යුතුකම කතු වැකිය......
2025 වසර පුරා 'යුතුකම' සඟරාවේ කලාප 12ක් මුද්රණය කෙරුණි. අද දින අප දකින දේ ලියා තැබීම අදට වඩා අනාගතයට වැදගත් වනු ඇත.
එක් අතකින් මෙය උඩුගං බලා පිහිනීමට තැත් කිරීමකි. උඩුගං බලා පිහිනීම ලෙහෙසි පහසු වැඩක් නොවන බව එසේ කිරීමට උත්සාහ කළ ඇත්තෝ දනිති. අප විසින් දියත් කොට ඇති උඩුගං බලා පිහිනීමේ උත්සාහය තවමත් සම්පූර්ණයෙන් සාර්ථක වී නැති බව අපි දනිමු. අප තවම පිහිනා ඇත්තේ සෙන්ටිමීටර කිහිපයක දුරක් පමණි. නමුත් අපි අපේ උත්සාහය අත් නොහරින්නෙමු.
ලෝකය වෙනස් කරනු ලබන්නේ එසේ වෙනසක් සිදු කිරීමේ අපේක්ෂාවෙන් යුතුව අවංක උත්සාහයක් දරන සුළුතරයක් විසිනි. එම සුළුතරය වන්නේ මතුපිටින් පෙනෙන අර්බුදය විනිවිද දකින මිනිසුන්ය. ලෝක ඉතිහාසය පිරික්සා බැලීමේදී එය පසක් වේ.
ලෝකයට වෙනසක් අවශ්යව ඇත්තේ ලෝකය දැනට ගමන් කරන මාර්ගය යහපත් එකක් නොවන බැවිනි. මානව ශිෂ්ටාචාරය ගමන් කරමින් ඇත්තේ විනාශකාරී මාවතකය. නිවීම ඇත්තේ තමා තුළම බව බෞද්ධයන් වන අපි දනිමු. එහෙත් නිවන තෙක් ජීවත් වීමට ලෝකයක් වුවමනා වී ඇත. වියවුල්වලින් පිරි ලෝකයක් තුළ නිවන් මඟ වැසී යනු ඇත; ධර්මය අතුරුදහන්ව යනු ඇත.
අනුන්ගේ නිවන වෙනුවෙන් තමන්ගේ නිවන කැප කරන්නෝ වීරයෝ වෙති. ඒ වීරත්වයේ ආදර්ශය ගාමිණී අභය මහරජු හෙවත් සිංහල ඉතිහාසයේ මහා වීරයා විසින් අප වෙත ලබා දී ඇත. අපගේ පරමාදර්ශය ලෙස අප දකින්නේ එයයි.
ලංකාවේ නූතන ජාතික ව්යාපාරය 1860 දශකය දක්වා දිව යයි. උඩරට ගිවිසුමෙන් පසුව සිංහල කිරුළ ඇද වැටීමත් සමඟ බුද්ධ ධර්මය අනාරක්ෂිත වූ අතර බෞද්ධයන්ට මහත් ගැහැටට මුහුණ දීමට සිදු විය. 1860 දශකයේදී බෞද්ධ පුනර්ජීවන ව්යාපාරයේ මුල් බිජු වැපිරුණේ මෙවන් පසුබිමකයි. පසුව ධර්මපාල ශ්රීමතාණන් ප්රමුඛ ජාතික නායකයන් විසින් බෞද්ධ ආගමික පුනර්ජීවන ව්යාපාරය 'සිංහල බෞද්ධ ජාතික ව්යාපාරය' ලෙස ඔසවා තබන ලදි. 1956 දී පළමු වරට මෙම ප්රවාහය රටේ දේශපාලන බලයේ ප්රධාන කොටස්කරුවා බවට පත් විය. නමුත් එම බලය අත්පත් කර ගැනීම නියමාර්ථයෙන් ජාතියේ ජයග්රහණයක් බවට පත් කිරීමට එම ප්රවාහය එදා අසමත් විය.
එතැන් සිට ගත වූ අඩ සියවස තුළ කොතරම් දේ සිදු වී ද? ජාතිය හමුවේ එතෙක් පැවති අධිරාජ්යවාදයේ අභියෝගයට අමතරව බෙදුම්වාදය, අන්තවාදය සහ මූලධර්මවාදය හිස ඔසවා ජාතිය කොතරම් නම් අසරණ කළේ ද?
1860 පටන් ආරම්භ වී ධර්මපාල චින්තනය ඔස්සේ පැමිණ, 1956 දී බලයට පත්ව, පසුව බෙදී වෙන් වී දුර්වල වී ගිය ජාතික ව්යාපාරය 1980 දශකයේ අග භාගයේදී නැවත 'ජාතික චින්තන' මතවාදය ලෙස කෙමෙන් හිස ඔසවා ආවේය. එය 2009 දී එවකට ලෝකයේ සිටි බිහිසුණුම ත්රස්ත ව්යාපාරය වූ දෙමළ බෙදුම්වාදී ත්රස්තවාදය යුදමය වශයෙන් පරාජය කරන්නට සමත් වුණේ ජාතියේ ජීවගුණය නොනැසී පවතින බව ලොවට පසක් කර දෙමිනි. එහෙත් ඒ ජයග්රහණයේ උණුසුම මැකී යාමටත් මත්තෙන් එම ප්රවාහය නැවත බෙදී වෙන් වී දුර්වල වී ගියා නොවේද?
ජාතියක් ලෙස අප පසුගිය සියවස තුළ ජයග්රහණයක් ලබාගත් වහාම ඊට පසුව දරුණු පරාජයන්ට ලක් වන්නේ අප අවාසනාවන්තයන් නිසා ද? ඇතැමෙක් පවසන පරිදි සිංහල ජාතිය කුවේණියගේ ශාපයට ලක් වී ඇත් ද? එසේ නොමැති නම් අප මෙතරම් වරද්දා ගන්නේ මන්ද? මේ වරද්දා ගැනීම තවදුරටත් සිදු වන්නේ නම් එහි කෙළවර කුමක් ද? අපට මේ වරද්දා ගැනීම නතර කළ නොහැකි ද? හැකි නම් ඒ කෙසේ ද? ඒ සඳහා ගත යුත්තේ කිනම් පියවර ද? අප ගත යුතු මඟ කුමක් ද?
'යුතුකම' අප සිතන්නේ අපේ යුග කාර්යභාරය වන්නේ මෙම ප්රශ්නාවලියට පිළිතුරු සපයා ගැනීම බවයි.
2026 වසර 'යුතුකමට' වැදගත් වසරක් වනු ඇත. මෙම වසර අවසන් වන විට අප යම් වැඩපිළිවෙළක් ජාතිය හමුවට ඉදිරිපත් කිරීමට පිඹුරුපත් සකසමින් සිටින්නෙමු.
ඒ අරමුණු සාක්ෂාත් කර ගැනීම සඳහා සහෘද ඔබගේ අවංක ආශිර්වාදය අප වෙත ලබා දෙන්න.
- යුතුකම සඟරා සංස්කාරක මණ්ඩලය
- යුතුකම ජාතික සංවිධානය
www.yuthukama.com
Like us on facebook :: https://www.facebook.com/yuthukama
0 comments :
ෆේස්බුක් ගිණුමක් නොමැතිවත් මෙතනින් ඔබේ අදහස පළ කළ හැක .