත් විමුක්‌ති පෙරමුණ තරග කළේ ඊළම දිනා ගැනීම ප්‍රධාන තේමාව කර ගනිමිනි.

උතුරේ සන්නද්ධ කණ්‌ඩායම් බිහි වී එල්.ටී.ටී.ඊ. කෙමෙන් සටනේ ඒකාධිකාරය සියතට ගනිමින් සිටින විට සම්බන්ධන් මහතා ඇතුළු නායකයෝ එල්.ටී.ටී.ඊ. වෙනුවෙන් දිගටම පෙනී සිටියහ. කොටි තුවක්‌කුකරුවන් දෙමළ එක්‌සත් විමුක්‌ති පෙරමුණේ නායක ඒ. අමිර්තලිංගම් ඔහුගේ කොළඹ නිවසේදී ඝාතනය කළ පසුද දෙමළ ප්‍රභූ පන්තිය සිය ස්‌ථාවරය අත්හළේ නැත. එල්.ටී.ටී.ඊ නායක ප්‍රභාකරන් ජීවත්ව සිටියදී කළ සෑම ප්‍රසිද්ධ දේශනයක්‌ම අවසන් කළේ 'විමුක්‌ති කොටින්ගේ පිපාසය තමිල් ඊළමයි' කියමිනි. වෙනම රාජ්‍යයකින් මෙපිට කිසිවක්‌ භාරගැනීමට කොටි නායකයා කිසිවිටෙකත් කැමති වූයේ නැත. එබඳු වූ එල්.ටී.ටී.ඊ ය දෙමළ ජනතාවගේ එකම නියෝජිතයා බව සම්බන්ධන් මහතා නායකත්වය දෙන දෙමළ ජාතික සන්ධානය 2001 දී පිහිටුවාගත් විගස ඔහු විසින් නිවේදනය කරනු ලැබීය. 2005 ජනාධිපතිවරණය වර්ජනය කරන ලෙස එල්.ටී.ටී.ඊ දෙමළ ජනතාවට කළ නියෝගය කිළිනොච්චියේදී ප්‍රකාශයට පත් කරනු ලැබූයේ දෙමළ ජාතික සන්ධානය විසිනි. 2004 අප්‍රේල් මහ මැතිවරණයේදී උතුර - නැගෙනහිර දෙපළාතේ මන්ත්‍රී ධුර සංඛ්‍යාවෙන් බහුතරය දෙමළ සන්ධානය දිනා ගත්තේ එල්.ටී.ටී.ඊ ප්‍රචණ්‌ඩත්වයේ පිහිටෙන් බවට යුරෝපා සංගමය සැකසූ වාර්තාවකින් චෝදනා කෙරිණ.

සම්බන්ධන් මහතා ප්‍රභාකරන්ගේ අවසන් පැය දක්‌වාම ඔහුගේ ප්‍රකාශකයාව සිටියේය. එල්.ටී.ටී.ඊ නායකත්වය විනාශ වීමෙන් පසුවද ඔහු ඊළම අත්හළේ නැත. 2012 මැයි මස මඩකලපුවේ පැවති ඉලංකෙයි තමිල්අරසුකච්චි 14 වැනි වාර්ෂික සමුළුවේදී ඔහු කළ දේශනයේ ඇතුළත් මේ ප්‍රකාශ බලන්න.-'සන්නද්ධ බලයෙන් අපට දිනා ගැනීමට නොහැකි වූ, අපේ ජනතාවගේ උතුරා යන අභිලාෂයන් ජීවිත හානියකින් තොරව සාක්‍ෂාත් කර ගැනීමේ ඉඩ ප්‍රස්‌ථාව, අන්තර්ජාතික ප්‍රජාවේ වත්මන් පරිචය නිසා දැන් අපට උදාවී තිබේ'. මේ කියන්නේ ඊළම ගැන නොවේ නම් අන් කවරක්‌ ගැනද? (එල්.ටී.ටී.ඊ ) සන්නද්ධ බලයෙන් දිනා ගැනීමට උත්සාහ කළේ ඊළම නොවේ නම්, අන් කුමක්‌ද? දැන් ජීවිත හානියකින් තොරව අන්තර්ජාතික ප්‍රජාවේ උදව්වෙන් සිය අභිලාෂයන් (ඊළම) දිනා ගැනීමට ඉඩ ප්‍රස්‌ථාව විවෘත වී ඇතැයි සම්බන්ධන් මහතා උදම් අනයි. ඉතින් නෙළුම් පොහොට්‌ටුව නිසා ඊළම විකසිත වනු ඇතැයි ඔහු කරන අන්තරාය ඇඟවීම ව්‍යාජයක්‌ නොවන්නේද ?

2. අර්ධ සත්‍යයකි. ඊළම නැතහොත් ශ්‍රී ලංකා රාජ්‍යය බෙදා වෙන් කිරීම අනර්ථයක්‌ වන්නේ සිංහල මිනිසාට පමණක්‌ නොවේ. දෙමළ හා මුස්‌ලිම් සාමාන්‍ය මිනිසාට ද එය එකසේ අනර්ථකාරී, විනාශකාරී වන්නේය. වාර්ගික පදනමකින් බෙදී ගිය රටවලට අත්වූ යහපතක්‌ නැත. යම් පිරිසකට යහපතක්‌ වූයේ නම්, එකී යහපත නිසැකවම සිදුවූ අයහපතට අඩුය. ඒ බව සනාථ කෙරෙන නිදසුන් ඕනෑ තරම් තිබේ. 2011 දී අධිරාජ්‍යවාදීන් විසින් සුඩානය දෙකඩ කොට නිර්මාණය කරන ලද දකුණු සුඩානය අද එරට ජනයා කිසිවකුගේ අවධානයට ලක්‌ නොවී මැස්‌සන්, මදුරුවන් මෙන් මිය යමින් සිටින දේශයකි. ඔවුන් එක්‌ව සර්බියාවෙන් කඩා වෙන්කර දුන් කොසෝවෝ ප්‍රාන්තය අද ගණිකාවන්ගේ පුරයකි.

3. අනුමාන ප්‍රකාශනයකි. එක්‌සත්, නොබෙදුණු හා නොබෙදිය හැකි රටක්‌ තුළ බලය බෙදා ගැනීමේ රාමුවක්‌ ස්‌ථාපනය කිරීමෙන් වෙනම රාජ්‍යයක්‌ බිහි නොවන බවට ස්‌ථිර සහතිකයක්‌ නැත. එසේ වන්නටද නොවන්නටද පිළිවන. ශ්‍රී ලංකාව ඇතුළත මෙන්ම පිටතද අන්තර් ජාතික ප්‍රජාව නමින් හඳුන්වන බලවත් රටවල සහය ඇතිව ක්‍රියාත්මක ප්‍රබල බෙදුම්වාදී ප්‍රවණතාවක්‌ පවතින සමයක සම්බන්ධන් මහතා යෝජනා කරන ආකාරයේ බලය බෙදා ගැනීමේ රාමුවක්‌ ස්‌ථාපනය කිරීම බෙදී වෙන්වී යාමට විශාල ඉඩකඩක්‌ නිර්මාණය කරයි. සෝවියට්‌ දේශයේ සහ යුගෝස්‌ලාවියාවේ බිඳවැටීමට මුල් වූ හේතු සාධක අතර ඒ රටවල පැවති ෙෆඩරල් පාලන ව්‍යqහයද ප්‍රධාන එකක්‌ වූ බව පැහැදිලිය.

2017 නොවැම්බර් 5 වැනිදා ප්‍රධාන පෙළේ සති අන්ත පුවත්පතක්‌ උතුරේ ජනතාවට තිබෙන ගැටලු මොනවාදැයි ප්‍රශ්න කළ විට සම්බන්ධන් මහතාගේ පිළිතුර වූයේ උතුරේ ජනයාගේ ඉඩම්වල හමුදා කඳවුරු ස්‌ථාපනය කර තිබීම, අතුරුදන් වූවන්ගේ ගැටලු, රැකියා විරහිතභාවය සහ වැන්දඹුවන්ගේ දුක්‌ගැනවිලි ආදියයි. සම්බන්ධන් මහතාගේ ව්‍යාපෘතියට සහය දක්‌වන අද්වකාත්වරයකු වන ජාතික සාම මණ්‌ඩල ප්‍රධානියා පළාත් පාලන ඡන්දයෙන් පසුව ඉංගී්‍රසි පුවත්පතකට ලිපියක්‌ ලියමින් උතුරේ ජනයාගේ හදිසි ප්‍රමුඛතා ලෙස හඳුන්වා තිබුණේ ද මේ ගැටලුමය. ඒවාට විසඳුම් සෙවීමට සම්බන්ධන් මහතා යෝජනා කරන ආකාරයේ පුළුල් බලය බෙදීම අවශ්‍ය වන්නේ මන්දැයි පැහැදිලි නැත.

විපක්‌ෂ නායක සම්බන්ධන් මහතාණෙනි, සිංහල, දෙමළ, මුස්‌ලිම් අපි සියලු දෙනා එක්‌ව සියලුදෙනාට හැකි උපරිම සාමයෙන්, සමගියෙන්, අභිමානයෙන් හා සමානාත්මතාවයෙන් ජීවත්විය හැකි එක්‌ ජාතියක්‌ හා එක්‌ දේශයක්‌ ගොඩනගමු. ඔබ ඊළඟ ජනාධිපතිවරණයට ඉදිරිපත් වන්න. බහුතරයකට එකඟ විය හැකි වැඩ පිළිවෙළක්‌ ඔබ ජනතාව හමුවේ තබන්නේ නම් මමද ඔබට ඡන්දය දෙමි.

[Divaina 3/11]

යුතුකම සංවාද කවය
www.yuthukama.com
Like us on facebook : https://www.facebook.com/yuthukama

ලෝකය ජය ගත් බද්දේගම ළිංමැඩියා - ආරියශීල වික්‍රමනායක

කොදෙව් සන්දේශය - මව්බිම තීරු ලිපිය - 2018.3.13

> චිංගීස් ආයිත්මාතව් දුටු ලංකාව

“කල්පනා කරලා බලන්න. මම ලෝකෙ ගිහින් නැති රටක් නැති තරම්. හැබැයි ඔය ෂර්ට් ඔය විදිහට ඇඳගෙන මුළු අවුරුද්ද පුරාම රටේ ඕන තැනක ඇවිදින්න පුළුවන් රටවල් කීයෙන් කීයද ලෝකේ තියෙන්නේ? ”
ආරියශීල වික්‍රමනායක මහතා දිනක් මට එවැනි අපූරු පැනයක් යොමු කළේය. ඒ කතාව සරලය. එහෙත් ගැඹුරුය. සියල්ලෝම පාහේ දන්නා නමුදු බොහෝ දෙනෙකුගේ මතකයට නොඑන්නකි. ලංකාවේ ප්‍රබලතා ගැන දිග කතාවක් ඔහු ඉතා ලස්සනට කෙටි කළ ආකාරය ඇසූ මට සිහිපත් වූයේ සෝවියට් ලේඛක චිංගීස් ආයිත්මාතව් විසින් රචිත “වේලාසන කොක්කු ඇවිත්” නවකතාවේ එන ලංකාව පිළිබඳ අගනා විස්තරයකි. ලංකාව වනාහී ඍතු භේදවලින් තොර, දැවැන්ත හිමතලා හෝ කාන්තාරවලින් වැසී නොගිය, රටේ ඕනෑම තැනක, ඕනෑම කාලයක පහසුවෙන් ජීවත් විය හැකි දේශගුණයක් සහිත, වසර පුරා හරිත පැහැයෙන් බබළන ගහකොළ සහිත රටක් බව එහි සිත්ගන්නා සුළු ආකාරයෙන් විස්තර කොට තිබේ. කෙසේ වුවද මා මෙහිදී ලියන්නට අදහස් කළේ චිංගීස් ආයිත්මාතව් ගැන නොව ඔහුගේ කතාව මගේ මතකයට කැඳවා දුන් ආරියශීල වික්‍රමනායක ගැනය.

> ලියා ඉවර නොවූ කතාවක්....

මම මේ දිනවල අලුත්ම පොතක අවසානම හරිය ලියමින් සිටිමි. ඒ ආරියශීල වික්‍රමනායකගේ කතාවය. ලියා ඉවර නොකළ දේ ගැන කල් තියා කිට්ටු යහළුවන්ට වුවද කීම සුදුසු නැති බව චිංගීස් ආයිත්මාතව් පවසා ඇතත් මේ අලුත් පොත ගැන නම් යමක් නොලියා සිටීම අසීරුය.
ආරියශීල වික්‍රමනායක යනු මාස්ටර් ඩයිවර්ස් සහ පැල්වත්ත කිරි යන ආයතනවල හිමිකරුවාය. මව්බිම ලංකා පදනමේ සභාපතිවරයාය. ඒ නිල හැඳින්වීමෙන් ඔබ්බට ගොස් ඔහු ගැන තව කීමට ඇති දේ බොහෝය. සැකෙවින්ම කිවතොත් ඒ සියල්ලට වඩා ඔහුගේ වැදගත්කම වන්නේ ඔහු මේ රට පිළිබඳ මනා දැක්මක් හා ආදරයක් ඇති දේශීය ව්‍යාපාරිකයකු වීමය. දැක්මෙන් නොනැවතී ඒ දැක්ම වෙනුවෙන් ප්‍රායෝගිකව මහපොළොවේ අරගල කළ හා ඒ වෙනුවෙන් තම පෞද්ගලික ප්‍රතිලාභ උගසට තැබූ ව්‍යාපාරිකයෙක් වීමය. ඒ කැපවීම හා පරිත්‍යාගය කිසිවිටෙකත් ව්‍යාපාරිකයෙකුගෙන් අපේක්ෂා කළ නොහැකි තරමේ එකකි. ඔහු මේ රට මුහුණ දී සිටින ආර්ථික දේශපාලන ඛේදවාචකය නිවැරදිව විනිවිද දුටුවේය. ඔහු නිතරම පරාධීනත්වයට එරෙහිව ශක්තිමත් ජාතික ආර්ථිකයක් වෙනුවෙන් පෙනී සිටියේය. ඒ ඔස්සේ මේ රටට ලද හැකි ජයග්‍රහණ කෙතරම් විශාල දැයි ඔහු කතාවෙන් පමණක් නොව ක්‍රියාවෙන්ද රටට ඔප්පු කළේය. ආරියශිලගේ කතාව රටට කිව යුතු යැයි මා තීරණය කළේ ඒ නිසාය. එසේ නොමැතිව සල්ලිකාරයෙකු සල්ලි හෙවූ ආකාරය ගැන ලිවීම මගේ පරමාර්ථයන්ට අයත් නොවේ. ආරියශීල ධනවතෙකු වුවද ඔහුට ඇත්තේ සමාජවාදී මනසකි. සමාජවාදීන් යැයි කියාගන්නා අය සිය දහස් ගණනක් ඇසුරු කොට, ඔවුන්ගේ උස් මිටිකම් ගැන හොඳාකාරවම දන්නා මට ආරියශීල ගැන ලිවීමට ඒ දැක්ම ශක්තියක් මිස කිසිදු ආකාරයක බාධාවක් වී නැත.

> රට ගොඩනැඟීමේ වික්‍රමනායක ආදර්ශය
ඔහු මාස්ටර් ඩයිවර්ස් ආයතනය හරහා ලංකාවේ නම ඉන්දියන් සාගරයෙන් බොහෝ ඈතට ගෙන ගියේය. ඔහු පැල්වත්ත කිරි ආයතනය හරහා “ලංකාව කිරිවලින් ස්වයංපෝෂිත කළ හැකිය” යන සිහිනය සෑහෙන තරමින් යථාවක් බවට පත්කළේය. රටට අවශ්‍ය සීනි රටේම නිපදවා ගත හැකි බව ඔහු ප්‍රායෝගිකව රටට ඔප්පු කළේය. පාන් පිටි වෙනුවට සහල් හා සහල් පිටි ආහාර ප්‍රචලිත කිරීමේ වැදගත්කම කාටත් පෙරාතුව රටට හඬ ගා කීවේ වික්‍රමනායකය. හම්බන්තොට වරායක් ඉදිකිරීමේ උපාය මාර්ගික වැදගත්කම ගැන කාලයක් තිස්සේ රටේ සියලු ආණ්ඩු දැනුවත් කරමින් ඒ සිහිනය සැබෑවක් වනතුරු ආරියශීල ඒ වෙනුවෙන් අරගල කළේය. වැටුප් දීමනා රහිතව රජයේ විවිධ තනතුරු දරමින් ලාබ ලැබිය නොහැකි යැයි කී ආයතන ලාභ ලබන තත්ත්වයට ගෙන ඒමට ඔහුට හැකිවිය. මව්බිම ලංකා පදනම වැනි ආයතන හරහා දේශීය ව්‍යාපාරිකයන්ට නායකත්වය සපයමින් ජාතික ආර්ථික අරමුණු ඔස්සේ ඔවුන් පෙළගැස්වීමට වික්‍රමනායක දැක්වූ දායකත්වය අති විශිෂ්ටය. මජර දේශපාලනය, අස්ථාවර රාජ්‍ය ප්‍රතිපත්ති, බඩ ඉස්සර කරගත් වම, ආදී නොයෙකුත් බාහිර බාධා නිසා ඔහුගේ මැදිහත්වීම්වල උපරිම පල නෙලා ගැනීමට මේ රට අසමත් වුවද, තනි පුද්ගලයෙක් ලෙස ඔහු තමන්ට කළ හැකි සීමාවේ තරමද ඉක්මවා බොහෝ දුර ගියේය. ඔහු ඒ අරගලය දියත් කළේ වාසි සහගත බිමක නොව ඉතා අවාසි සහගත බිමක බවද අමතක කළ යුතු නැත. කුමන බාධක මැද වුවද “අපට කළ හැකිය” යන වැදගත්ම පණිවිඩය මේ රටට හඬ ගා කීමට වික්‍රමනායක සමත් විය. මේ රට ඔහුට සවන් දිය යුත්තේ ඒ නිසාය.

> ලෝකය ජය ගත් බද්දේගම ළිංමැඩියා

ආරියශීල වික්‍රමනායක පළමුකොටම හොඳ ගැමියෙකි. එහෙත් ඔහු ළමා වියේ සිටම විදේශිකයන් අතර හිඳ ඉංග්‍රීසියෙන් අධ්‍යාපනය ලැබුවේය. ඔහු අද ලෝකයේ රටවල් ගණනාවක් සමඟ ගනුදෙනු කරයි. ඒ කවර තරමේ ලෝක අත්දැකීම් තිබුණද මේ කුඩා දූපතේ විශාලත්වය අවතක්සේරු කිරීමේ හීනමානයක් ඔහුට නැත. තමාගේ මුල් බිම වූ බද්දේගම ගැමි සංස්කෘතියේ ප්‍රබලතා හඳුනාගැනීමට ඔහුගේ ගෝලීය අත්දැකීම් ඔහුට කිසිදු බාධාවක් වී නැත. මතවාදී ළිං පතුල් තුළ ජීවත් වෙමින්, ගෝලීය මානසිකත්වය ගැන වහසි දොඩන බොහෝ පඬියන්ට වඩා ආරියශීල ලෝකය ගැනත් දූපත ගැනත් දත්තෙකි. කොදෙව්ව දෙසත් ලෝකය දෙසත් ඇස් ඇර බැලීම කොදෙව් විරෝධයේ හීනමාන රෝගය සුවකරගැනීමේ හොඳම ක්‍රමයකි. මේ සියල්ල අදාළ කෘතිය තුළින් විස්තරාත්මකව පාඨක ඔබට කීමට හැකි වේ යැයි සිතමි. මේ දිනවල මගේ පෑනට ජවය සපයන මහා අපේක්ෂාව වන්නේ එයය.

-ඉසුරු ප්‍රසංග
යුතුකම සංවාද කවය
www.yuthukama.com
Like us on facebook : https://www.facebook.com/yuthukama

පෙබරවාරි 10 නෙළුම් පොහොට්ටුවේ ජය රටේ විජයග‍්‍රහණයක් කරවමු!

- ගෙවිඳු කුමාරතුංග-මහනුවර ප‍්‍රදේශයේ ජාතිවාදී කලකෝලාහල පැතිරීමට ඉඩ හැරීම මඟින් හා එය දඩමීමා කරගනිමින් රජය පෙබරවාරි 10 දින මෙ රටවැසියා උස් හඬින් ප‍්‍රකාශ කළ අභිලාෂ යටපත් කරලීමේ උත්සහයක නිරත ව සිටින බව පැහැදිලි ය. ඊට පෙර සිට ම ශී‍්‍ර ලංකා පොදුජන පෙරමුණට (නෙළුම් පොහොට්ටුවට) ලැබුණේ 50%ට අඩු ඡන්ද ප‍්‍රතිශතයක් ය යන කරුණ අවධාරණය කරමින් එ් මැතිවරණයේ දී මහින්ද රාජපක්ෂ නායකත්වය හා ශී‍්‍ර ලංකා පොදුජන පෙරමුණ ලත් අතිවිශිෂ්ට ජයග‍්‍රහණය අවප‍්‍රමාණය කිරිමේ ප‍්‍රයත්නයක් දරනු පෙණේ. දැන් දැන් පෙබ. 10 ජනමතය හා ජාතිවාදය අතර සබඳතාවක් මවාපාමින් එ් ජයග‍්‍රහණයට නිග‍්‍රහ කිරීමේ ප‍්‍රයත්නයන් ද දක්නට ලැබේ.

කෙසේ වුව ද ගෙවුණු වසර 3 පුරාවට පැවැති පාලනය, ඒ පාලනය රට මත පැටවීමට දැරූ විනාශයන් සියල්ල මුළුමනින් ම ප‍්‍රතික්ෂ්ප කරන බව ද, ම්ලේච්ඡ බෙදුම්වාදී ත‍්‍රස්තවාදය සහමුලින් ම පරදා එ්කීය ශී‍්‍ර ලංකාව යළි ප‍්‍රතිස්ථාපනය කළ, විජාතික බලවේග හමුවේ නොසැලී ශී‍්‍ර ලංකාවේ ස්වාධීනත්වය හා දේශයේ සම්පත් සුරක්ෂිත කිරීමට කැපවුණු මහින්ද රාජපක්ෂ නායකත්වය රටට අවශ්‍ය බව ද පෙබරවාරි 10 පළාත් පාලන මැතිවරණයේ දී රටවැසියා උස් හඬින් ප‍්‍රකාශ කර ඇති බව යටපත් කළ නොහැකි ය.

ජයග‍්‍රහණයේ සුවිශිෂ්ට බව

පෙබරවාරි 10 මැතිවරණය පැවැත්වූයේ පළාත් පාලන ආයතන 340ක් වෙනුවෙන් ය. ඉන් ආයතන 239ක් පොදුජන පෙරමුණ ජයග‍්‍රහණය කරද්දී දෙ වන තැන ලත් එක්සත් ජාතික පෙරමුණට ජයග‍්‍රහණය කළ හැකි වූයේ ආයතන 41ක් පමණි. සිරිසේන ජනාධිපතිතුමා නායකත්වය දුන් ශී‍්‍රල.නි.ප. හා එ.ජ.නි.ස. එකතුව දිනා ඇත්තේ ආයතන 10ක් පමණ ය. දෙමළ ජාතික සන්ධානය ආයතන 34ක් ජය ගන්නා විට ජනතා විමුක්ති පෙරමුණට එක ද ආයතනයක් හෝ ජයගත නොහැකිව ඇත. ප‍්‍රතිශත හැටියට සැලකුව හොත් පොදුජන පෙරමුණ 70% ඉක්මවන ජයග‍්‍රහණයක් ලබද්දී එක්සත් ජාතික පෙරමුණට හිමිව ඇත්තේ 12%කි. සිරිසේන ජනාධිපතිතුමාට 3%ට අඩු ප‍්‍රතිශතයකි. දෙමළ ජාතික සන්ධානයට 10% හිමිවන විට ජනතා විමුක්ති පෙරමුණට 0%කි. වසර 3ක් පුරා ජනාධිපති ධුරය, අගමැති ධුරය දරමින් රාජ්‍ය බලය භුක්ති විඳින එක්සත් ජාතික පක්ෂයට, ශී‍්‍රල.නි.ප.යට හා එක්සත් ජනතා නිදහස් සන්ධානයට මෙන් ම විපක්ෂ නායකයා හා විපක්ෂයේ ප‍්‍රධාන සංවිධායක ලෙස නිල විපක්ෂයේ වරප‍්‍රසාද භුක්ති විඳින දෙමළ ජාතික සන්ධානයට හා ජනතා විමුක්ති පෙරමුණට යන පක්ෂ සියල්ලට ම දිනාගත හැකි ව ඇත්තේ ආයතන 340න් ආයතන 85ක් පමණි. ප‍්‍රතිශතයක් ලෙස 25% පමණි. ඊට ප‍්‍රතිපක්ෂ ව මහින්ද රාජපක්ෂ නායකත්වයෙන් ශී‍්‍ර ලංකා පොදුජන පෙරමුණ ඉදිරිපත් වූ පළමු ඡන්දයේ දී ම ආයතන 340න් ආයතන 239ක්, 70% ඉක්මවා යන ප‍්‍රතිශතයක් සහිත විශිෂ්ට ජයග‍්‍රහණයක් ලබා ඇත.
ඉතිහාසයේ කිසි දින රාජ්‍ය බලය අහිමි පාර්ශ්වයක් පළාත් පාලන ඡන්දයක් ජයග‍්‍රහණය කර නොමැති පසුබිමක ලත් ජයග‍්‍රහණයක් වීම, ඡන්ද කොට්ඨාශවලින් 70%ක් හා සමානුපාතික නියෝජන 30%ක් වශයෙන් තිබූ ඡන්ද ක‍්‍රමය 60% හා 40% ලෙස - පැහැදිලි ජයග‍්‍රහණයක් ලැබීම වඩා අපහසු වන පරිදි ඡන්ද ක‍්‍රමය විකෘති කර තිබිය දී ලද ජයග‍්‍රහණයක් වීම, පොදුජන පෙරමුණ පිහිටුවීම හරහා සිදුවන්නේ ශී‍්‍රල.නි.ප.යේ ඡන්ද පදනම දෙකට කැඞීමෙන් එක්සත් ජාතික පක්ෂයට පහසු ජයග‍්‍රහණයක් හිමිකර දීම බවට නැඟුණු චෝදනා හමුවේ ඇතැම් මිතුරු බලවේග පවා චංචල වූ මොහොතක ලැබූ ජයග‍්‍රහණයක් වීම, එක්සත් ජාතික පක්ෂය හා ශී‍්‍රල.නි.ප.ය ලෙස ප‍්‍රධාන පක්ෂ දෙක තහවුරු වූ පසු මෛතී‍්‍රපාල සේනනායක, ටී. බී. ඉලංගරත්න, විජය හා චනිද්‍රිකා වැනි ශී‍්‍රල.නි.ප. ප‍්‍රබලයන් ද, ගාමිණී දිසානායක, ලලිත් ඇතුළත්මුදලි, පේ‍්‍රමචන්ද්‍ර වැනි එ.ජා.ප. ප‍්‍රබලයන් ද නව පක්ෂ සැදීමට දැරූ උත්සාහයන් ගේ අසාර්ථකත්වය පිළිබඳ ව ගොඩනැංවූ මානසික බාධක හමුවේ ලත් ජයග‍්‍රහණයක් වීම - මේ ජයග‍්‍රහණයේ විශිෂ්ටත්වය තව දුරටත් විශද කරන සාධක වේ.
 

හතර දෙනාම හෙළුවෙන්

ජනාධිපති ධුරය දරමින් ම මෛතී‍්‍ර නායකත්වය වෙනුවෙන් ඡන්දය ඉල්ලා දිනාගත හැකි වූයේ ආයතන 10 (2.9%) නම්, අගමැති ධුරය දරමින් ම එක්සත් ජාතික පක්ෂ රජයකට ජනවරමක් ඉල්ලා දිනාගත හැකි වූයේ ආයතන 41 (12%) නම්, විපක්ෂයේ ප‍්‍රධාන සංවිධායක ධුරය දරමින් තිස්සමහාරාම ආදර්ශය අනුගමනය කරමින් තමන්ට ගම බාර දෙන්නැයි ඉල්ලූ ජ.වි.පෙ.ට එක ආයතනයක් වත් (0%) දිනාගත නොහැකි වී නම්, ප‍්‍රජාතන්ත‍්‍රවාදය පිළිබඳ අබමල් රේණුවක හෝ හැඟීමක් තිබේ නම් මේ නායකයන් කළ යුතුව ඇත්තේ රාජ්‍ය තනතුරුවලින් පමණක් නොව තමතමන් ගේ පක්ෂ නායකත්වයෙන් ද ඉල්ලා අස්වීම ය.

විපක්ෂ නායකකම දරන දෙමළ ජාතික සන්ධානයේ ආර්. සම්බන්දන් මහතා සම්බන්ධයෙන් ද කිවයුතු ව ඇත්තේ මෙය ම ය. ෆෙඩරල් බලතල ඉක්මවා යන ස්වයං පාලනයක් දෙමළ නිජභූමියට ලබාගන්නා බවට ප‍්‍රතිඥ දුන් ඔවුනට යාපනය දිස්ති‍්‍රක්කයේ පැහැදිලි බහුතරයක් ලබාගත හැකි ව ඇත්තේ පළාත් ආයතන 2ක පමණි. උතුරු හා නැෙඟනහිර පළාත්වල එක ද දිස්ති‍්‍රක්කයක හෝ 50% ඉක්මවා යන ඡන්ද ප‍්‍රතිශතයක් ලබා ගැනීමට දෙමළ සන්ධානය අසමත් ව ඇත. 2015 පාර්ලිමේන්තු මැතිවරණයේ දී ලබාගත් 515,963 ඡන්ද ප‍්‍රමාණය 339,675 දක්වා ඡන්ද එක්ලක්ෂ හැත්තහයදාහකට වැඩි සංඛ්‍යාවකින් අඩු කරගෙන ඇත.

එහෙත් මේ අය ජනමතයට එරෙහි ව බලයේ එල්ලී සිටීමට අපූරු ප‍්‍රතිශත විජ්ජාවක් මවමින් ජනතා අභිලාෂය දුර්මුඛ කිරීමේ ප‍්‍රයත්නයක නිරත ව සිටී. දෙමළ ජාතික සන්ධානයේ සම්බන්දන් මහතා තම විපක්ෂ නායක පුටුවේ සිටිමින් ම මහින්ද රාජපක්ෂ ජනතා නායකයාට අපවාද නඟමින්, බැන වදිමින් කියාසිටියේ පොදුජන පෙරමුණට මුලූ රටෙන් ම 45%ක ඡන්ද ප‍්‍රතිශතයක් ලැබෙන විට 2015 ජනවාරි 8 මහින්ද රාජපක්ෂ රජය පැරදවීමට එක්වූ චෞර හවුලට 50% ඉක්ම වූ ප‍්‍රතිශතයක් ලැබී ඇති බව ය. එ.ජා.ප.යට 32.6%ක්, ශී‍්‍රල.නි.ප. හා එ.ජ.නි.ස. එකතුවට 13.4%ක්, ජ.වි.පෙ.ට 6.2%ක්, දෙමළ ජාතික සන්ධානයට 3.0%ක් ලෙස එදා ජනවාරි 08 මවුබිමට එරෙහිවූ හවුලට 55%ක් ඇති බව ය!

දැන් මේ පලාත් පාලන ඡන්දයේ දී එ.ජා.ප.යට, ශී‍්‍රල.නි.ප.යට හා එ.ජ.නි.ස.ට, ජ.වි.පෙ.ට, දෙමළ සන්ධානයට ලැබුණු ඡන්ද එ ලෙස මේ රජය පවත්වාගෙන යෑමට ලැබුණු ඡන්ද ලෙස එකතු කළ හැකි ද? ජ.වි.පෙ.ට ලැබුනු 6% මහබැංකු හොරකමට, නිදහස් අධ්‍යාපන කප්පාදුවට, පොහොර සහනාධාරය කැපීමට, අගමැතිවරයා ගේ ආර්ථික ප‍්‍රතිපත්තියට, ආණ්ඩුව එ ලෙස ම පවත්වාගෙන යෑමට ලැබුණු ඡන්දයක් ද? සිරිසේන ජනාධිපතිවරයා ඡන්ද ලබාගත්තේ මේ රජය, මේ ලෙස ම පවත්වාගෙන යන බව කියමින් ද? ගෙවුණු වසර 3 ආර්ථිකය අසාර්ථක බව, එය නොපමාව වෙනස් කළ යුතු බව, මහබැංකු හොරුන්ට අනිවාර්යයෙන් දඬුවම් දිය යුතු බව, රාජ්‍ය දේපළ - විශේෂයෙන් රාජ්‍ය බැංකු රැකගත යුතු බව ආදිය කියමින් නොවේ ද? ශී‍්‍රල.නි.ප.යට හා එ.ජ.නි.ප.යට ලැබුණු 13% මේ රජය පවත්වාගෙන යෑමට ලැබුණු ඡන්දයක් වන්නේ කෙසේ ද? ආණ්ඩුවේ ප‍්‍රධාන පක්ෂ දෙක ම වෙන වෙන ම යන ගමනක් ගැන කියමින් ඡන්දය ඉල්ලා ඇති විට මේ රජය පවත්වාගෙන යෑමට ලැබුණු ජනවරමක් ගැන කතා කළ හැකි ද? එසේ තිබිය දී විපක්ෂ නායක පුටුවේ සිටිමින් ම විභේදනය වූ ආණ්ඩුවේ පක්ෂ ලත් ඡන්ද එකතු කිරීමෙන් නොනැවතී එ් ඡන්ද සමඟ විපක්ෂයේ ඔවුන් ලත් ඡන්ද ද හිරිකිතයකින් තොර ව එකතු කරමින්, මෙ බලපන්, උඹලට 45% යි, අපිට, අපේ ආණ්ඩුවට 55% යි කියන විපක්ෂ නායකයා ගේ ගෝරනාඩුව අසූවිය පැන්න මහල්ලකු ගේ නිරුවත් මදාවි හැසිරීමකටත් වඩා අශෝබන ය. ජුගුප්සාජනක ය.
ඇත්ත වශයෙන් ම පෙබ. 10 දින මෙ රට වැසියන් සිය ඡන්දයේ බලයෙන් ජනාධිපති, අගමැති, විපක්ෂනායක, විපක්ෂයේ ප‍්‍රධාන සංවිධායක යන හතරදෙනාට ම එ් පදවි දැරීමට මොනයම් හෝ සදාචාරාත්මක අයිතියක් යුක්තියක් නැති බව පෙන්වා ඇත. එ් බව නොපිළිගනිමින් මේ සිවුදෙනා කරන කියන සියල්ල ජනතාව දකිනු ඇත්තේ ඇෙඟ් නූල්පටක්වත් නොමැතිව ආඩම්බරයෙන් වීදි සංචාරය කළ අධිරාජ්‍යයා පරිදි ම ය. එක ම කෝලම් නාටකයක් පරිදි ය. රජ ගෙදර ෙදාරටුව ඉදිරිපිට දී ම වසන්ත සේනානායක රාජ්‍ය ඇමැතිතුමාට මේක නම් එක ම කොමිඩියක් යැ යි කියවෙන්නේ එ් නිසා ය.

පනස්හය පෙරට ම!

56 දී මෙ රට ජනීජනයා ශී‍්‍ර ලංකා නිදහස් පක්ෂය නම් වූ අලූත් පක්ෂයක් තමන් ගේ පැතුමන් වෙනුවෙන් ඉහළට ඔසවා තැබීමෙන් පසු යළි අලූත් දේශපාලන පක්ෂයක් තම පැතුමන් වෙනුවෙන් ඔසවා තැබූයේ මේ පෙබරවාරි 10 දා ය. එ් නිසා නෙළුම් පොහොට්ටුවේ ජයග‍්‍රහණය 56 සිහිපත් කරවන්නක් වීම ස්වභාවික ය. එහෙත් 45% ඡන්ද ප‍්‍රතිශතයක් ලැබූ මේ ජයග‍්‍රහණය 56 හා සැසඳීම 56ට කරන නිග‍්‍රහයක් ලෙස පනස්හයේ දරුවන් ගැන කතා කරන, එ් පනස්හයේ දරුවන් වෙනුවෙන් දැනුම නිර්මාණය කිරීමට මුල් වූ ඇතැම් සුධීමතුන් පවා පවසන බැවින් එ් ගැන මඳක් විමසීම වටී.
එස්. ඩබ්ලිව්. ආර්. ඞී. බණ්ඩාරනායක ශී‍්‍රමතානන් ගේ නායකත්වයෙන් ශී‍්‍ර ලංකා නිදහස් පක්ෂය මුල්වරට ඡන්දයකට මුහුණ දෙන්නේ 1952 මහමැතිවරණයේ දී ය. එ් සඳහා බණ්ඩාරනායක මහතා ඉදිරිපත් වනුයේ පැවැති රජයේ සභානායකවරයා ලෙස ය. පළාත්පාලන ඇමැති ලෙස මෙ රට පුරා ගම්සභා නායකයන් සමඟ ගොඩනඟාගත් සබඳතා ජාලයක් සමඟ ය. තිහේ දශකයේ සිට ගොඩනැඟූ සිංහල මහ සභාව ශී‍්‍රල.නි.ප.යේ න්‍යෂ්ටිය ලෙස යොදාගනිමින් ය. එසේ නමුත් 1952 මහමැතිවරණයේ දී බණ්ඩාරනායක මහතාට, ශී‍්‍රල.නි.ප.යට රටේ ආසන 101න් දිනාගත හැකි වූයේ ආසන 9ක් (8.9%ක්) පමණි. එ් ලංකා සමසමාජ පක්ෂය ද ආසන 9ක් හා කොමියුනිස්ට් පක්ෂය ආසන 4ක් දිනාගනිද්දී ය (පිළිවෙලින් 13.07%ක් හා 5.76%ක් ඡන්ද ප‍්‍රතිශත ලබාගනිද්දී ය). කොමියුනිස්ට් පක්ෂය, ලංකා සමසමාජ පක්ෂය වෙනුවෙන් පෙනී සිටියේ නම් බණ්ඩාරනායක මහතාට විපක්ෂ නායකකම පවා අහිමි වීමට ඉඩ තිබිණි.

1956 මහමැතිවරණයේ තත්වය කෙසේ ද? එහි දී බණ්ඩාරනායක මහතා සමස්ත ආසන 95න් ආසන 51ක් දිනාගත්තේ ය. ආසන 54ක් හිමිව තිබූ එක්සත් ජාතික පක්ෂය ආසන 8ට බැස්සේ ය. මෙය විශිෂ්ට ජයග‍්‍රහණයක් බවට කිසිදු සැකයක් තිබිය නොහැකි ය. එහෙත් අද පොදුජන පෙරමුණේ 45%ක ඡන්ද ප‍්‍රතිශතය ගැන අවධාරණය කරන්නන්ට අනුව ගොස් 56 මැතිවරණයේ ඡන්ද ප‍්‍රතිශත සලකා බැලූවහොත් දක්නට ලැබෙන්නේ කුමක් ද? සියලූ පරගැති සිරිත් රජ කරවා හුදී ජනයා ගේ සිත් පෑරවූ ජෝන් කොතලාවල මහතා ගේ එක්සත් ජාතික පක්ෂයට සමස්ත ඡන්දයෙන් 27.91%ක් ලැබෙද්දී, පිලිප් ගුණවර්ධන වාමාංශික නායකයා සමඟ, සිංහල භාෂා පෙරමුණ සමඟ මහජන එක්සත් පෙරමුණ ලෙස සන්ධානගත වූ ශී‍්‍රල.නි.ප.යට, බෞද්ධ තොරතුරු කොමිෂන් සභා වාර්තාවේ නිර්දේශ කි‍්‍රයාත්මක කරන බවට ශපථ කරමින් මුළුමහත් බෞද්ධ ජනයා ගේ ද, සිංහල භාෂාව රාජ්‍ය භාෂාව කරන බවට ශපථ කරමින් සිංහල භාෂානුරාගින් ගේ ද, තිරිකුණාමලය, කටුනායක අධිරාජ්‍යවාදීන් ගේ යුද කඳවුරු ඉවත් කරන බවට ශපථ කරමින් අධිරාජ්‍ය විරෝධීන් ගේ ද, වරාය, බස් ජනසතු කරන බව ශපථ කරමින් සමාජවාදීන් ගේ ද නායකත්වය දිනාගත් බණ්ඩාරනායක මහතාට (මහජන එක්සත් පෙරමුණට) ලබාගත හැකි ව ඇත්තේ සමස්ත ඡන්දයෙන් 39.52%ක් පමණි.

එ් නිසා සමස්ත ඡන්දයෙන් 45%ක් ලැබීම ශී‍්‍ර ලංකා පොදුජන පෙරමුණේ අතිවිශිෂ්ට ජයග‍්‍රහණයක් ම ය. ඊට නායකත්වය දුන් මහින්ද රාජපක්ෂ ප‍්‍රමුඛ එ්කාබද්ධ විපක්ෂයේ නායකකාරකාදීන්ට, ඊට සංවිධාන ශක්තිය සැපයූ ශී‍්‍ර ලංකා පොදුජන පෙරමුණේ නායකයන්ට සංවිධායකයන්ට, ඊට මතවාද සැපයූ ජාතික සංවිධානවලට - මේ සියලූදෙනාට ම සතුටුවිය හැකි, ආඩම්බරවිය හැකි ජයග‍්‍රහණයක් ම ය.

පොදුජන පෙරමුණ හමුවේ ඇති අභියෝග

මේ ජයග‍්‍රහණයත් සමඟ ම පොදුජන පෙරමුණට අතිදැවැන්ත වගකීම් සමුදායක් ද පැවරෙන බව අවබෝධ කරගත යුතු ය. විජාතික බලවේගවලට මවුබිම පාවා දීමට අටවා ඇති මේ දුර්දාන්ත රජය හැකි ඉක්මණින් අවසන් කර රටට අලූත් රජයක්, අලූත් නායකත්වයක්, අලූත් ගමනක් නොපමාව උදාකර දීම ඉන් ප‍්‍රමුඛ වේ. එ් සඳහා රනිල් වික‍්‍රමසිංහ මහතා අගමැති තනතුරෙන් පහකරලීම, මේ විජාතික හවුල් රජය අවසන් කරලීම හා පාර්ලිමේන්තු මැතිවරණයක් නොපමා ව දිනාගනිමින් මහජනයා ගේ අභිලාෂයන්ට අනුව නව රජයක් පත්කර ගැනීමට අවස්ථාව සලසා දීම අත්‍යවශ්‍ය ව ඇත.
එ් සමඟ ම එ් නව රජය ත‍්‍රස්තවාදය නිමා කළ රටක අනාගතය ගොඩනඟන - බෙදුම්වාදය සදහට ම පරදා භූමිය පමණක් නොව රටේ සකලවිධ ජනීජනයා ද එක්සේසත් කරන රජයක් ම විය යුතුය. එ් හා ම පරගැති බවින් - සුද්දා ගෙන් මතු නොව කළු සුද්දන් ගේ ආධිපත්‍යයෙන් ද අපේ මවුබිම මුදවාගන්නා දිශානතියකට ගෙන යන රජයක් විය යුතු ය.
මේ අරමුණු සාක්ෂාත් කරගැනීම මෙ රට උපනුපන් සෑම පරපුරක් ම මුහුණ දෙන අතිදැවැන්ත අභියෝග බවට සැකයක් නැත. එහෙත් එ් අභියෝගයන් ජය ගැනීම සඳහා මහින්ද රාජපක්ෂ නායකත්වය, ශී‍්‍ර ලංකා පොදුජන පෙරමුණ මෙ රට සුවහසක් ජනීජනයා ගේ තේරීම වී තිබේ. දසදහස් ගණනක් වූ අහිංසක ජනයා සිය ප‍්‍රාර්ථනයන් ඉටුකරගැනීම සඳහා නෙළුම් පොහොට්ටුව තෝරාගෙන ඇත. එය සිය ආදරය දිනාගත් හදවතේ පක්ෂය බවට පත්කරගෙන ඇත.
එහෙත් සැකය, අවිශ්වාසය, ඊර්ෂ්‍යාව, වෛරය වැනි මනෝභාවයන් ද ආදරය හා බැඳී පවතින බව පොදුජන පෙරමුණේ සියලූ නායකයන්, සාමාජිකයන්, අනුගාමිකයන්, හිතවතුන් - සියලූදෙනා ම අවබෝධ කළ යුතු ය. එ් නිසා මේ සියලූ දෙනා, සංඝනායක පදවියෙන් පිදුම් ලත් විට අසරණසරණ වැලිවිට සරණංකර සඟරජුන් තමන් වහන්සේට ම ‘උඩඟු නොව මහණ’ ය යි කියාගනිමින් දුන් එ් උදාර ආදර්ශය අනුව යමින් වඩවඩාත් තමන් කෙරෙහි විශ්වාසය තැබූ ජනීජනයා වෙනුවෙන් කැපවීම මෙන් ම වඩවඩාත් නිරහංකාර වීම හා තමතමන්ට ම වඩවඩාත් අවංක වීම අත්‍යාවශ්‍ය ය. බෞද්ධ සාහිත්‍යයෙහි යළියළිත් නෙළුම උපමා කොට ඇත්තේ මඩින් පැන නඟින මුත් මඩ තවරා නොගෙන පිරිසුදු ව, පිවිතුරු ව සුදිලීමේ ආනුභාවයට ය. නෙළුම් පොහොට්ටුවේ නායකයන්, සාමාජිකයන්, අනුගාමිකයන්, අනුග‍්‍රාහකයන් සෑම සියලූ දෙනා ම එක දශමයකින් හෝ වඩා යහපත් වීමට, වඩා ගුණගරුක වීමට, එක දශමයකින් හෝ තමතමන් ගේ ජීවිත උසස් කරගැනීමට, උදාර කරගැනීමට, ආදර්ශවත් කරගැනීමට අධිෂ්ඨාන කරගන්නේ නම් මෙ රට ජනීජනයා එදා-මෙදා තුර සෙවූ, එදා-මෙදා තුර පැතූ හදවතේ පක්ෂය නෙළුම් පොහොට්ටුව වනු ඇත. මවුබිම ද පියවරෙන් පියවර ජයග‍්‍රහණ අත්පත් කරගන්නවා ඇත.

- ගෙවිඳු කුමාරතුංග
යුතුකම සංවාද කවය
www.yuthukama.com
Like us on facebook :https://www.facebook.com/yuthukama

මේ කොයි යන්නේ?

- ආචාර්ය චරිත හේරත් -

පළාත් පාලන ජන්දය පවත්වා මාසයක් ගතවෙන්න තියෙන්නේ තවත් එක දවසකි. ජන්දය තිබ්බේ පෙබරවාරි 10 වැනිදාය. මාර්තු 10 වැනිදා වෙන්නේ හෙටය. ඒත් තාමත් මාසයකට පෙර පැවති ජන්දයේ නිල ප්‍රතිඵල නිකුත් කරන්නට හැකියාවක් මැතිවරණ කොමිසමේ සභාපති තුමාට ලැබී නැත. වෙනදා හයියෙන් කථා කරන මැතිවරණ කොමිසමේ සභාපති තුමාගේ හඬ දැන් ජනමාධ්‍යවලවත් ඇහෙන්නේ නැති ගානට පල්ලම් බැස තියෙන්නේ මේ නොසිතූ විරූ ආකාරයේ ප්‍රතිඵල ප්‍රමාදයත් නිසා විය යුතුය.

එහෙත් දැන් රට පාලනය කරන්නේ ‘යහපාලනය’ නම් වූ විශේෂ ක්‍රමවේදයකට යැයි කියන නිසා මැතිවරණ ප්‍රතිඵල මාසයක් යනතුරු දෙන්නට බැරිවීම ඒ කියන අලුත් ප්‍රජාතන්ත්‍රවාදයේ තවත් එක් ජයග්‍රහණයක් යැයි කියන අයද සිටින්නට බැරි නැත. අනෙක් අතට පළාත් පාලන මැතිවරණ පැවැත්වූයේත් නියමිත කාලයට වඩා අවුරුදු දෙකහමාරකට පසුව බැවින් ප්‍රතිඵල දෙන්නට මාසයක් ගතවීම එච්චර ගණන් ගත යුතු දෙයක්වත් නොවේ යැයි යහපාලන සිවිල් සමාජයේ විද්වතුන් විසින් ඉදිරි දිනක කියන්නට වුණත් බැරි කමක් නැත.

මැතිවරණ කොමිසමේ ප්‍රධානියාත් පරණ ආණ්ඩුවට තරම් බරපතළ ආකාරයෙන් මේ ආණ්ඩුව ගැන කථා නොකරන නිසා මේ ප්‍රතිඵල ප්‍රමාදය යහපාලන ක්‍රමවේදයේ තවත් එක ජයග්‍රහණයක් ද එසේත් නැතිනම් අගමැතිතුමා නිතර කියන ‘ලිච්ජවී ධර්මවලට’ අයිති දෙයක් දැයි හරියටම කිව නොහැකි නමුත් ඒ දෙකෙන් එකක් විය හැකි බව නම් ඉතා පැහැදිලිය.

පළාත් පාලන මැතිවරණයේ ප්‍රතිඵල සහ ඒ ආයතන පිහිටුවීම ගැන මා ලියන්නට සිතා සිටි සටහන පැත්තකින් තියා මේ සතියේ ලිපියෙන් කථා කරන්නට සිදුවී තිබෙන්නේ මේ දවස් කීපයේ මහනුවර ප්‍රදේශයේ ඇති වී තිබෙන තත්ත්වය සහ අද රටේ පවතින ආණ්ඩුකරණයේ අර්බුදය පිළිබඳවය.

තෙල්දෙනියේ ඇතිවූ ට්‍රැෆික් ප්‍රශ්නයක් මේ වන විට මුස්ලිම් - සිංහල ගැටුමක් බවට පත් වී හමාරය. මෙය ඉතාමත් අවාසනාවන්ත තත්ත්වයක් බව අමුතුවෙන් කිව යුතු නැත. මේ තත්ත්වය පාලනය කරන්නට ආණ්ඩුවේ පැත්තෙන් ගත් උත්සාහය එතරම් හොඳ ප්‍රතිඵලයක් ලබා දී නැති බවද සත්‍යයකි. මේ රටේ මුස්ලිම්වරුන් ගේ දේශපාලනය පිළිබඳවත් සාම්ප්‍රදායික සිංහල බෞද්ධ ගම්මාන හරහා සිදුවෙමින් පවතින ඒ අයගේ ජනගහන ව්‍යාප්තිය පිළිබඳවත් සිංහල බෞද්ධ සමාජයේ ඇත්තේ බරපතළ සැකයක් හා විරෝධයක් බව පෙන්නුම් කළේ අද ඊයේ නොව බොහෝ කාලයක පටන්ය. පසුගිය ආණ්ඩු කාලයේ එක්තරා ආකාරයකින් මතුවී ආවේ මේ සැකය හා විරෝධයේ එක ප්‍රකාශනයක් යැයි කීමේ වැරැද්දක් නැත.

මේ නිසාම බිහිවූ බොහෝ සංවිධාන මේ ප්‍රශ්නය දෙස බැලුවේ හැඟීම්බරව මිස බුද්ධියෙන් නොවේ. ඒ නිසා බෞද්ධයන් මුස්ලිම්වරුන් අතර ඇති ප්‍රශ්නයක් බවට මේ තත්ත්වය පත්වූ බව නොරහසකි. මේ සැකය තවත් වර්ධනය වූයේ පසුගිය කාලයේ සිදූවූ සමහර දේශපාලන ක්‍රියාකාරිත්වයන් ද නිසාය.

පසුගිය ජනාධිපතිවරණය හා මහ මැතිවරණය කාලයේ එජාපය හා හංස සන්ධානයට සම්බන්ධ සමහර අය බොහෝ විට උත්සාහ කළේ මේ තත්ත්වය තමන්ගේ පක්ෂයට දේශපාලන වාසියක් ලෙසින් යොදා ගන්නට මිස ගැටලුව ආමන්ත්‍රණය කිරීමට නොවේ. එක් එක් ජනවර්ගවලින් ලැබෙන ‘ජන්ද කුට්ටිය’ දෙස පමණක් බලාගෙන රටේ ප්‍රශ්න විසඳන්නට යාම නිසා තත්ත්වය තවත් අවුල් සහගත තැනකට වැටී ඇති බව දැන් හොඳටම පැහැදිලිය.

පසුගිය පළාත් පාලන මැතිවරණයෙන් පසුව මේ ආණ්ඩුවේ සුජාතභාවය ගැන ජනතාවගේ පැත්තෙන් එතරම් පිළිගැනීමක් නොමැති තත්ත්වයක් ගොඩ නැඟී ඇති නිසා මෙවැනි ගැටලුවක් විසඳන්නට ඒ අයට ඇති හැකියාවද බරපතළ අර්බුදයකට මුහුණ දී ඇති බව මගේ මතයයි. වෙනත් ආකාරයකින් කිවහොත් තෙල්දෙනියෙන් මතුවූ ගැටුම පාලනය කරගැනීම දුෂ්කර වුණේ ආණ්ඩුවේ සුජාතභාවය ගැන ජනතාවගේ ඇති නොපිළිගැනීමත් නිසා යැයි සිතීමේ වරදක් ද නැත.

පළාත් පාලන ජන්දයෙන් පසුව මේ රටේ තියෙන්නේ පරණ ආණ්ඩුවම යැයි ආණ්ඩුවේ අය සිතාගෙන සිටියාට කාටත් පෙනී යන කාරණයක් වන්නේ ජනතාවගේ සිත් තුළින් මේ ආණ්ඩුව මැකී ගොස් ඇති බවය. මා මීට පෙරදිත් මතුකළ පරිදි ‘බලය තිබුණාට ගෞරවය ගැලවී ගිය’ ආණ්ඩුවකට කළ හැක්කේ වැඩි වැඩියෙන් පොලීසිය යෙදවීම වැනි කාරණා මිස ජනතාවගේ එකඟතාවක් ලබා ගැනීම නොවන බව තේරුම් ගැනීමට මේ කාරණයම ඉතාමත් වැදගත්ය.

ජනාධිපතිවරයාගේ මැදිහත්වීම හරහා සිදුකළ සමහර සාකච්ජා මගින් මේ ගැටුම්කාරිත්වය විසඳන්නට ආණ්ඩුව යම් උත්සාහයක් ගන්නා බව පෙනී ගියත් අගමැතිවරයාගේ හා සමහර මහනුවර එජාප ඇමැතිවරුන්ගේ කථා නිසා සිදුවන්නේ එසේ යන්තමටවත් ගොඩනඟා ගෙන තියෙන පාලනයත් ගැලවී යාම බව මගේ අදහසය. තෙල්දෙනියේ සිද්ධිය මත මේ වන විට ගොඩ නැඟී ඇති සිංහල-මුස්ලිම් ගැටුම වහාම නැවැත්වීම ආණ්ඩුවේ පමණක් නොව හැම දේශපාලන පක්ෂයකම වගකීම බව තේරුම් ගැනීම මෙහිදි ඉතාමත් වැදගත්ය.

මේ මොහොතේ සිංහල බෞද්ධ සමාජයේ බහුතරයක් විශ්වාස කරන නායකයා වන්නේ මහින්ද රාජපක්ෂ ජනාධිපතිතුමා බැවින් ගැටුම්වලින් වැළකී සිටින මෙන් එතුමා විසින් සිදු කළ ආයාචනය ද මෙහිදි ඉතාමත් වැදගත්ය. මේ ආයාචනය සමඟ ඒකාබද්ධයේ හා පොදුජන පක්ෂයේ කණ්ඩායම් මේ ගැටුම් ඇති ප්‍රදේශවල ‘සහයෝගිතා කමිටු’ වැනි අලුත් යාන්ත්‍රණයක් හදාගනිමින් මේ ගැටුම නිමා කරන්නට සක්‍රීයව සම්බන්ධ විය යුතු බව මගේ යෝජනාවය. විශේෂයෙන්ම මේ ආණ්ඩුවේ අය පසුගිය කාලයේ මහින්ද වෙත දමා ගැසූ ‘මුස්ලිම් විරෝධය’ යනු ඒ අයගේ දේශපාලන වාසිය සඳහා හැදු පට්ටපල් බොරුවක් බව පෙන්වීමට මේ අවස්ථාව බලෙන්ම අත්පත් කර ගැනීමට ඒකාබද්ධයේ නායකයන් පෙරට පැමිණිය යුතුය.

යටත් විජිතයෙන් පසුව අප හදන්නේ මොන වගේ රටක් දැයි 1948 සිටම අප තවම විසඳන ගත්තේ නැති බරපතළම ප්‍රශ්නය බව සැබෑය. මේ ප්‍රශ්නයට මහ ජාතියේ පැත්තෙන් සහ සුළු ජාතින්ගේ පැත්තෙන් යන දෙපැත්තෙන්ම විසඳුම් සොයන්නට අප උත්සාහ ගන්නේ ඒ කාලයේ පටන්මය. එක අතකින් අප කරමින් ඉන්නේ ක්‍රීඩා කිරීම නොව ක්‍රීඩාව සඳහා පිටිය සකස් කර ගැනීමට ගොස් රණ්ඩුවක් ඇල්ලීම වගේ දෙයක්ය. රාජ්‍ය පාලනයේ ක්‍රීඩාව වන්නේ රට ගොඩ නඟන්නේ මොන ආකාරයක දේශපාලන ආර්ථික මතවාද හරහා ද සහ මොන වගේ ප්‍රතිපත්ති හරහා ද යන කාරණා මත පදනම් වූ දෙයක්ය.

අප තවම ඉන්නේ පිටියේ දිග පළල ගැන රණ්ඩුවක නිසා මේ ක්‍රීඩාව කරන්නට කාලයක් අපට ලැබෙන්නේම නැති ගානය. 1989න් පසුව මේ රණ්ඩුවට මුස්ලිම් ජනතාවත් එක් වූයේ නැගෙනහිර පළාතේ දේශපාලන නායකත්වයක් හදා ගැනීමේ උත්සාහයත් සමඟය. මෙතැනදි සිංහල ජනතාව තේරුම් ගත යුතු කාරණයක් වන්නේ උතුරේ ගැටුම තියෙද්දී මුස්ලිම් සමාජය ඒ අවි ගත් දෙමළ දේශපාලනය වෙත ගමන් නොකළේ අෂ්රොප් වැනි නායකයන්ගේ තිබූ පළල් දේශපාලන අවබෝධය නිසා බවය. දැන් අප කළ යුත්තේ මුස්ලිම් දේශපාලනය අපේ රටේ ප්‍රධාන ප්‍රවාහයේ දේශපාලනයට එකතු කර ගැනීමට උත්සාහ කිරීමය. හකීම් සහ රිෂාඞ් යනු අෂ්රොෆ්ගේ දේශපාලන ඥානය ගෑවිලාවත් නැති නිකම්ම නිකම් නායකයන් දෙදෙනකු බව මගේ හැඟීමය.

ඒ අයට දේශපාලන බලය ගන්නට නැගෙනහිර පළාතත් මන්නාරම් දිස්ත්‍රික්කයත් පාවිච්චි කළාට මගේ අපුලක් නැත. ඒත් රට පුරා විසිරී සිටින අපේ ගම්වලට සම්බන්ධ මුස්ලිම් ජනතාව මේ දේශපාලනය සඳහා ‘පාව්ච්චි වීමෙන්’ ගලවා දැමීම මේ ගැටුමෙන් අපි උගෙන ගත යුතු හොඳම පාඩමය. අප අතර මොන ආකාරයේ විරෝධයක් තිබුණත් එජාපයේ ඩී.එස් ගේ කාලයේ සිට පවත්වාගෙන එන වැදගත් දෙයක් වන්නේ නැගෙනහිරින් පිටත සිටින මුස්ලිම්වරුන්ට එජාපයේ ඉහළ ධුරාවලියේ අවස්ථා ලබා දිමේදී පෙන්නුම් කරන නම්‍යශීලීභාවයය. අකුරණ හමීඞ් පුත්තලමේ නයිනාමරික්කාර්, කොළඹ මොහොමඞ්, බේරුවල බකීර් මාකර් සහ මාවනැල්ලේ කබීර් හසීම් වැනි අය මේ සඳහා හොඳම ආදර්ශය. මුල් කාලයේ ශ්‍රීලනීපයේත් තත්ත්වය මේ වගේමය.

ඒ දවස්වල කඩුගන්නාවේ මරික්කාර් සහ ගම්පොළ බදියුදින් මොහොමඞ් වැනි නායකයන් ඒ පක්ෂයේ සිටි නායකයන් බව අප අමතක කළ යුතු නැත. පසුකාලීනව පලස්තීන ප්‍රශ්නයට සහයෝගය ලබාදීම වැනි කාරණා හරහා මුස්ලිම්වරුන් වැඩියෙන්ම ආදරය කළ ශ්‍රීලනීපයේ නායකයකුව සිටියේ මහින්ද රාජපක්ෂ බව ඒතුමාගේ දේශපාලනයේ අද සිටින අනෙකුත් නායකයන් පවා දන්නවා දැයි මා දන්නේ නැත. ඒ නිසාම පොදුජන පක්ෂයේ බැසිල් රාජපක්ෂ මහතා වැනි නායකයන්ට මුස්ලිම් සමාජයේ ඇති පිළිගැනීම ස්වකීය පක්ෂයේ දේශපාලනමය ස්ථානගත කිරීමක් දක්වා වර්ධනය කිරීමට මේ අවස්ථාවේ දී මුල්විය යුතු බව මගේ යෝජනාවය.

මෙහිදී සඳහන් කළ යුතු අනෙක් කාරණය වන්නේ මේ රටේ බෞද්ධ සභ්‍යත්වයට හිමි තත්ත්වය යනු හුදු ආගමකින් එහාට යන ශිෂ්ටාරමය වූ බැඳීමක් සහිත දෙයක් බව පිළිගැනීමට අනෙකුත් ආගමිකයන් සූදානම් වීම අවශ්‍ය බවය. මේ පැත්තෙන් බලද්දී වර්තමාන කතෝලික සභාවේ මැල්කම් කාදිනල් රන්ජිත් රදගුරුතුමන්ගේ නිහතමානී පිළිගැනීමට අප හැමෝගේම ප්‍රසාදය හිමිවිය යුතුවා පමණක් නොව බෞද්ධයන් හා කතෝලිකයන් අතර මුහුදුබඩ තිරුවේ ඇති සාමය හා සහයෝගයට ඒ අදහස් මගින් ලබා දී ඇත්තේ විශේෂ ශක්තියක් බව නොකියාම බැරිය.

බෞද්ධ සමාජයේ මුදුන් මල් කඩ බඳු වූ දළදා මාළිගාව අනුරාධපුර පූජා නගරය වැනි සුවිශේෂ ස්ථානවලට වෙනත් ආගමිකයන්ගේ බලපෑමක් ඇතිවේ යැයි බෞද්ධයන් තුළ ඇති වී තිබෙන බිය හා සැකය දුරු කළ හැක්කේ ආණ්ඩුවේ සිටින මේ ප්‍රශ්නය තේරෙන මැදිහත් අයගේ මැදිහත්වීමෙන් මිස බෞද්ධයන්ගේ පිළිකුලට පත් වූ අය යොදා හාමුදුවරුන්ට අපහාස කිරීමෙන් නොවන බව මෙහිදී විශේෂයෙන් කිව යුතු කාරණයකි.

දැන් මේ තෙල්දෙනියේ ප්‍රශ්නය දඩමීමා කරගෙන ආණ්ඩුවේ සමහර එජාප නායකයන් හදන්නේ එක්කෝ තමන්ට එරෙහිව ගමේ මතුවෙන දේශපාලන විරෝධය මැඬපවත්වන්නටය. නැත්නම් මේ ප්‍රශ්නය පෙන්නා විවිධ නීති රිති දමමින් විපක්ෂයේ දේශපාලනය මැඬපවත්වන්නටය. ඒ එකක්වත් බැරි නම් අඩුගානේ මේ ප්‍රශ්නය පාවිච්චි කරමින් ආණ්ඩුවට විරුද්ධව මතුවී ඇති සමාජ මාධ්‍යවත් තහනම් කිරීමය. සමාජ මාධ්‍ය බොරු ප්‍රචාරය කරන බව සැබෑය.

2015 ජනාධිපතිවරණයේ දී සමාජ මාධ්‍ය කියා කළේම තරගෙට බොරු කීමය. ඒත් ඒවා බොරු බව පෙන්විය හැක්කේත් ඒ මාධ්‍ය තිබුණොතින් මිස වසා දැමීමෙන් නොවන බව තේරුම් ගැනීම ඉතාමත් වැදගත්ය. ආණ්ඩුව බලයට එනවිට කීවේ ‘හැමෝටම ෆ්‍රී වයි ෆයි දෙනවා’ කියාය. ඒ නිකම්ම නොව අහසේ පාවෙන ‘වයිෆයි බැලුම් බෝලයක්’ හරහාය. අන්තිමට සිදුවුණේ ෆ්‍රී වයිෆයි බැලුම් බෝලය’ සිහිනයක් කෙරුවා පමණක් නොව අපේ සල්ලිවලින් බලපු ෆේස්බුක් එකවුන්ට් එකටත් සීල් තැබීමය.

පේරාදෙණිය විශ්ව විද්‍යාලයේ දර්ශන අංශයේ අංශාධිපති ආචාර්ය චරිත හේරත්

යුතුකම සංවාද කවය

www.yuthukama.com
Like us on facebook :https://www.facebook.com/yuthukama

අතුරුදන් වූවන්ගේ කාර්යාලයට කොමසාරිස්ලා පත්කිරීමෙන් ආණ්ඩුව නිවට හා දීන බව පෙන්වලා

මානව හිමිකම් මහ කොමසාරිස් වරයා මානව සැසියට ප‍්‍රථමයෙන් මෙරට පිළිබඳ මූලික වාර්තාව ඉදිරිපත් කර තිබුණා ඔබ එය දකින්නේ කොයි විදිහටද ?

එයින් කියන්නේ 30/1 යෝජනාවලියට අපේ රජය දෙවරක් අනුග‍්‍රාහකත්වය දැක්වූවා, එ් නිසා එ්කට අනුව කටයුතු කළ යුතුයි කියලයි මේ කියන්නේ, ඇත්තටම සම අනුග‍්‍රහය දැක්වූ නිසා එහි තියෙන සියලූම කාරණා කි‍්‍රයාත්මක කිරීමට බැ`දී සිටිනවා කියලයි.

මේ වාර්තාවේ බොහොමයක් තියෙන්නේ මුල් යෝජනාවේ තියෙන කරුණු එකින් එක කි‍්‍රයාවට නැංවිය යුතුයි කියන දැඩි අවවාදාත්මක සඳහන් කිරීමක්.

අතුරුදන් වූවන්ගේ කාර්යාලය, මානව හිමිකම් සැසිවාරය ආරම්භ වී ඇති මෙවැනි අවස්ථාවක පිහිටුවීම පිළිබ`ද ඔබේ අදහස කුමක්ද ?

නිවට බව සහ දීන බව නැවත ප‍්‍රදර්ශනය කිරීමක් විදිහටයි මම මෙය දකින්නේ. අතුරුදන්වීමේ පනත පාර්ලිමේන්තුවේදී පසුගිය වසරේදී සම්මත වුණා. ඊට පස්සේ සැප්තැම්බර් සැසිවාරයේදී සෙයිද් අල් හුසේන් අඩිය හප්පලා පාර්ලිමේන්තුවේ මේ පනත සම්මත වුණත් කාර්යාලය පිහිටුවලා නැහැ කියලා කිව්වාම ඊට පහුවෙනිදාම අපේ රජය මේ කාර්යාලය පිහිටුවීමට කටයුතු කළා. මෙවර වාර්තාවෙන් වහාම එය කි‍්‍රයාත්මක කළ යුතුයි කියලා කිව්වාම ඊට පහුවෙනිදාම මේ කාර්යාලයට කොමසාරිස්වරුන්ව පත්කිරීමට පියවර ගත්තා. ඇත්ත වශයෙන්ම අපේ නායකයෝ කටයුතු කරන්නේ රටේ ජනතාවගේ අභිමතයට නෙමෙයි පිටරට ඉන්න විදේශිකයකුගේ වුවමනාවට කටයුතු කරන රූකඩයක් විදිහටයි.

අද මේකට පත්කරලා තියෙන එක්කෙනෙක් වෙන්නේ නිමල්කා ප‍්‍රනාන්දු සහ මිරාක් රහීම්. එතකොට මිරාක් රහීම් කියන්නේ සංහිඳියාව උදෙසා ප‍්‍රතිචාර කාර්ය බලකායේ සමාජිකයෙක් විදිහට හිටිය කෙනෙක්. මේ බලකාය හැදුවේ 30/1 යෝජනාව අනුවයි. එතකොට මේ බළකාය නිකුත් කළ යෝජනා අතර උතුරේ ඉඩම් වහාම ලබා දිය යුතුයි. මහ විරු දිනය සැමරිය යුතුයි වගේ කාරණා තියෙනවා.

නිමල්කා ප‍්‍රනාන්දු කියන්නේ කොටි සංවිධානයේ රාජ්‍ය නොවන සංවිධාන සමග එකතුවෙලා ජිනීවාවල අපේ රටේ රණවිරුවා පාවා දීමේ පුරෝගාමියෙක්. පහුගිය ජිනීවා සැසිවාරයේ දී කොටි හිතවාදී සංවිධාන කියා සිටියා දෙමළ තරුණියන් තවමත් දූෂණයට ලක්වෙනවා කියලා. මේක අස්සට නිමල්කා ප‍්‍රනාන්දු ඇවිත් කිව්වා තමුනුත්

ශී‍්‍ර ලංකා රජයෙන් හිංසාවට ගොදුරු වෙච්ච කාන්තාවක් කියලා.

බොරු සාක්කි පවා මේකට ගොනු කරන්න පුළුවන්. වීඩියෝ තාක්ෂණයෙන් දෙන සාක්කි, සාක්කි ආඥ පනතට පටහැණිව දෙන සාක්කි ලබා ගැනීමට හැකියාව තියෙනවා. එ් වගේම තමන්ට විරුද්ධව සාක්ෂි දෙන අයගෙන් හරස් ප‍්‍රශ්න අහන්න චූදිතයාට හැකියාවක් ලැබෙන්නේ නැහැ.

එ් වගේම සෙයිද් රාද් අල් හුසේන් කියනවා අපි සර්වලෝක අධිකරණ බලයට යටත් විය යුතුයි කියලා. එ් අධිකරණ බලයට යටත් වුණාම මේ වගේ සාක්ෂි රැුස් වුණාම විදේශයකට ගියාම එ් චෝදනා එල්ලවෙන පුද්ගලයාව අත් අඩංගුවට ගන්න පුළුවන්. එ් විදිහට රණවිරුවාව ඉතා නින්දිත විදිහට පාවා දීලා තියෙනවා.

මාලි රාජ්‍යයේ සාම සාධක මෙහෙයුම් සඳහා යොමු කළ මෙරට හමුදා නිලධාරීන් කිසිම යුද අපරාධයකට සම්බන්ධ නැති බව සිදු කළ පරීක්ෂණ වලින් සනාථ කර ඇති බව ප‍්‍රකාශ කර තිබෙනවා. රණවිරුවා යුද අපරාධ කළා කියලා දංගෙඩියට යොමු කරනවා කියන කාරණය සිදු වෙලා නැහැ නේද ?

මේ මාලිවලට යවපු අයව දැඩි පරීක්ෂාවකට භාජනය කළා. සමහර විට එතැන ඉන්න බොහෝ අය යුද්ධ කාලයේ හිටිය නැති අය වෙන්න ඇති. එතකොට එ්කේ අන්තිමට කියලා තියෙනවා මානව හිමිකම් කවුන්සිලයෙන් පත් කරන අය තමයි අපි ගැන බලන්නේ කියලා. මේක මොන තරම් නින්දිත කි‍්‍රයාවක්ද?

යුද අපරාධ කරලා තියෙනවා කියලා කිසිම අවස්ථාවක ඔප්පුවෙලා නැහැ. එහෙම දෙයක් නැතිව රණවිරුවන්ව මේ විදිහට පරීක්ෂාවට ලක්කරන්නේ කොහොමද? ඒකෙන් යුද අපරාධයක් කළා කියලා ඔප්පු කරන්නේ කොහොමද? ඊට තියෙන සාක්කි මොනවාද ? ඉතින් මේක තනිකරම යුද්ධයට සම්බන්ධ වුණ කිසිවකුට විදේශ වැඩසටහන්වලට සම්බන්ධ වෙන්න අවස්ථාව නොදෙන කි‍්‍රයාවක්. ඉතින් මේ රජය එ්කට ඉඩ දෙනවාද කියන එකත් ගැටලූවක් මතුවෙන කාරණයක්.

ශී‍්‍ර ලංකාවේ දූත මණ්ඩලයක් ජිනීවා බලා යෑමට නියමිතයි. එ් අය කොයි විදිහට කි‍්‍රයා කළයුතුයි කියලද ඔබ හිතන්නේ ?

මම එ් කණ්ඩායමට පැහැදිලිව කියනවා මේ 30/ 1 යෝජනාවට පාදක වුණේ සෙයිද් අල් හුසේන්ගේ ඕ අයි එස් එල් කියන වාර්තාවයි. එ් වාර්තාව නිසා තමයි 30/ 1 වාර්තාව ඇමරිකාව ගෙනාවේ. එ්කට අපි සම අනුග‍්‍රහයක් දුන්නේ. මේ වාර්තාවේ තියෙන චෝදනා සියල්ලක්ම අපි ගෝලීය ශී‍්‍ර ලංකා සංසදය නිෂ්ප‍්‍රභා කරලා මේක ඇත්ත හෙළි කරන වාර්තාවක් ජිනීවාවලට ලබා දී තියෙනවා.

මහ කොමසාරිස්ගේ වාර්තාවේ තියෙන එක චෝදනාවක් වෙන්නේ අපි උතුරට භාණ්ඩ යවන එක හිතාමතාම නැවැත්තුවා කියන එක. අපි යුද කාලයේදී මානුෂීය ආධාර සඳහා උපදේශන මණ්ඩලයක් පත් කරලා තිබ්බා. ඒකේ සභාපති වුණේ ගෝඨාභය රාජපක්ෂ මහතායි. එ්කට හැම අමාත්‍යංශයකම ලේකම්වරුන් හිටියා. ඒකේ එක්සත් ජාතීන්ගේ සංවිධානයේ නියෝජිතයන් හිටියා.

එක්සත් සංවිධානයේ මෙරට නියෝජිත නීල් බුනේ මහතා කියනවා උතුරට භාණ්ඩ යැවීම සම්බන්ධයෙන් ලංකා රජයට රන් පදක්කමක් දිය යුතුයි කියලා.

එ් වගේම මුලතිව් දිසාපතිනිය කියනවා හැම වෙලාවකම මාස තුනක ඖෂධ සහ ආහාර තියෙනවා කියලා.

ඕ.අයි.එස්.එල්. වාර්තාව නැවත වරක් සලකා බලන්න කියලා මානව හිමිකම් කවුන්සිලයට කියන්න කියලා ශී‍්‍ර ලංකා කණ්ඩායමට කියන්න කැමතියි. එහෙම කිව්වේ නැත්තම් අපේ රජය හමුදාවන් පාවා දෙන කණ්ඩායමක් බවට පත්වෙනවා. එ් අයට අපේ රජයක් ආපු අවස්ථාවක දේශද්‍රෝහීන් විදිහට සලකලා කටයුතු කරනවා.

ජිනීවා නුවරදී ගෝලීය ශී‍්‍ර ලංකා සංසදය විදිහට ඔබලා මොනවගේ වැඩසටහනක්ද කි‍්‍රයාත්මක කරන්න බලපොරොත්තු වෙන්නේ ?

ජාත්‍යන්තර බෞද්ධ සහන සංවිධානය බර්මිංහැම් විහාරයේ කස්සප හිමියන්ට අයත් සංවිධානයක්. උන්වහස්සේ පමණයි අපට මේ අවස්ථාව ලබාදුන්නේ. එහිදී අපි ජිනීවා නුවරට ගිහිල්ලා කියන්නේ මංගල සමරවීර මේ 30 / 1 යෝජනාවට සහාය දැක්වූයේ කැබිනට්ටුවේ අනුදැනුම නැතිව තනි කැමැත්ත මතයි. එ් නිසා එ්ක නීති විරෝධියි.

එ් වගේම ජිනීවා මානව හිමිකම් කවුන්සිලය විවාදයක් තියන්නේ නැතිවයි මේක කි‍්‍රයාත්මක කළේ. මේ ගැන කතා කිරීමටයි අපි මෙවර බලාපොරොත්තුවෙන්නේ. ගියපාර යුද විශේෂඥයින්ගේ වාර්තා 6ක් අපි ඉදිරිපත් කළා අපි යුධ අපරාධ කළේ නැහැ කියලා. එහි ප‍්‍රගතියත් අහන්න අපි බලාපොරොත්තුවෙනවා.

[Rivira]

යුතුකම සංවාද කවය
www.yuthukama.com
Like us on facebook : https://www.facebook.com/yuthukama

පෙබරවාරි 10 : ආණ්ඩුවත් පරාදයි , නිල විපක්ෂයත් පරාදයි - මනෝහර ද සිල්වා

• පෙබරාවරි 10 රටවැසි ප්‍රකාශය : රට බෙදන ව්‍යවස්ථාවට , රණවිරු දඩයමට , පාර්ලිමේන්තුව බලහත්කාරයෙන් අල්ලාගැනීමට එරෙහිවයි.

-ජනාධිපති නීතිඥ මනෝහර ද සිල්වා,

"පෙබරවාරි 10 තිබුණේ අමුතු තාලෙ ඡන්දයක්. මේ ඡන්දයෙන් ආණ්ඩුව පක්ෂයත් පරාදයි. නිල විපක්ෂයත් පරාදයි. මේ රටේ නිල විපක්ෂයේ නායකයා ගෙනියන සෑම දේශපාලන පක්ෂයක්ම සෑම දේශපාලන මතකයක්ම පරාදයි. මේ ආණ්ඩුව 2015 අගෝස්තු මාසේ තේරී පත් වූ දවසේ ඉඳලා එක පෙළට මේ රටට කරපු දේවල් අපි දන්නවා.

මේ රටේ ජනතාව පෙබරවාරි 10 වැනිදා තීරණය දුන්නේ බඩ ගැන කල්පනා කරලා නෙමෙයි. මේ ඡන්දය ආණ්ඩුව පරාද වුණේ ගොවියාට පොහොර ටික නොදුන්න නිසා නම් බයිසිකලයෙන් ඉල්ලපු මහරගම දිනන්න විදියක් නැහැ.
ආයෙනම් මේ රට බෙදන ව්‍යවස්ථා ගේන්න එපා කියලා අපි පක්ෂ විපක්ෂ දිනපු, පරාජය වුණු සියලු දෙනාගෙන්ම ඉල්ලනවා. මේ රටේ ජනතාව රට බෙදන ව්‍යවස්ථාවලට ඉඩ දෙන්නේ නැහැ කියලා අපි අවධාරණය කරනවා. පෙබරවාරි 10 ජනතාව ආණ්ඩුවට දුන්නෙත් ඒ උත්තරේ තමයි. අනාගතයේදී පත්වෙන අයටත්, මේක හොඳ පාඩමක්."

යුතුකම සංවාද කවය
www.yuthukama.com
Like us on facebook - https://www.facebook.com/yuthukama

'එට්‌කා' සහ ආර්ථික ඝාතකයෝ

අපි අතරෙම අපිත් එක්‌ක සුහදව ඉන්න මේ ඝාතකයා, ඝාතකයෙක්‌ කියලා හඳුනාගන්න අපි අසමත් වුණොත් මේ ඝාතකයන් අතින් අපව ඝාතනය වන බව අපි තේරුම්ගන්න ඕනා.

වෘත්තිකයන්ගේ ජාතික පෙරමුණ විසින් පසුගියදා කොළඹ මහජන පුස්‌තකාල ශ්‍රවනාගාරයේදී 'රට විකිණීමට එරෙහිව් පැවැත්වූ සම්මන්ත්‍රණයේදී තොරතුරු තාක්‌ෂණ වෘත්තීයවේදීන්ගේ සංගමයේ ලේකම් ලසන්ත වික්‍රමසිංහ මහතා විසින් එට්‌කා ගිවිසුම සහ ශ්‍රී ලංකාවේ ආර්ථික ඝාතකයෝ යන තේමාව යටතේ පැවැත්වූ දේශනය:

 එට්‌කා ගිවිසුම සම්බන්ධයෙන් ප්‍රධාන වගකීම දරන අමාත්‍ය මලික්‌ සමරවික්‍රම මහත්තයාට මේ රටේ සංවර්ධනය සම්බන්ධයෙන් තිබෙන්නේ පුදුම උනන්දුවක්‌. කොච්චර උනන්දුවක් තිබෙනවාද කියනවා නම් එතුමා පාර්ලිමේන්තු මන්ත‍්‍රීවර්යෙක්වත් වෙන්න කළින් අර බැදුම්කර හොරකමට කළින් දවසේ යනවා මහ බැංකුවට. ගිහින් සාකච්ඡුා කරනවා පාරවල් හදන්න සල්ලි හොයන විදිහ. පාර්ලිමේන්තු මන්ත‍්‍රීවරයෙක්වත් නෙමේ එතකොට. පුදුම උනන්දුවක්!

හැබැයි එතුමා අමාත්‍යාංශයක්‌ ගත්ත දවසෙ ඉඳලා මේ වෙනකල් එට්‌කා ගිවිසුම සම්බන්ධයෙන් ක්‍රියා කළත් එතුමා තවම අසමත් වෙලා තියෙනවා එට්‌කා ගිවිසුම සම්බධන්ධයෙන් ශක්‍යතා අධ්‍යනයක්‌වත් කරන්න. ඒ නිසා අපි ශක්‍යතා අධ්‍යනයක්‌ කරලා ඒක පොතක්‌ විදියට ප්‍රකාශයට පත් කරලා කථානායකවරයාගේ අනුමැතිය අරගෙන සියලු පාර්ලිමේන්තු මන්ත්‍රීවරුන්ට දීලා තියෙනවා. කථානායකතුමාත් අපට ලිපියක්‌ යොමු කළා වගකිවයුත්තන්ගේ අවධානයට ලක්‌විය යුතු මෙවැනි කෘතියක්‌ රචනා කිරීම සමබන්ධයෙන් ස්‌තුතිය ප්‍රකාශ කරලා. ඉතින් මේකේ ප්‍රධානම වගකිවයුත්තෙක්‌ තමා මලික්‌ සමරවික්‍රම ඇමැතිතුමා. අපි හිතනවා එතුමා මේ පොත කියවයි කියලා. ඒ වගේම තමා එතුමාගේ රාජ්‍ය ඇමැතිතුමා, සුජීව සේනසිංහ. අපි කවුරුත් දන්නවා එතුමා පොත් ලියන කෙනෙක්‌. ළඟදී පොතක්‌ ලිව්වා බැඳුම්කර වංචාව ගැන. එනිසා එතුමා කොහොමත් මේ පොත බලන්න ඇති. 

 මේ අවුරුද්දේ ඔක්‌තෝම්බර් මාසයේ එට්‌කා ගිවිසුම සම්බන්ධයෙන් ලංකා එට්‌කා කණ්‌ඩායමේ 12 දෙනා ඉන්දියාවේ එට්‌කා කණ්‌ඩායමත් එක්‌ක නවදිල්ලි නුවරදී 6 වැනි සාකච්ඡා වටය පැවැත්වූවා. එහිදී තීරණය වුණා 7 වැනි සාකච්ඡා වටය කොළඹදී දෙසැම්බර් මාසයෙදී පවත්වන්න. නමුත් මේවා කාටවත් දැනගන්න ලැබෙන්නේ නෑ. අපි මේ කතාකරන මොහොත වන විට ජාතියේ ගෙල සිරකරන මේ කුමන්ත්‍රණය ලංකා කණ්‌ඩායමේ 12 දෙනාත් ඉන්දියානු කණ්‌ඩායමේ කිහිප දෙනාත් අතර කොළඹ කොහේ හෝ තැනක සිදුවෙනවා වෙන්න පුළුවන්. එය බොහෝ විට මේ එට්‌කා ගිවිසුම සම්බන්ධයෙන් සිදුවන අවසන් සාකච්ඡා වටය වෙන්න පුළුවන්. එසේ වුවහොත් 2018 වසරේ මුල් කාර්තුව තුළ එට්‌කා ගිවිසුම අත්සන් කරන්නට සියලු කටයුතු සූදානම්.
(නවතම තත්වයට අනුව 2018, පෙබරවාරි 21 සිට 23 දක්වා එට්කා සඳහා අටවන සාකච්ඡා වාරයද ඉන්දියාවේ නවදිල්ලි නුවරදී පැවැත්වීය.)

 එට්‌කා සාකච්ඡා කණ්‌ඩායමේ ඉන්න නිලධාරීන් පිරිස මේ දේශෙද්‍රaහී කටයුත්ත ජනතාවට හොරෙන් කරගෙන යද්දී, තවත් පිරිසක්‌ ඉන්නවා මේ සම්බන්ධයෙන් ක්‍රියාත්මක වන. ඒ තමයි මේ රටේ ඉන්න ආර්ථික ඝාතකයෝ. මේ ආර්ථික ඝාතකයෝ කියන පිරිස තමන්ව හඳුනාගන්නේ 'ආර්ථික විශේෂඥයෝ' කියලා. මොවුන් ඉංග්‍රීසි කතාකරන ටයි කෝට්‌ පළඳින ජාතියක්‌. හැංගිලා ඉන්න ඝාතකයෝ නෙමේ මේ අය. අපි මේ අයව රූපවාහිනියේ දකිනවා. පත්තරවල ඔවුන්ගේ ලිපි පළ වෙනවා. හැබැයි මේ පිරිස කරන්නේ මේ ජාතිය ඝාතනය කරන එක.

 අපි එකක්‌ මතක තියාගත යුතුයි. අපි අතරෙම අපිත් එක්‌ක සුහදව ඉන්න මේ ඝාතකයා, ඝාතකයෙක්‌ කියලා හඳුනාගන්න අපි අසමත් වුණොත් මේ ඝාතකයන් අතින් අපව ඝාතනය වන බව අපි තේරුම්ගන්න ඕනා.

 මේ ළඟදී, රසීන් සැලී කියන පුද්ගලයා, ප්‍රතිපත්ති අධ්‍යයන ආයතනයේ ප්‍රධානියා පවසනවා, වෙළෙඳ හිඟය කියන එක ප්‍රශ්නයක්‌ නෑ. ඒ ගැන කලබල වෙන්න ඕනැ නෑ කියලා. ඇයි මේ පුද්ගලයන්ට මෙහෙම කියන්න සිද්ධ වෙන්නේ?

 මේක ඉතාම වැදගත් කාරණයක්‌. අපි මේක හරියට තේරුම් ගත්තොත් අපිට පුළුවන් මේ ආර්ථික ඝාතකයන් කවුද කියලා හඳුනාගන්න. මේ ආර්ථික ඝාතකයන් මෙහෙම කියන්නේ සුවිශේෂී හේතුවක්‌ ඇතුව. ඇයි වෙළෙඳ හිඟය, එහෙමත් නැත්නම් ආනයන අපනයන් පරතරය වැඩිවීම ප්‍රශ්නයක්‌ නෙමෙයි කියලා මේ අයට කියන්න සිද්ධවෙලා තියෙන්නේ?

 ලංකාවේ වාර්ෂික වෙළෙද හිඟය ඇමෙරිකානු ඩොලර් බිලියන 9 ක්‌. ඒ කියන්නේ එක අවුරුද්දකට හම්බන්තොට වරායවල් 9 ක්‌ වටින මුදලක්‌ අපේ රටින් පිටවෙනවා භාණ්‌ඩ වෙළෙ¹මෙන්. ඔබට මතක ඇති අපේ අගමැතිතුමා අර චෙක්‌පතක්‌ උස්‌සන් හිටියා හරියට තරගයක 'මෑන් ඔෆ් ද මෑච්' හම්බෙලා වගේ. ඒකේ තිබ්බේ කීයක්‌ ද ඇමෙරිකානු ඩොලර් බිලියන බින්දුවයි දශම දෙකයි නවයයි (0.29). වාර්ෂික වෙළෙද හිඟය වන ඇමෙරිකානු ඩොලර් බිලියන 9 න් හතරක්‌ පමණ එන්නේ ඉන්දියාවත් එක්‌ක වෙළෙඳාමෙන්. ඒ හා සමාන වෙළෙඳ හිඟයක්‌ චීනයත් සමඟ තියෙන වෙළෙඳාමෙනුත් එනවා. ඒ කියන්න ඉන්දියාව සහ චීනය සමඟ එක වසරකට වෙළෙඳ හිඟය හම්බන්තොට වරායවල් 8 ක්‌.

 මේක අපේ ආර්ථිකයේ තියෙන එක්‌තරා රෝගයක්‌. ඇයි මේක ප්‍රශ්නයක්‌ වෙන්නේ? අපට ඩොලර් අච්චු ගහන්න බෑ. අපි භාණ්‌ඩ වෙළෙඳාම් කරලා වැඩිපුර රටෙන් පිටවන ඩොලර් ප්‍රමාණය කොහෙන් හරි හොයන්න ඕනා. කොහෙන්ද අපි ඒ වැඩිපුර පිටවන ඩොලර් ප්‍රමාණය හොයන්නේ? මේ ආර්ථික විශේෂඥයන්ට අපි අවධාරණය කරලා කියනවා, වෙළෙඳ හිඟය ප්‍රශ්නයක්‌ ද නැද්ද කියන එක තේරුම්ගන්න වෙන්නේ ඒ වෙළෙඳ හිඟය කිසියම් රටක්‌ පියවන්නේ කෙසේද කියන කාරණය උඩ. ඇමෙරිකාව වගේ රටක්‌ වෙන රටවල ආයෝජනය කරලා ඉන් ලැබෙන ලාභාංශ වලින් ඒ වෙළෙඳ හිඟය පියවනකොට ඒක ලොකු ප්‍රශ්නයක්‌ නොවෙන්න පුළුවන්. හැබැයි අපි කොහොමද මේ වෙළෙඳ හිඟය පියවන්නේ? අපේ රටට එක අවුරුද්දකට ඇමෙරිකානු බිලියන හතක්‌ එවන්නේ විදේශ රටවල සේවය කරන ශ්‍රී ලාංකිකයෝ. ඒකෙන් හරි අඩක්‌ මේ රටට එවන්නේ මැදපෙරදිග වැඩකරන අම්මලා. වෙළෙඳාම් කරලා එළියට යන ඒ ඩොලර් ටික පියවන්නේ මේ අහිංසක මිනිස්‌සුන්ගේ සල්ලි. ඒ මිනිස්‌සුන්ගේ දහදිය සහ ඒ මිනුස්‌සුන්ගේ ජීවිත. මේ ආර්ථික ඝාතකයෝ අපිට කියනවා වෙළෙඳ හිඟය ප්‍රශ්නයක්‌ නෑ කියලා. එතකොට ඇයි මේ අය මෙහෙම කියන්නේ කියලා පැහැදිලියි. එට්‌කා ගිවිසුමෙන් යෝජනා කරනවා ඉන්දියා එට්‌කා ගිවිසුමෙන් යෝජනා කරනවා ඉන්දියාවෙන් ගෙන්වන භාණ්‌ඩවලින් 90% කටම ආනයනික බද්ධ සම්පූරණයෙන්ම ඉවත් කරන්න. අපි දන්නවා ඉන්දියාවත් එක්‌ක කිසියම් ගිවිසුමකට එළැඹුනොත් අපිට චීනයත් එක්‌කත් එවැනිම ගිවිසුමකට එළැඹෙන්න සිද්ධ වෙනවා. චීනය එක්‌කත් සාකච්ඡා කරන් යනවා එවැනිම ගිවිසුමක්‌ සඳහා. චීනයෙන් ආනයනික භාණ්‌ඩවලින් 90% කුත් සම්පූර්ණ ආනයනික බද්දෙන් නිදහස්‌ කරන්න යනවා.

 එතකොට ලංකාවට කෙරන ඉන්දියානු සහ චීන ආනයන ඉහළ යනවා. එතකොට ඔවුන් දන්නවා මේ වෙළෙඳ හිඟය ඉතා වේගයෙන් ඉහළ යන බව. රටෙන් පිටවන ඩොලර් ප්‍රමාණය වැඩිවෙනවා. මේ පීඩනය දරාගන්න වෙන්නේ මේ රටේ ජනතාවට. ඒ නිසා මේ රෝගයට මේක රෝගයක්‌ නෙමෙයි කියලා තමයි මේ ආර්ථික ඝාතකයෝ කියන්නේ. මොකද ඔවුන් යෝජනා කරන බෙහෙතෙන් මේ රෝගය ඔඩුදුවන බව ඔවුන් දන්නවා. ඉතින් ඒගොල්ලෝ අපිට කියනවා මේකේ ප්‍රශ්නයක්‌ නෑ. මේකේ ලෙඩක්‌ නෑ කියලා. වෙළෙඳ හිඟය ගැටලුවක්‌ නෙමෙයි කියන බොරුව සමාජගත කරලා විතරයි මේ අයට එට්‌කා ගිවිසුම ගැන කතා කරන්න පුළුවන් වෙන්නේ.

 මෙච්චර කල් මේ ලෙඩේට අපිට තිබුණ පිළියම තමයි අර මම කියපු විදේශ ශ්‍රමිකයෝ මෙහෙට එවන මුදල. දැන් මේ ගිවිසුමෙන් පස්‌සේ මොකද වෙන්නේ ඒ පිළියමට? ඒ පිළියමටත් විශාල තර්ජනයක්‌ ඇති වෙනවා.

 එට්‌කා ගිවිසුමෙන් යෝජනා කරනවා සෞඛ්‍ය, අධ්‍යාපනය, මහමාර්ග සහ ප්‍රවාහන සේවා, සංචාරක, තොරතුරු තාක්‌ෂණ, බලශක්‌තිය, බැංකු සහ මූල්‍ය සේවා, රක්‌ෂණ, විනෝදාශ්වාදය ආදී සෑම ක්‌ෂේත්‍රයක්‌ම ඉන්දියානුවන්ට විවර කරන්න. විනෝදාශ්වාදය කිව්වහම සියලු දේවල් අයත් වෙනවා සින්දු කියන එක, චිත්‍රපටි කරන එක විතරක්‌ නෙමේ මඟුල් ගෙවල්වල ඡායාරූප ගන්න එකත් ඒකට ඇතුළත් වෙනවා.

 මේ සියල්ල සඳහා ඉන්දියානු කර්මාන්ත සහ ඉන්දියානු ශ්‍රමිකයන්ට මෙහෙට එන්න පුළුවන් වෙනවා. එතකොට අර මැදපෙරදිග රටවල ලාංකික මවුවරුන් දහදුක්‌ විඳලා මෙහෙට එවන මුදල්, ඉන්දියානු ශ්‍රමිකයෝ මෙහෙට ඇවිල්ලා රුපියල්වලින් පඩි අරගෙන ඩොලර්වලට මාරු කරලා ඉන්දියාවට පිටකරන කොට අර පිළියමත් දුර්වල වෙනවා මේ එට්‌කා ගිවිසුමෙන්. එතකොට එක පැත්තකින් වෙළෙඳ හිඟය වැඩිවෙන කොට ඒකට මෙච්චර කල් පිළියම විදියට තිබිච්ච විදේශ සේවා නියුක්‌තිකයන්ගේ ප්‍රේෂණවල ශුද්ධ අගය අඩුවෙනවා. අපේ රටේ විදේශ සංචිත අඩු වෙනවා. ඒ කියන්නේ අපි ගාව තියෙන ඩොලර් අඩු වෙනවා. රුපියල අවප්‍රමාණය වෙනවා. එතකොට අපිට විදේශීය ණය ලබාගන්න වෙනවා. අපිට තව තව තීව්‍ර ලෙස අපේ ජාතික සම්පත් විකුණන්න වෙයි. එහෙම විකුණගෙන විකුණගෙන ගියාට පස්‌සේ අපිට තැනක්‌ එනවා අපි ළඟ තියෙන ජාතික සම්පත් ඔක්‌කොම විකුණලා ඉවර වෙන. සීගිරිය විකුණයි. සිංහරාජය විකුණන්න වෙයි. ඊට පස්‌සේ අපි මොනවද විකුණන්නේ? අන්න එදාට එනවා ගෙවුම් තුලන අර්බුදය. එතකොට මේ ආර්ථික විශේෂඥයෝ කියන අය කිසි කෙනෙක්‌ මේකේ වගකීම ගන්නවද? නැහැ. ඒක තමයි මනුෂ්‍ය ඝාතකයන්ගේ සහ ආර්ථික ඝාතකයන්ගේ තියෙන වෙනස. මනුෂ්‍ය ඝාතන කරපු අයව අල්ලලා උසාවියේ දඬුවම් දෙන්න පුළුවන්. මේ ආර්ථික ඝාතකයෝ සිය දහස්‌ ගණන් මිනිස්‌ ඝාතන සිදුකරලා, වැරදි ආර්ථික ක්‍රම රටවලට හඳුන්වලා දීලා එන්. ජී. ඕ. බත්බැලයෝ වෙලා එන්. ජී. ඕ. ඩොලර් අරගෙන බොහෝම සුව සේ තමන්ගේ ජීවිතය ගත කරනවා.

 මෙහෙම ආනයනික බදු අඩු කළහම රජයට ලැබෙන බදු ආදායමට මොකක්‌ද වෙන්නේ. රජය ඒ අහිමිවන බදු ආදායම වෙන කොහෙන් හෝ ලබාගත යුතුයි. කොහෙන්ද ගන්නේ? මේ රටේ දුප්පත් මිනිස්‌සුන්ගේ බොටුව මිරිකලා ඒ මිනිස්‌සුන්ගෙන් තමයි ගන්න වෙන්නේ. මේ රටේ ඉන්නවා නම් ආර්ථික විශේෂඥයෝ එට්‌කා හොඳයි කියන අපි ආරාධනා කරනවා විවාදයකට එන්න කියලා.

 දැන් කෙනෙකුට හිතෙන්න පුළුවන් වෙළෙඳ ගිවිසුම් මෙච්චර නරකද කියලා. තව රටවල් තියෙනෙවා වෙළෙඳ ගිවිසුම් ගහලා තියෙන. ඒක සාධාරණ පැනයක්‌. සමහර වෙළෙඳ ගිවිසුම් තියෙනවා ප්‍රවේශමෙන් අධ්‍යනය කරලා, ශක්‍යතා අධ්‍යනයක්‌ නිවැරදිව තේරුම් අරගෙන ගිවිසුම්ගත වෙලා යම්කිසි වාසීන් ලැබිය හැකියි. මම එක උදාහරණයක්‌ කියන්නම්. ඇමෙරිකාව සහ මෙක්‌සිකෝව අතර තියෙන වෙළෙඳ ගිවිසුමක්‌ සැලකුවොත් ඇමෙරිකාවට තියෙනවා අතිරික්‌ත ප්‍රාග්ධනය. මෙක්‌සිකෝවට තියෙනවා අඩු මිල ශ්‍රමය සහ අඩු නිෂ්පාදන පිරිවැය. එතකොට ඒ අඩු මිල ශ්‍රමය යොදා නිපදවන භාණ්‌ඩ ඇමෙරිකාවට අපනයනය කරලා වගේම මෙක්‌සිකානු වෘත්තිකයෝ ඇමෙරිකාව තුළ රැකියා කිරීම මඟිනුත් මෙක්‌සිකෝවට කිසියම් විදේශ විනිමය ප්‍රමාණයක්‌ ගෙන එනවා. ඒ වගේම මෙක්‌සිකෝව තුළ ඇමෙරිකාව සතු ප්‍රාග්ධනය ආයෝජනය කරලා ලාභාංශ විදියට ඇමෙරිකාවට මුදල් ගෙන එනවා. නමුත් මේ රටවල් දෙකටම මේ ගිවිසුමෙන් ගැටලු උදාවෙලා තියෙනවා. හැබැයි රටවල් දෙකකට කිසියම් හෝ වාසිත් තියෙනවා. 

 හැබැයි ලංකාවයි ඉන්දියාවයි සලකලා බැලුවහම තත්ත්වය කුමක්‌ද? කාටද වැඩිපුර ප්‍රාග්ධනය හිමිවීමේ වාසිය තිබෙන්නේ? ඉන්දියාවට. කාටද අඩු මිල ශ්‍රමය තියෙන්නේ? ඉන්දියාවට. අපිට ඉන්දියාවත් එක්‌ක ගිවිසුමක කිසිදු වාසියක්‌ නෑ.

 දැන් මේ ගිවිසුම් ගහන්න කතා කරන අය අපට ඉන්දියාව තුළ තියෙන අවස්‌ථා ගැන කතා කරනවා අහලා තියෙනවා. එහෙම කතා කරන්නේ නෑ. ඒ අයත් කතා කරන්නේ අපි කොහොමද බේරෙන්නේ කියලා. මම කාට හරි ගහගන්න කතා කරලා මම කල්පනා කරනවා මම කොහොමද බේරෙන්නේ කියලා. මොකක්‌ද මේ, ධනවාදය ද මේක. නෑ මේක ධනවාදය නෙවෙයි. මේක බියගුළුකම. පාලකයන්ට කොන්ද පණ නැති කම. මේක ඉන්දියානු ආක්‍රමණිකයාට බයේ කරන කටයුත්තක්‌. මොළේ තියෙනවා කියලා ගෙනාවට අද වෙනකොට ඔප්පු වෙලා තියෙනවා මේ පාලකයන්ට උකුණු හිසක තරම්වත් මොළයක්‌ නෑ කියලා. අපේ රණවිරුවෝ දස දහස්‌ ගණන් ජීවිත පූජා කරලා බේරගත්ත මවුබිම මේ වගේ පාලකයන්ට පාවාලා දෙන්න ඉඩදෙන්න බෑ. ඒ සඳහා අපි සියලු දෙනා රොද බැඳගත යුතු වෙනවා. මේ පණිවුඩය ගමින් ගම අරන් යන්න වෙනවා. පාළාත් පාලන මැතිවරණයේ ඡන්දය ඉල්ලන් කුමන පක්‌ෂයකින් ආවත් අපි හැමෝම අහමු මේ සම්බන්ධයෙන් ඔයගොල්ලන්ගේ මතය කුමක්‌ද කියලා. මේ කාරණා ටික සභාව හමුවේ අවධාරණය කරමින් මම සමුගන්නවා. බොහෝම ස්‌තුතියි.

යුතුකම සංවාද කවය
www.yuthukama.com

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. (Like us on facebook)
https://www.facebook.com/yuthukama