විධායක ජනපති ධූරය ඉවත් කළ යුතුයි ?

විධායකය අහෝසි කළ යුතු යැයි ජවිපෙ පවසන්නේ එක ගලෙන් කුරුල්ලන් දෙන්නෙකු ඇල්ලීම සඳහායි. සිරිසේන මහතාව පාලනය කර රනිල්ගේ දෑත් ශක්තිමත් කරදීම පළමු අරමුණයි. දෙවන අරමුණ වන්නේ විජාතික බලවේගවල න්‍යායපත්‍රය අනුව රටේ ඒකීයභාවය විනාශ කර දැමීමයි. පළාත් සභාවලට එරෙහිව මාරාන්තික සටනක් දියත් කළ ජවිපෙට පළාත් සභා පිළිබඳව එකදු වචනයක් හෝ කතා නොකර ජනපති ක්‍රමය පිළිබඳව පමණක් කතා කරන්න ඇති අයිතිය කුමක්දැයි මෙරට ජනමාධ්‍යවේදීන් විසින් ඔවුන් හඹාගෙන ගොස් ප්‍රශ්න කළ යුතුය.

රට බෙදීම සිරිසේන ජනපති නිසා බේරුණේ යැයි ඇතැමුන් පවසන්නේ සදොස් නිගමනයක් හේතුවෙනි. සිරිසේන මහතා, ජනපති ලෙස පත් කරන්නේම රට බෙදීම සදහායි. නමුත් රනිල්ගේ දුර්වල හැසිරීම නිසා සිරිසේන සහ රනිල් අතර ගැටුමක් ඇතිවිය. 2002 දී ද සිදු වූයේ එයම බව 'සාමයේ ඉත්තෝ' නම් නොර්වේ වාර්තාවේ සඳහන් වේ. එම වාර්තාවට අනුව, රනිල් චන්ද්‍රිකාට නොදන්වා සාම ගිවිසුම අත්සන් කළ අතර පසුව එහි පිටපතක්  චන්ද්‍රිකාගේ මේසය මතට විසි කර තිබේ. රනිල්ගේ මේ හැසිරීම නිසා බෙදුම්වාදයට කැමති චන්ද්‍රිකා, රනිල් විරෝධියෙක් බවට පත්විය. මෙවරද සිදු වූයේ එවැන්නකි.සිරිසේන වෙත ලබා දිය යුතුව තිබූ ගෞරවය ලබා දෙන්නට රනිල් අසමත් විය. රනිල්ගේ බැදුම්කර වංචාව ආයුධයක් කරගත් සිරිසේන ඒ ඔස්සේ රනිල් දුර්වල  කර සිය බලය වැඩි කරගන්නට සිතුවේය. රට මෙතෙක් බේරෙන්නට ප්‍රධාන වශයෙන් බලපෑවේ මේ ගැටුමයි.

පසු ගිය ජනාධිපතිවරණයෙදී සිදු වූයේ මෙතක් ලාංකීය ඉතිහාසය තුළ සිදු නොවූ ආකාරයේ දෙයකි. රට බෙදන්න කැස කවන දෙමළ ජාතික සන්ධානය සහ රටේ ඒකීයභාවය වෙනුවෙන් පොළොවේ පස් කෑ ජාතික හෙළ උරුමය පවා එක් පොදු අපේක්ෂකයෙකු වෙනුවෙන් පෙනී සිටියේය. මෙය මෙතනින් අවසන් නොවන්නකි. එජාපය, ජවිපෙ, හෙළ උරුමය, මුස්ලිම් පක්ෂ, එන් ජී ඕ නඩය මෙන්ම ඉන්දියාවේ බලපෑමෙන් තොණ්ඩමන්ද එකම පොදු අපේක්ෂකයෙක් වටා රොක් කිරීමේ සූත්‍රය විජාතික බලවේග විසින් සොයා ගෙන අවසන්ය. ඒ සඳහා අවශ්‍ය වන්නේ මේ සියලු දෙනාට එකඟ විය හැකි පතෝලයකු තෝරා ගැනීම පමණි. ඇතැම් විට මේ පතෝලයා, පතෝලයෙක් ලෙස පෙනීම වැලැක්වීම සඳහා ඒ ඒ කාලයට එක එක ආකාරයේ පරස්පර ජනප්‍රියවාදී ප්‍රකාශ සිදු කරන්නෙක්ද විය හැකිය (විජේදාස රාජපක්ෂ මහතා මෙන්). 

13 වන ව්‍යවස්ථා සංශෝධනයේ ඇතැම් බෙදුම්වාදී අංග ජනාධිපතිවරයාගේ බලතල මගින් පාලනය කළ හැකිය. නමුත් එවැනි පාලනයක් විජාතික බලවේග වල රූකඩයෙකු ලෙස පත්වන පතෝලයකුගෙන් බලාපොරොත්තු විය නොහැක. කිසිදු ජනපදනමක් නැතිව බිහිවන මේ පතෝල නායකයා හුදෙක්ම විජාතික බලවේගවල සිරකරුවෙක් පමණක් වනු ඇත. සිරිසේන මහතාට රට ගැන හැඟීමක් තිබීම කෙසේ වෙතත් මේ සිරකාර හැඟීම ඔහුට නොරුස්සන්නක් විය. ඔහු රනිල්ට පහර දී හිරෙන් පැන යාමට තැත් කිරීම තුළ අද රට අරාජික වී තිබේ. චන්ද්‍රිකා - රනිල් සමයේද සිදුවුයේ මෙයයි. අවම වශයෙන් චන්ද්‍රිකාට එවන් අවස්ථාවක පාර්ලිමේන්තුව විසුරුවා හැරීමේ බලයක් විය. මෙවර විජාතික බලවේග බලවත් වූ වහාම 19 වන සංශෝධනය හරහා සිරිසේනගේ  ඒ බලය කපා දැමීය.  විජාතික බලය සිය ගමන යන්නේ උගත් පාඩම් හරහා සිය වැරදි නිවැරදි කර ගනිමිනි.

ඉදිරියේදී පත්වන ඊනියා පොදු අපේක්ෂකයෙකු සහිත පාලනයක් තුළ මේ පෙර වැරදි නිවැරදි කර ගන්නට විජාතික බලවේග උනන්දු වන බව පැහැදිළිය. එක්සත් ජාතික පක්ෂය පැත්තෙන් රනිල්ට වඩා එකඟ විය හැකි පුද්ගලයකු නායකත්වයට පත්වනු දැකීමට කැමති බවත්,  බලය අත් හැරීමට රනිල්ගේ ඇති අකමැත්ත තමන්ගේ සාම ව්‍යාපෘතිය අසාර්ථක වීමට බලපෑ බවත් නෝර්වේ වාර්තාවෙන් පැහැදිළි වේ. වැරදි නිවැරදි කර ගන්නා මේ රූකඩ පොදු අපේක්ෂකයා ප්‍රමුඛ එජාප-ජවිපෙ- ටීඑන්ඒ-හෙළ උරුම- එන් ජී ඕ රජයක් මඟින් ඉදිරියේදී රට  ඊළම කරා රැගෙන යන බව සක්සුදක් සේ පැහැදිලිය. බෙදුම්වාදීනට සහ එන් ජී ඕ කාරයන් විධායකය අහෝසි කළ යුතුය යන මතයේ දිගටම සිටින්නේ ඒ රූකඩ පොදු අපේක්ෂකයා මඟින් තමනට අවශ්‍ය ආකාරයට ජනපති ක්‍රමය අහෝසි කර ගැනීම සඳහාය. 

ප්‍රථමයෙන්, විජාතික බලවේග විසින් මේ ජනපති ක්‍රමය භාවිතා කරන්නේ  රටට හතුරු සියලු බලවේග එකට එකතු කිරීම සඳහාය. එපමණක් නොව, ඕනෑම මරණාසන්න මොහොතකදී ඔවුන්ට ජීවය ලබා දෙන්නේද මෙම ජනපති ක්‍රමයයි. ඒ බව පසුගිය පළාත් පාලන මැතිවරණය හරහා මෙම බලවේග ලැබූ අන්ත පරාජයෙන් පසුවද, සමස්ත ප්‍රතිශත එකතු කර පෙන්වීම මගින් පැහැදිලිය.

ඔවුන්ගේ උපායවන්නේ ජනාධිපති ක්‍රමයම "පාවිච්චි කර" බිහි කර ගන්නා රූකඩ පාලකයෙකු අතින් විජාතික බලවේගවලට අවැසි පරිදි ජනාධිපති ක්‍රමය අහෝසි කර රට දෙකඩ කිරීමට පාර කැපීමයි. පවතින දේශපාලන ගතිකයන් තුළ මේ රූකඩ ජනපති බිහිකර ගැනීම සඳහා කළ යුතු වන්නේ බෙදුම්වාදීන් සහ බඩජාරීන් හට එක විට එකඟ විය හැකි පතෝලයකු පොදු අපේක්ෂක තනතුර සඳහා සොයා ගැනීම පමණකි. එවැනි පතෝලයන් ඕනෑ තරම් මෙරට දේශපාලනයේ ඇති අතර, මේ වන විටත් මේ පතෝළයා තමා බවට පත්වීමේ ව්‍යාපෘති ඒ ඒ අය විසින් දැනටමත් දියත් කර ඇත.

එක් අතකින් විධායක ජනාධිපති ධූරය රට බෙදීම සඳහා බාධාවකි. එනිසා එය නැති කර දැමීම විජාතික බලවේගවල අවශ්‍යතාවය වේ. ඒ සඳහා ඔවුන්ට බලය ලබා ගත හැකි එකම මාර්ගයද ජනාධිපති ධූරයයි. එනිසා මීළඟට පත්වන රූකඩ පාලකයකු අතින් ජාතියේ ගෙල සිඳලමින් විධායක ජනාධිපති ධූරය අහෝසි වීමට නියමිත බව සක්සුදක් සේ පැහැදිළිය. අපැහැදිළි වන්නේ ඒ රූකඩ පාලකයා පත් කරගත හැකි වන්නේ 2020දිද, 2025 දීද, 2030 දීද යන්න පමණකි. 

එක් අතකින් රටේ රණ විරුවන් දිවි හිමියෙන් රැකදුන් රටේ ඒකීයභාවය අප රැක ගත යුතුය. තවත් අතකින් අර විජාතික බලවේගවල රට බෙදන මඟ අසුරා දැමිය යුතුය. ඒ සඳහා කළ යුත්තේ රටට හිතකර ආකාරයට රටේ ඒකීයභාවය සුරැකෙන ආකාරයකට නව ව්‍යවස්ථාවක් මඟින් හෝ විශාල සංශෝධනයක් මඟින් හෝ විධායක ජනාධිපති ක්‍රමය අහෝසි කර දැමීමයි. මෙහිදී ඉස්සර වන පිළ දිනන බව අප තේරුම් ගත යුතුය. අප විසින් එය අහෝසි නොකළ හොත් උන් විසින් එය අහෝසි කරන බව අපට පෙනී යා යුතුය.

ඒනිසා ප්‍රායෝගික භාවිතාව තුළ වඩාත් සුදුසුම ක්‍රියා මාර්ගය වන්නේ විධායක ජනපති ක්‍රමය අහෝසි කළ යුතුය යන මතය සමාජගත කර, එය විජාතික බලවේගවල බලය දුර්වල වූ අවස්ථාවක සිදු කර රටේ ඒකීයභාවය සුරැකෙන බව තහවුරු කර ගැනීමයි. නැතිනම් අනාගතයේදී  පත්වන පතෝලයකු ප්‍රමුඛ හවුල් ආණ්ඩුවක් මඟින් විධායක ජනපති ක්‍රමය අහෝසි කර රට දෙකඩ කරන බව යළිත් අවධාරණය කරමින් නවතිමි. ජාතික බලවේග ඒ සඳහා පෙරමුණ නොගතහොත් විජාතික බලවේග එය සිදු කර රට දෙකඩ කරනු නියතය. කෘතහස්ත දේශපාලකයකු වන මහින්ද රාජපක්ෂ මහතා මේ තත්වය ඉතා නිවැරදිව අවබෝධ කර ගෙන තිබෙන සැටියක් පෙනෙන්නට ඇත. පොහොට්ටුව පිපී ඇත. එය නෙලුමක් බවට පත්කළ හැක්කේ කෙසේදැයි යන උත්තර සංවාදයක් අද මේ රටට අවශ්‍යය.

-ලසන්ත වික්‍රමසිංහ.
යුතුකම සංවාද කවය
www.yuthukama.com

ඔබේ මනාපය රට වෙනුවෙන් කැපවුනු යුතුකම සංවාද කවයේ ෆේස්බුක් පිටුවේ ලකුණු කරන්න. (Like us on facebook)
https://www.facebook.com/yuthukama